ជម្លោះហិ.ង្សារវាងប្ដីជាជនជាតិចិន និងស្ត្រីជាប្រពន្ធជនជាតិខ្មែរ បានវា.យតប់គ្នានៅតាមដងផ្លូវ បង្កឱ្យមានការភ្ញាក់ផ្អើលដល់សមត្ថកិច្ចចុះអន្តរាគមន៍ និងសម្របសម្រួល
រាជធានីភ្នំពេញ ៖ ជម្លោះហិ.ង្សារវាងប្ដីជាជនជាតិចិន និងស្ត្រីជាប្រពន្ធជនជាតិខ្មែរ បានវា.យតប់គ្នានៅតាមដងផ្លូវ បង្កឱ្យមានការភ្ញាក់ផ្អើលដល់សមត្ថកិច្ចចុះអន្តរាគមន៍ និងសម្របសម្រួល កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី៣០ ខែមករា ឆ្នាំ២០២៤ នៅចំណុចផ្លូវម៉ៅសេទុង កែងផ្លូវ១៩៣ ស្ថិតក្នុងសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ ។
បើតាមសន្តិសុខម្នាក់ដែលឃើញហេតុការណ៍ បានប្រាប់ឱ្យដឹងថា «មុនពេលកើតហេតុ រូបគាត់អង្គុយយាមកន្លែងធនាគារមួយនៅកន្លែងកើតហេតុ ពេលនោះក៏ស្រាប់តែឃើញប្ដីប្រពន្ធ២នាក់ ដោយបុរសប្ដីជាជនជាតិចិន និងស្ត្រីប្រពន្ធជាជនជាតិខ្មែរ ហើយក៏មិនដឹងថា តើពួកគាត់ឈ្លោះប្រកែកគ្នារឿងអ្វីនោះទេ? ព្រោះនិយាយជាភាសាចិន»។
សន្តិសុខខាងលើ ប្រាប់បន្តថា «ភ្លាមៗនោះ នាំគ្នាដើរមកដល់ចំណុចកើតហេតុ ស្រាប់តែបុរសជាជនជាតិចិនបានវា.យទៅលើស្ត្រីប្រពន្ធជនជាតិខ្មែរជាច្រើនដៃចំផ្ទៃមុខតែម្ដង។ ដោយឃើញហេតុការណ៍បែបនេះ រូបគាត់បានរាយការណ៍ជូនកម្លាំងសមត្ថកិច្ចមូលដ្ឋានឱ្យចុះទៅជួយអន្តរាគមន៍ និងសួរនាំកុំឱ្យមានហិ.ង្សាកើតឡើង ស្រាប់តែអ្នកទាំង២នាក់នោះនាំគ្នាដេញទាំងសមត្ថកិច្ចចេញ ដោយមិនឱ្យរវីរវល់ជាមួយពួកគេនោះទេ ព្រោះថា នេះជារឿងប្ដីប្រពន្ធរបស់ពួកគេ»។
ប្រភពដដែលបានឱ្យដឹងទៀតថា «លុះពេលសមត្ថកិច្ចជិះចេញទៅបាត់មួយសន្ទុះ ក៏ស្រាប់តែអ្នកទាំង២នាក់ឈ្លោះគ្នាម្ដងទៀត ពេលនោះបុរសជនជាតិចិន បានយកទូរស័ព្ទស៊េរីទំនើប iphone ភ្នែក៣ បោ.កកម្ទេចចោលអស់ចំនួន២គ្រឿងថែមទៀតផង ទើបផ្អើលដល់សមត្ថកិច្ចចុះទៅអន្តរាគមន៍សួរនាំម្ដងទៀត តែពេលសមត្ថកិច្ចទៅដល់ ភាគីទាំង២បានកញ្ជ្រោលដាក់គ្នាថែមទៀត ដោយគ្មានអ្នកណាស្តាប់អ្នកណានោះទេ»។
ក្រោយពេលកើតហេតុ បន្ទាប់ពីឈ្លោះគ្នាជាភាសាចិន ដោយស្រែកដាក់គ្នាខ្លាំងៗរួចហើយ សមត្ថកិច្ចក៏ខំនិយាយលួងលោម ហើយឱ្យពួកគាត់ឈប់ឈ្លោះប្រកែកគ្នា ចុងក្រោយអ្នកទាំង២នាក់ក៏ជិះម៉ូតូកង់បីម្នាក់មួយគ្រឿងចេញទៅបាត់អស់តែម្ដងទៅ៕
ចែករំលែកព័តមាននេះ