មានការប៉ះទង្គិចគ្នាជាថ្មីទៀត នៅប្រទេសយេម៉ែន កាលពីថ្ងៃទី២៩ ឧសភា កន្លងមក នៅក្នុងទីក្រុង Taiz រវាងកងកម្លាំងសន្តិសុខ ដែលមានភក្តីភាពចំពោះលោកប្រធានាធិបតីអាលីអាប់ឌុលឡាហ៍ សាឡេហ៍…
មានការប៉ះទង្គិចគ្នាជាថ្មីទៀត នៅប្រទេសយេម៉ែន កាលពីថ្ងៃទី២៩ ឧសភា កន្លងមក នៅក្នុងទីក្រុង Taiz រវាងកងកម្លាំងសន្តិសុខ ដែលមានភក្តីភាពចំពោះលោកប្រធានាធិបតីអាលីអាប់ឌុលឡាហ៍ សាឡេហ៍ និងហ្វូងបាតុករប្រឆាំងរដ្ឋាភិបាល បណ្តាលឱ្យស្លាប់បាតុករ៦នាក់ទៀត និងជាង១២០នាក់រងរបួស ទោះបីជាក្រុមប្រឆាំង និងរដ្ឋាភិបាល សម្រេចបានបទឈប់បាញ់គ្នាមួយកាលពីថ្ងៃទី២៨ ឧសភា ក៏ដោយ ។ អ្នកយកព័ត៌មានទីភ្នាក់ងារព័ត៌មានរ៉យទ័រនៅកន្លែងប៉ះទង្គិចគ្នានិយាយថា កងកម្លាំងសន្តិសុខបានបាញ់រះដោយប្រើគ្រាប់ពិតលើហ្វូងបាតុករ និងប្រើឧស្ម័នបង្ហូរទឹកភ្នែក ព្រមទាំងកាណុងបាញ់ទឹក ដើម្បីបំបែកហ្វូងបាតុករ ដែលធ្វើបាតុកម្មនៅបរិវេណខាងក្រៅអគារសាខាក្រុងនោះ ទាមទារឱ្យដោះលែងមិត្តភក្តិរបស់ពួកគេ ដែលត្រូវចាប់ខ្លួនកាលពីថ្ងៃទី២៨ ឧសភា កន្លងមក ។
ការប៉ះទង្គិចគ្នានេះកើតឡើងនៅក្បែរទី លានសេរីភាពដែលនៅទីនោះបាតុករប្រឆាំងរដ្ឋាភិបាលជាច្រើនពាន់នាក់បានបោះជំរំធ្វើបាតុកម្មចាប់តាំងពីខែមករាមក ទាមទារឱ្យលោកអាលីអាប់ឌុលឡាហ៍ សាឡេហ៍ លាលែងចេញពី តំណែងជាបន្ទាន់ ។ ចំណែកនៅទីក្រុងសាណា រដ្ឋធានីប្រទេសនេះវិញ មានការផ្ទុះ៧លើក
ជាប់ៗគ្នា កាលពីថ្ងៃទី២៩ ឧសភា នៅក្នុងសង្កាត់ Hasaba ជាកន្លែងកើតមានការប្រយុទ្ធគ្នារយៈពេលមួយសប្តាហ៍រវាងកងកម្លាំងរដ្ឋាភិបាល និងពួកកុលសម្ព័ន្ធដឹកនាំ ដោយមេដឹកនាំក្រុមប្រឆាំងលោក Sadeq al-Ahmar ។
លោកសាឡេហ៍ បានសច្ចាថា លោកនឹងមិនចុះចេញពីតំណែងឡើយ បើទោះបីជាលោករងសម្ពាធពីបណ្តាប្រទេសមហាអំណាចក្នុងតំបន់ និងប្រទេសមហាអំណាចលើពិភពលោកក៏ដោយ៕
ចែករំលែកព័តមាននេះ