ការខួងផែនដីដំណើរការដល់ណាហើយ? ចាប់តាំងពីរុស្ស៊ីបិទរន្ធជ្រៅបំផុតលើលោក
អន្តរជាតិ ៖ ការប្រណាំងប្រជែងជុំវិញពិភពលោក ដើម្បីឈានដល់ចំណុចកណ្តាលនៃផែនដីបានឃើញ
អន្តរជាតិ ៖ ការប្រណាំងប្រជែងជុំវិញពិភពលោក ដើម្បីឈានដល់ចំណុចកណ្តាលនៃផែនដីបានឃើញថា ប្រទេសចិន ជប៉ុន និងអាល្លឺម៉ង់ បានខិតខំប្រឹងប្រែងលើការខួងជម្រៅជ្រៅចូលក្នុងស្នូលផែនដី ចាប់តាំងប្រទេសរុស្ស៊ីបានបិទរន្ធដែលខួងជ្រៅបំផុតមិនធ្លាប់មានពីមុននៅលើពិភពលោក។ នេះបើយោងតាមប្រភពពីកាសែត The Sun ចេញផ្សាយកាលពីថ្ងៃទី២៩ ខែមករា ឆ្នាំ២០២៤។
រណ្តៅ Kola Superdeep Borehole របស់រុស្ស៊ីនៅតែរក្សាកំណត់ត្រាជារន្ធជ្រៅបំផុតមិនធ្លាប់មាននៅលើពិភពលោក ដែលមនុស្សបានខួងក្នុងជម្រៅ ៤០,២៣០ហ្វីតទៅក្នុងដី ដែលស្មើនឹង ១២,២៦២គីឡូម៉ែត្រ ដែលចាប់ផ្តើមខួងជិតទីក្រុង Murmansk នៅថ្ងៃទី២៤ ខែឧសភា ឆ្នាំ១៩៧០ ដោយប្រើម៉ាស៊ីន Uralmash-4E និងម៉ាស៊ីនខួងស៊េរី Uralmash-15000។ រន្ធនេះ ត្រូវបានបង្កើតក្នុងសម័យសហភាពសូវៀត សំដៅលើផ្នែកវិទ្យាសាស្ត្រ ដូច្នេះអ្នកវិទ្យាសាស្ត្រអាចស្វែងយល់បន្ថែមអំពីការពិតនៃផែនដី តាមរយៈការខួងដល់ជម្រៅជ្រៅមិនធ្លាប់មាន។
ទោះយ៉ាងណាក៏ដោយ នៅក្នុងឆ្នាំ ១៩៩២ ពួកគេបានបញ្ឈប់ការខួង ដោយសារតែសីតុណ្ហភាពក្តៅខ្លាំងប្រហែល១៨០អង្សារសេឯណោះ ដែលក្តៅខ្លាំងជាងការរំពឹងទុករបស់អ្នកវិទ្យាសាស្ត្រ ហើយរន្ធត្រូវបានបិទដោយគម្របដែក។ អ្នកជំនាញនៅតែរិះរកវិធីដើម្បីជម្នះបញ្ហាសីតុណ្ហភាពក្តៅខ្លាំងនេះ ប្រសិនបើពួកគេចង់រក្សាការខួង ដោយមិនបំផ្លាញឧបករណ៍ទាំងអស់របស់ពួកគេក្នុងដំណើរការខួង។
បច្ចុប្បន្ននេះ ប្រទេសចិនកាន់តែខិតជិតដល់កំណត់ត្រារបស់ប្រទេសរុស្ស៊ី ខណៈដែលប្រទេសយក្សអាស៊ីមួយនេះ នឹងព្យាយាមខួងជម្រៅជាង ៣០,០០០ហ្វីត ដែលស្មើនឹង ៩,១៤៤គីឡូម៉ែត្រចូលទៅក្នុងស្នូលផែនដី ដោយប្រើកប៉ាល់ខួងសមុទ្រដំបូងគេមានឈ្មោះថា Mengxiang ។ សារព័ត៌មាន South China Morning Post បានរាយការណ៍ថា បើទទួលបានជោគជ័យ នេះនឹងបង្ហាញពីការបណ្តាក់ទុនលើកដំបូងដ៏សំខាន់របស់មនុស្សជាតិ ដោយនាំមកនូវការយល់ដឹងថ្មីៗ និងប្រហែលជាបំបែកមូលដ្ឋានថ្មីក្នុងការសិក្សាវិទ្យាសាស្ត្រផែនដី។
ដោយឡែក ប្រទេសជប៉ុនឯណោះវិញ ក៏ធ្លាប់បានប្រកាសពីគម្រោងខួងផែនដី រហូតឈានដល់ដំណើរការខួងផងដែរ។ ជាក់ស្តែងក្នុងឆ្នាំ២០១៧ កប៉ាល់ខួងសមុទ្រមានឈ្មោះថា Chikyu របស់ជប៉ុនបានព្យាយាមក្នុងដំណើរការខួងរបស់ខ្លួន ហើយ២ឆ្នាំក្រោយមក Chikyu ខួងបាន ១០,៥៦០ហ្វីត ស្មើនឹង ៣,២១៨គីឡូម៉ែត្រនៅក្រោមបាតសមុទ្រ ដែលឆ្ងាយពីការប៉ុនប៉ងរបស់ខ្លួនចង់បានពី ៤,០២៣ ទៅដល់ ៥,៩៥៤គីឡូម៉ែត្រ។
ប្រទេសផ្សេងទៀតក៏បានអនុវត្តគម្រោងខួងជ្រៅសម្រាប់គោលបំណងស្រាវជ្រាវ និងរុករកតាមបែបវិទ្យាសាស្ត្រផងដែរ។ ជាក់ស្តែង ប្រទេសអាល្លឺម៉ង់ក៏បានអនុវត្តគម្រោងខួងរបស់ខ្លួន ដូចជាកម្មវិធីខួងជ្រៅទ្វីបអាល្លឺម៉ង់ ដែលហៅកាត់ថា KTB ដោយបានចាប់ផ្តើមក្នុងទសវត្សឆ្នាំ ១៩៨០ នៅក្នុងគោលបំណងអង្កេតសំបកផែនដី។ គម្រោង KTB បានឈានដល់ជម្រៅប្រហែល ២៩,៥២៧ហ្វីត ស្មើនឹង ៨.៩៩៩គីឡូម៉ែត្រ ដែលជាការរក្សាកំណត់ត្រាជិតនឹងកំណត់ត្រារបស់ប្រទេសចិន៕ (ប្រភព ៖ The Sun)
ចែករំលែកព័តមាននេះ