រាជធានីភ្នំពេញ ៖ ដើម្បីចូលរួមអបអរសាទរខួបលើកទី៦២ ទិវាកុមារអន្តរជាតិ១មិថុនា ក្រុមហ៊ុនអិនស៊ីអ៊ិចហុងដាបានបង្កើតឱ្យមានព្រឹត្តិការណ៍បង្រៀនច្បាប់ចរាចរណ៍ របៀបបើកបរ និងការដើរឆ្លងថ្នល់ដល់សិស្សសាលាបឋមសិក្សា និងអនុវិទ្យាល័យពោធិចិនតុង កាលពីថ្ងៃទី២៧ ឧសភា កន្លងមកនេះ
រាជធានីភ្នំពេញ ៖ ដើម្បីចូលរួមអបអរសាទរខួបលើកទី៦២ ទិវាកុមារអន្តរជាតិ១មិថុនា ក្រុមហ៊ុនអិនស៊ីអ៊ិចហុងដាបានបង្កើតឱ្យមានព្រឹត្តិការណ៍បង្រៀនច្បាប់ចរាចរណ៍ របៀបបើកបរ និងការដើរឆ្លងថ្នល់ដល់សិស្សសាលាបឋមសិក្សា និងអនុវិទ្យាល័យពោធិចិនតុង កាលពីថ្ងៃទី២៧ ឧសភា កន្លងមកនេះ ។
លោកដួង យ៉ាណាត ប្រធានគ្រប់គ្រងផ្នែកសុវត្ថិភាពបើកបររបស់ក្រុមហ៊ុន NCX HONDA បានឱ្យដឹងថា នាពេលបច្ចុប្បន្ននេះ គ្រោះថ្នាក់ចរាចរណ៍ជាវិញ្ញាសាមួយដ៏ចម្បងក្នុងប្រទេសកម្ពុជា ដោយរាជរដ្ឋាភិបាល អង្គការក្រៅរដ្ឋាភិបាល និងក្រុមហ៊ុនឯកជននានាបានសហការចុះធ្វើយុទ្ធនាការក្នុងការទប់ស្កាត់ និងកាត់បន្ថយគ្រោះថ្នាក់ចរាចរណ៍ តាមរយៈសកម្មភាពនានាជាច្រើន ដើម្បីអប់រំឱ្យប្រជាពលរដ្ឋយល់ដឹងអំពីសុវត្ថិភាពក្នុងការបើកបរ និងច្បាប់ចរាចរណ៍ ។
ការបណ្តុះគំនិតយុវវ័យ និងកុមារឱ្យយល់ដឹងអំពីច្បាប់ចរាចរណ៍ និងសុវត្ថិភាពបើកបរនៅលើផ្លូវថ្នល់ គឺជាកូនសោមួយដ៏សំខាន់ ដើម្បីឈានឆ្ពោះទៅកាន់វប្បធម៌នៃការគោរពប្រតិបត្តិច្បាប់ ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ ។
ដើម្បីចូលរួមចំណែកក្នុងសង្គមក្នុងការកាត់បន្ថយគ្រោះថ្នាក់ចរាចរណ៍ឱ្យមានកម្រិតទាប ក្រុមហ៊ុនអិន ស៊ី អ៊ិច ហុងដា ក៏បានបង្កើតសាលាបង្រៀនបើកបរទោចក្រយានយន្ត ដើម្បីផ្សព្វផ្សាយពីច្បាប់ចរាចរណ៍ និងសុវត្ថិភាពបើកបរដល់ប្រជាពលរដ្ឋទូទៅដោយឥតគិតថ្លៃ ។ ទន្ទឹមនឹងនេះ ក្រុមហ៊ុនមានគម្រោងចុះទៅណែនាំ និងផ្តល់ចំណេះដឹងពីច្បាប់ចរាចរណ៍ដល់សិស្សានុសិស្សនៅតាមសាលាបឋមសិក្សានានាក្នុងរាជធានីភ្នំពេញ ដោយកម្មវិធីនេះមានឈ្មោះថា «សុវត្ថិភាពចរាចរណ៍សម្រាប់កុមារ» “Road Safety For Kid Program” ក្នុងគោលបំណងដើម្បីបណ្តុះគំនិតកុមារឱ្យយល់ដឹងពីច្បាប់ចរាចរណ៍ និងសុវត្ថិភាពលើផ្លូវថ្នល់តាំងពីវ័យក្មេង ។
លោកដួង យ៉ាណាត បន្តថា ការបង្រៀនទ្រឹស្តីនៅពេលនេះគឺ លើកឡើងនូវចំណុចមួយចំនួនក្នុងច្បាប់ចរាចរណ៍ផ្លូវគោក ដើម្បីធ្វើឱ្យកុមារយល់ដឹងអំពីល្បឿននៃការបើកបរ និងការពិសាគ្រឿងស្រវឹង ហើយកុមារជាអ្នកនាំសារដល់មិត្តភក្តិ បងប្អូន និងឪពុកម្តាយ ។ សុវត្ថិភាពនៃការជិះកង់នៅលើផ្លូវថ្នល់ ដើម្បីឱ្យកុមារបានយល់ដឹងពីរបៀបនៃការជិះ ដូចជា នៅពេលជិះកង់ចេញពីផ្លូវតូចចូលផ្លូវធំ ត្រូវតែឈប់រង់ចាំមើលឆ្វេងស្តាំ ទើបជិះកង់បន្តដំណើរទៅទៀត ។ របៀបនៃការដើរឆ្លងកាត់ផ្លូវ ដើម្បីឱ្យមានសុវត្ថិភាព សំដៅឱ្យកុមារយល់ដឹងពីគំនូសសញ្ញាលើផ្លូវថ្នល់ និងឆ្លងកាត់ថ្នល់ដោយសុវត្ថិភាព។ សារសំខាន់នៃការពាក់មួកសុវត្ថិភាព និងការពាក់មួកសុវត្ថិភាពឱ្យបានត្រឹមត្រូវ ការបង្ហាត់បង្ហាញពីគន្លងផ្លូវ តើត្រូវជិះនៅគន្លងណា ដើម្បីឱ្យបានត្រឹមត្រូវ និងមានសុវត្ថិភាព ។ ការបង្ហាញពីស្លាកសញ្ញាចរាចរណ៍សំខាន់ៗខ្លះដែលកុមារជួបប្រទះជារៀងរាល់ថ្ងៃ។ ការអនុវត្តដៃចង្កូតមាន ដូចជា ការត្រួតពិនិត្យយានជំនិះមុនពេលបើកបរ, ការជិះកង់ចូលផ្លូវរង្វល់មូល, ការជិះកង់ឈប់នៅត្រង់ផ្លូវថ្មើរជើង, ការជិះកង់ឈប់នៅត្រង់ភ្លើងស្តុប, ការជិះកង់បត់ឆ្វេង និងបត់ស្តាំ, ការជិះកង់លើបន្ទះក្តារទប់លំនឹងខ្លួន និងការបង្ហាត់បង្ហាញដល់កុមារពីឥរិយាបថក្នុងការបើកបរតាមរយៈកុំព្យូទ័រវីដេអូហ្គេម ។ លោកដួង យ៉ាណាត បញ្ជាក់ថា ក្នុងមួយថ្ងៃៗកុមារនៅប្រទេសកម្ពុជាចាប់ពីអាយុ៦ឆ្នាំ ដល់១៤ឆ្នាំ បានស្លាប់ និងរងរបួសជាច្រើនដោយសារគ្រោះថ្នាក់ចរាចរណ៍ ។
បើយោងតាមរបាយការណ៍របស់អង្គការក្រៅរដ្ឋាភិបាលមួយ គឺអង្គការ Handicap បានបង្ហាញថា គ្រោះថ្នាក់ចរាចរណ៍ផ្លូវគោកនៅឆ្នាំ២០១០ គឺមានមនុស្សស្លាប់១.៨១៦នាក់ និងរងរបួសធ្ងន់៦.៧១៨នាក់ ក្នុងនោះមានកុមារដែលមានអាយុចាប់ពី០-១៤ឆ្នាំ គឺ៨ភាគរយ បានស្លាប់នៃចំនួនអ្នកស្លាប់ទាំងអស់ និង១០ភាគរយរងរបួសនៃអ្នករងរបួសទាំងអស់ ។ ក្នុងចំនួននោះ ៧០ភាគរយគឺជាសិស្ស ដូច្នេះគ្រោះថ្នាក់ចរាចរណ៍គឺជាវិញ្ញាសាមួយដ៏ចម្បងក្នុងប្រទេសកម្ពុជា ដោយរាជរដ្ឋាភិបាល អង្គការក្រៅរដ្ឋាភិបាល និងក្រុមហ៊ុនឯកជននានាបានសហការចុះធ្វើយុទ្ធនាការទប់ស្កាត់ និងកាត់បន្ថយគ្រោះថ្នាក់ចរាចរណ៍តាមរយៈសកម្មភាពនានាជាច្រើន ដើម្បីអប់រំផ្សព្វផ្សាយឱ្យប្រជាពលរដ្ឋបានយល់ដឹងអំពីសុវត្ថិភាពក្នុងការបើកបរ និងច្បាប់ចរាចរណ៍ ។
ដើម្បីចូលរួមចំណែកក្នុងសង្គមក្នុងការកាត់បន្ថយគ្រោះថ្នាក់ចរាចរណ៍ឱ្យមានកម្រិតទាប ក្រុមហ៊ុនអិនស៊ីអ៊ិចហុងដា ក៏បានបង្កើតសាលាបង្រៀនបើកបរទោចក្រយានយន្ត ដើម្បីផ្សព្វផ្សាយពីច្បាប់ចរាចរណ៍ និងសុវត្ថិភាពបើកបរដល់ប្រជាពលរដ្ឋទូទៅដោយឥតគិតថ្លៃ ។ បន្ថែមពីលើនេះទៀត សាលាបានផ្តល់ឯកសាររៀន មានម៉ូតូស៊េរីថ្មីទំនើបៗទាន់សម័យ និងសម្ភារសុវត្ថិភាពផ្សេងៗទៀត ដើម្បីអនុវត្តដៃចង្កូតនៅលើទីលានដែលប្រកបដោយស្តង់ដាបច្ចេកទេស។ វគ្គសិក្សាមានរៀងរាល់ថ្ងៃចន្ទ ដល់ថ្ងៃសៅរ៍ លើកលែងតែថ្ងៃអាទិត្យ ។ ក្រោយបញ្ចប់ការសិក្សា សាលានឹងចេញវិញ្ញាបនបត្របញ្ជាក់ការសិក្សា១ច្បាប់ ដើម្បីយកទៅដាក់ពាក្យសុំប្រឡងយកប័ណ្ណបើកបរម៉ូតូ ។
ពិសេសជាងនេះទៀត ដើម្បីបង្កភាពងាយស្រួលដល់ប្រជាពលរដ្ឋក្នុងការប្រឡងយកប័ណ្ណបើកបរនោះ សាលាបានចុះកិច្ចព្រមព្រៀងជាមួយមន្ទីរសាធារណការ និងដឹកជញ្ជូន ធ្វើការប្រឡងយកប័ណ្ណបើកបរនៅសាលាបង្រៀនបើកបរម៉ូតូ អិន ស៊ី អ៊ិច ហុងដា នេះតែម្តង ។ ទន្ទឹមនឹងនេះដែរ ដោយសារតែអត្រាអ្នកស្លាប់បណ្តាលមកពីគ្រោះថ្នាក់ចរាចរណ៍ច្រើននោះ ជាពិសេសគឺកុមារដែលមានអាយុចាប់ពី៥ឆ្នាំដល់១១ឆ្នាំ ក្រុមហ៊ុនអិនស៊ីអ៊ិច បានបង្កើតកម្មវិធីសុវត្ថិភាពចរាចរណ៍សម្រាប់កុមារនៅតាមសាលាបឋមសិក្សានានាក្នុងរាជធានីភ្នំពេញ ដោយលើកទី១ នេះសាលាជ្រើសរើសយកសាលាបឋមសិក្សាពោធិចិនតុន ដើម្បីអប់រំសិស្សានុសិស្សឱ្យបានយល់ដឹង និងគោរពច្បាប់ ឬចេះមើលស្លាកសញ្ញាចរាចរណ៍តាំងពីបឋមវ័យ។
នីតិវិធីនៃការដាក់ពាក្យសុំចូលរៀនបើកបរម៉ូតូនៅសាលាបង្រៀនបើកបរ អិន ស៊ី អ៊ិច សូមភ្ជាប់មកជាមួយនូវរូបថតទំហំ ៤X៦ ចំនួន២សន្លឹក និងអត្តសញ្ញាណប័ណ្ណ សៀវភៅគ្រួសារ ឬសំបុត្រកំណើតថតចម្លង១សន្លឹក ។ អាសយដ្ឋាន៖ ផ្លូវវេងស្រេង សង្កាត់ចោមចៅ ខណ្ឌដង្កោ រាជធានីភ្នំពេញ។ សម្រាប់ព័ត៌មានបន្ថែមសូមទាក់ទងមកទូរស័ព្ទលេខ ០១២ ៩៤៥ ៣០៨ និង០៨៥ ៩៧១ ៣៣៣ ៕
ចែករំលែកព័តមាននេះ