បាតុករជាច្រើនពាន់នាក់បានប្រមូលផ្តុំគ្នាកាលពីថ្ងៃទី២៩ ឧសភា នៅមុខសភាស៊ែរប៊ី ក្រុងបែលហ្ក្រាដ ដើម្បីទាមទារឱ្យដោះលែងលោក RATKO MLADIC (អតីតប្រមុខយោធាសែ៊ប-បូស្នី) ដោយពួកគេចាត់ទុកអតីតប្រមុខយោធារូបនេះថា ជាវីរបុរសមួយរូប ។ ពួកបាតុ ករបានបដិសេធការបញ្ជូនខ្លួនលោក MLADIC ទៅកាន់តុលាការឧក្រិដ្ឋកម្មអន្តរជាតិសម្រាប់អតីតយូហ្គោស្លាវី ក្រុងឡាអេ ដែលចោទប្រកាន់លោកជាពិសេសពីបទប្រល័យពូជសាសន៍ដោយសារតួនាទីរបស់លោកក្នុងការសម្លាប់រង្គាលនៅក្រុងស្រេប្រេនីកាកាលពីឆ្នាំ១៩៩៥ ។
ប៉ូលិសប្រមាណជាជាង៣.០០០នាក់ដាក់ ពង្រាយនៅជុំវិញអគាររដ្ឋាភិបាលទាំងឡាយ និងបណ្តាស្ថានទូតលោកខាងលិច ខ្លាចក្រែងមានអំពើហិង្សានានាផ្ទុះឡើង ។ កងកម្លាំងប៉ូលិសក៏រារាំងផងដែរ ដល់បណ្តាក្រុមនិយមជ្រុលមកចូលរួមក្នុងបាតុកម្មនេះ ។ ពួកបាតុករដែលមានគ្នាប្រមាណយ៉ាងតិច៧០០០នាក់បាននាំគ្នាស្រែកច្រៀងជាពិសេសនូវបទចម្រៀងស្នេហាជាតិ ហើយលើកពាក្យស្លោកនានាគាំទ្រលោក RATKO MLADIC ។ ពួកបាតុករនិយាយថា នេះជាបាតុកម្មប្រឆាំងការចាប់ខ្លួនគួរឱ្យអៀនខ្មាស់នូវវីរបុរសស៊ែរប៊ីម្នាក់ ។ ពួកបាតុករទាមទារឱ្យប្រធានាធិបតីស៊ែរប៊ី លោកបូរីសតាឌីក ចាកចេញពីតំណែងព្រោះលោកជាអ្នកបញ្ជាឱ្យចាប់ខ្លួនលោក RATKO MLADI ដែលសហភាពអឺរ៉ុបដាក់លក្ខខណ្ឌរឿងនេះសម្រាប់ឱ្យស៊ែរប៊ីអាចឈរជាបេក្ខជនចូលជាសមាជិកសហភាពអឺរ៉ុប ។
លោក RATKO MLADIC អាយុ៦៩ឆ្នាំ ត្រូវចាប់ខ្លួនកាលពីថ្ងៃទី២៦ ឧសភា កន្លងមកនេះ ក្នុងភូមិមួយនាភាគខាងជើងស៊ែរប៊ី ក្រោយពីគេចខ្លួនរយៈពេលជិត១៦ឆ្នាំពីការតាមចាប់ខ្លួន ៕
ចែករំលែកព័តមាននេះ