អណ្ដាតភ្លើងឆាបឆេះផ្ទះ២ខ្នងយ៉ាងសន្ធោសន្ធៅ ខណៈកំពុងដេកលង់លក់ផ្អើលទាំងយប់
- ព្រះសីហនុ
អណ្ដាតភ្លើងឆាបឆេះផ្ទះជាពលរដ្ឋមួយកន្លែងយ៉ាងសន្ធោសន្ធៅ បង្កឱ្យមានការភ្ញាក់ផ្អើលកាលពីវេលាម៉ោង១១និង៤០នាទីយប់រំលងអធ្រាត្រ
ខេត្តព្រះសីហនុ ៖ អណ្ដាតភ្លើងឆាបឆេះផ្ទះជាពលរដ្ឋមួយកន្លែងយ៉ាងសន្ធោសន្ធៅ បង្កឱ្យមានការភ្ញាក់ផ្អើលកាលពីវេលាម៉ោង១១និង៤០នាទីយប់រំលងអធ្រាត្រ ថ្ងៃទី៣០ ខែមករា ឆ្នាំ២០២៤ ស្ថិតនៅត្រង់ចំណុចភូមិថ្មី ភូមិ៤ ក្នុងសង្កាត់លេខ៣ ក្រុង-ខេត្តព្រះសីហនុ ។
បើតាមប្រភពពីសាក្សីឃើញហេតុការណ៍ បានអះអាងប្រាប់ឱ្យដឹងថា «ខណ:ពេលដែលប្រជាពលរដ្ឋ ក៏ដូចជាម្ចាស់ផ្ទះកំពុងតែសម្រាកនោះ ស្រាប់តែមានអណ្ដាតភ្លើងឆាបឆេះចេញពីផ្នែកខាងក្រោម ហើយឮសូរសំឡេងផ្ទុះចេញពីក្នុងផ្ទះកើតហេតុ រហូតក្លាយជាអណ្ដាតភ្លើងឆាបឆេះយ៉ាងសន្ធោសន្ធៅតែម្ដង ហើយយ៉ាងលឿនរហ័សបំផុតទៀតផង ប៉ុន្តែមិនបណ្ដាលឱ្យនរណាម្នាក់រងរបួសនោះទេ។
តាមប្រភពពីសមត្ថកិច្ចមូលដ្ឋាន បានប្រាប់ឱ្យដឹងដែរថា អគ្គិភ័យឆាបឆេះខាងលើនេះ គឺបណ្ដាលមកពីផ្ទុះធុងហ្គាស។ ហើយអណ្ដាតភ្លើងបានឆាបឆេះចេញពីផ្ទះកើតហេតុ រាលដាលដល់ផ្ទះមួយខ្នងទៀត សរុបចំនួន២ខ្នង ប៉ុន្តែមានម្ចាស់តែមួយ។
សមត្ថកិច្ចមូលដ្ឋាន បានប្រាប់ឱ្យបន្តថា ជុំវិញហេតុការណ៍ខាងលើនេះផងដែរ មិនបណ្ដាលឱ្យមានអ្នកណាម្នាក់រងរបួសឡើយ ប៉ុន្តែគ្រាន់តែខូចខាតម៉ូតូអស់២គ្រឿង និងរបស់របរប្រើប្រាស់មួយចំនួនទៀត ចំណែកថវិកាមិនបានបញ្ជាក់នោះឡើយ។
ប្រភពសមត្ថកិច្ចដដែលបន្តទៀតថា ហើយការចុះអន្តរាគមន៍ក្នុងហេតុការណ៍អគ្គិភ័យនេះ មានការចូលរួមពីសមត្ថកិច្ចចំរុះ រួមមាន៖ រថយន្តពន្លត់អគ្គិភ័យរបស់ស្នងការដ្ឋាននគរបាលខេត្តព្រះសីហនុ, រថយន្តពន្លត់អគ្គិភ័យរបស់កងរាជអាវុធហត្ថខេត្ត, រថយន្តរបស់កំពង់ផែស្វយ័ត្ននិងរថយន្តរបស់កងអន្តរាគមន៍៩១១ ដោយប្រើប្រាស់ទឹកអស់ចំនួនជាង១០រថយន្ត។ ពាក់ព័ន្ធក្នុងការអន្តរាគមន៍នេះដែរ សមត្ថកិច្ចបានប្រើប្រាស់ពេលវេលាជិត២ម៉ោង ទើបអាចគ្រប់គ្រងស្ថានការណ៍បាន ដោយពុំបណ្ដាលឱ្យឆេះរាលដាលទៅដល់លំនៅដ្ឋានប្រជាពលរដ្ឋដទៃទៀតនោះទេ។
ចែករំលែកព័តមាននេះ