ភ្នំពេញ៖ នៅថ្ងៃទី៣០ ខែមករា ឆ្នាំ២០២៤ នេះ រាជរដ្ឋាភិបាលកម្ពុជា និងកម្មវិធីស្បៀងអាហារពិភពលោក របស់អង្គការសហប្រជាជាតិ WFP បានចុះហត្ថលេខាលើកិច្ចព្រមព្រៀង ដើម្បីអនុវត្តផែនការយុទ្ធសាស្ត្រ សម្រាប់ប្រទេសកម្ពុជា ឆ្នាំ២០២៤-២០២៨។ ពិធីចុះហត្ថលេខានេះ ធ្វើឡើងដោយលោកស្រី យ៉ិនទៀង ពុទ្ធិរស្មី រដ្ឋលេខាធិការក្រសួងការបរទេស តំណាងរាជរដ្ឋាភិបាលកម្ពុជា និងលោកស្រី ឃ្លែរ ខូណាន់ ( Claire Conan ) តំណាងអង្គការកម្មវិធីស្បៀងអាហារពិភពលោក ប្រចាំកម្ពុជា។
តាមសេចក្តីប្រកាស ផែនការយុទ្ធសាស្ត្រ សម្រាប់ប្រទេសកម្ពុជា ឆ្នាំ២០២៤-២០២៨ មានទឹកប្រាក់ចំនួន ៦៣ ៣៧៨ ៥០០ដុល្លារអាមេរិក នឹងចូលរួមចំណែកដល់កិច្ចខិតខំប្រឹងប្រែងរបស់កម្ពុជា តាមរយៈការផ្តល់ជំនួយបច្ចេកទេស និងការផ្តល់ប្រឹក្សាគោលនយោបាយ កិច្ចគាំពារសង្គម ប្រព័ន្ធចំណីអាហារ និងការគ្រប់គ្រងគ្រោះមហន្តរាយ ក្នុងគោលបំណងលើកកម្ពស់របបអាហារ និងសម្របខ្លួនទៅនឹងការប្រែប្រួលអាកាសធាតុ។ គម្រោងទាំងនោះ ស្របតាមយុទ្ធសាស្ត្របញ្ចកោណដំណាក់កាលទី១ និងផែនការយុទ្ធសាស្ត្រអភិវឌ្ឍន៍ជាតិកម្ពុជា។
ចែករំលែកព័តមាននេះ