ពួកឧទ្ទាមលីប៊ីពេលនេះកំពុងប្រឈមមុខនឹងការអស់ប្រាក់សម្រាប់ការចំណាយក្នុងការធ្វើសង្គ្រាមជាមួយលោកមូអាម៉ា កាដាហ្វី ។
តំណាងផ្នែកហិរញ្ញវត្ថុ និងប្រាក់ចំណូលរបស់ក្រុមប្រឆាំងលីប៊ីនិយាយកាលពីថ្ងៃទី២៩ ឧសភា ថា ពេលនេះពួកឧទ្ទាមកំពុងជិតអស់ប្រាក់ប្រើប្រាស់ក្នុងការធ្វើសង្គ្រាម ហើយប្រទេសមិត្តភក្តិមួយចំនួនហាក់ដូចជាមិនទាន់បានដឹងពីបញ្ហានេះនៅឡើយទេ ។ តំណាងរូបនេះ លោក Ali Tarhouni ដែលទទួលបន្ទុកផ្នែកផ្តល់ហិរញ្ញវត្ថុដល់ក្រុមប្រឹក្សាជាតិបណ្តោះអាសន្ននិយាយថា ការស្វែងរកប្រភពផ្តល់ប្រាក់ចំណូលគឺ ពិតជាបញ្ហាប្រឈមដ៏លំបាកមួយ ។
សំណួរសួរថា តើប្រាក់ដែលត្រូវផ្តល់ឱ្យនឹងយកទៅចំណាយសម្រាប់ការបំពាក់អាវុធដល់ពួកឧទ្ទាម ឬយ៉ាងណា? លោក Tarhouni និយាយថា យន្តការ និងវិធានការសុវត្ថិភាពប្រាកដណាស់ ប្រាក់ទាំងនោះនឹងត្រូវប្រើប្រាស់ដើម្បីទិញប្រេង ស្បៀងអាហារ និងថ្នាំពេទ្យ មិនមែនយកមកទិញអាវុធនោះទេ។
លោក Tarhouni ទើបវិលត្រឡប់ដល់ទីក្រុងបេនហ្គាហ្ស៊ី ដែលកាន់កាប់ដោយពួកឧទ្ទាមពីបណ្តាប្រទេសនៅអឺរ៉ុប និងសហរដ្ឋអាមេរិកដោយលោកទៅកាន់ប្រទេសទាំងនេះ ដើម្បីស្វះស្វែងរកជំនួយហិរញ្ញវត្ថុសម្រាប់ពួកឧទ្ទាម៕
ចែករំលែកព័តមាននេះ