រាជធានីភ្នំពេញ ៖ រថយន្តមួយគ្រឿងបានបំពាក់អំពូលភ្លើងកែច្នៃខុសបច្ចេកទេស ក៏ត្រូវបានសមត្ថកិច្ចឃាត់ឱ្យម្ចាស់រថយន្តឱ្យដោះចេញវិញដោយខ្លួនឯងភ្លាមៗ ព្រោះវាអាចបង្កគ្រោះថ្នាក់ចរាចរណ៍ដល់អ្នកដទៃដោយយថាហេតុ ព្រោះតែពន្លឺចែងចាំងខ្លាំងពេក ។
ជាក់ស្តែង យោងតាមផេកស្នងការដ្ឋាននគរបាលរាជធានីភ្នំពេញបានឱ្យដឹងថា កម្លាំងចុះអនុវត្តរឹតបន្តឹងច្បាប់ចរាចរណ៍ផ្លូវគោកខណ្ឌច្បារអំពៅ បានធ្វើការឃាត់រថយន្តដែលបំពាក់អំពូលភ្លើងកែច្នៃខុសលក្ខណៈបច្ចេកទេសចំនួន០១គ្រឿង កាលពីយប់ថ្ងៃទី២៩ មករា ឆ្នាំ២០២៤ ដោយអនុវត្តតាមបទបញ្ជាដ៏ម៉ឺងម៉ាត់របស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កម្លាំងអធិការដ្ឋាននគរបាលខណ្ឌច្បារអំពៅ ចុះអនុវត្តរឹតបន្តឹងច្បាប់ចរាចរណ៍ផ្លូវគោក និងត្រួតពិនិត្យជាតិស្រវឹងបានធ្វើការឃាត់រថយន្តបំពាក់អំពូលភ្លើង កែច្នៃខុសលក្ខណៈបច្ចេកទេស ហើយសមត្ថកិច្ចបានឱ្យម្ចាស់រថយន្តដោះចេញដោយខ្លួនឯង និងឱ្យធ្វើកិច្ចសន្យាបញ្ឈប់បំពាក់អំពូលភ្លើងកែច្នៃខុសលក្ខណៈបច្ចេកទេសដោយខុសច្បាប់តទៀត។
នៅក្នុងករណីខាងលើនេះ ឯកឧត្តមស្នងការក៏បានដាក់បទបញ្ជាដល់កម្លាំងសមត្ថកិច្ចចុះអនុវត្តរឹតបន្តឹងច្បាប់ចរាចរណ៍ផ្លូវគោកទាំង១៤ខណ្ឌ និងកម្លាំងជំនាញការិយាល័យនគរបាលចរាចរណ៍ផ្លូវគោក ត្រូវត្រួតពិនិត្យ និងចាត់វិធានការចំពោះអ្នកដែលបំពាក់ និងកែច្នៃអំពូលភ្លើងឧបករណ៍ខុសលក្ខណៈបច្ចេកទេសខុសច្បាប់ ដែលបង្កផលប៉ះពាល់ដល់អ្នកដទៃ និងបាត់បង់សណ្ដាប់ធ្នាប់សាធារណៈ ។
សូមរំលឹកថា លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាដល់កម្លាំងសមត្ថកិច្ចចុះអនុវត្តរឹតបន្តឹងច្បាប់ចរាចរណ៍ផ្លូវគោកទាំង១៤ខណ្ឌ និងកម្លាំងជំនាញការិយាល័យនគរបាលចរាចរណ៍ផ្លូវគោក ធ្វើការត្រួតពិនិត្យអំពូលភ្លើង ឧបករណ៍ កែច្នៃខុសលក្ខណៈបច្ចេកទេស បង្កឱ្យប៉ះពាល់ដល់សណ្តាប់ធ្នាប់សាធារណៈ ជាពិសេសប៉ះពាល់ដល់ការធ្វើដំណើររបស់អ្នកដទៃ ។
ពាក់ព័ន្ធករណីខាងលើនេះ ក្រោយប្រជាពលរដ្ឋខ្មែរកំពុងមានការព្រួយបារម្ភចំពោះរថយន្ត ដែលមិនបានគោរពច្បាប់ចរាចរណ៍ដោយបំពាក់ភ្លើងបំភ្លឺ កែច្នៃបន្ថែមអំពូលឡាស៊ែរ ឫ LED ប្រើមិនត្រឹមត្រូវខុសលក្ខណៈបច្ចេកទេស បញ្ហានេះក៏ជាផ្នែកមួយដែលរួមចំណែកធ្វើឲ្យមានករណីគ្រោះថ្នាក់ចរាចរណ៍ជាបន្តបន្ទាប់ផងដែរ ខណៈប្រជាពលរដ្ឋធ្វើដំណើរលើដងផ្លូវជាមួយគ្នាជួបការប្រឈម និងចង់ឲ្យសមត្ថកិច្ចមានចំណាត់ការលើបញ្ហានេះឲ្យមានប្រសិទ្ធភាព ។
ចែករំលែកព័តមាននេះ