ការវាយប្រហារដោយការបំផ្ទុះគ្រាប់បែកនានាបានធ្វើឱ្យកក្រើកបន្ទាយយោធាមួយនៅភាគខាងជើងប្រទេសនីហ្សេរីយ៉ា កាលពីយប់ថ្ងៃទី២៩ ឧសភា កន្លងមក បណ្តាលឱ្យស្លាប់មនុស្ស១២នាក់ ។ ការវាយប្រហារនេះកើតឡើងរយៈពេលប៉ុន្មានម៉ោងក្រោយពីប្រធានាធិបតីជាប់ឆ្នោតប្រទេសនេះ លោក Goodluck Jonathan ធ្វើសច្ចាប្រណិធានចូលកាន់តំណែង ។ បុគ្គលិកជួយសង្គ្រោះម្នាក់ដែលស្នើសុំមិនបញ្ចេញឈ្មោះបានប្រាប់ទីភ្នាក់ងារព័ត៌មានរ៉យទ័រថា អ្នករួមការងារជាមួយលោកឃើញមនុស្ស១២នាក់ ត្រូវស្លាប់ និង២៥នាក់ទៀតរងរបួស។
ការវាយប្រហារនេះ បានបំផ្លាញផ្សារមួយក្នុងបរិវេណបន្ទាយយោធានេះ ។ ពុំមានក្រុមណាមួយអះអាងទទួលខុសត្រូវចំពោះការវាយប្រហារនេះនៅឡើយទេ ។
អ្នកនាំពាក្យទីភ្នាក់ងារគ្រប់គ្រងស្ថានការណ៍គ្រាអាសន្នជាតិនីហ្សេរីយ៉ា លោក Yushua Shuaib និយាយថា វាជាការផ្ទុះដ៏ខ្លាំង ហើយមានឥទ្ធិពលបំផុតមួយ ។
តាមសេចក្តីរាយការណ៍ថា ការវាយប្រហារបំផ្ទុះគ្រាប់បែកនេះ ធ្វើឡើងក្នុងគោលបំណងឱ្យលោក Jonathan ត្រូវប្រឈមមុខនឹងការបង្រួបបង្រួមប្រទេស ដែលមានពលរដ្ឋច្រើនបំផុតនៅអាហ្វ្រិកនេះ ។ កាលពីខែមុននៅទីក្រុងភាគខាងជើង នីហ្សេរីយ៉ា មានកើតការបះបោរធ្ងន់ធ្ងរមួយបណ្តាលឱ្យស្លាប់មនុស្សជាច្រើនរយនាក់ ក្រោយពីលោក Jonathan ជាអ្នកកាន់សាសនាគ្រិស្តមកពីភាគខាងត្បូងប្រទេសត្រូវបានប្រកាសជាអ្នកឈ្នះឆ្នោត ។
លោក Goodluck Jonathan បានធ្វើសច្ចាប្រណិធានចូលកាន់តំណែងក្នុងពិធីមួយរៀបចំ ឡើងនៅក្នុងទីក្រុងអាប៊ូហ្សា ដោយមានសន្តិសុខយាមកាមយ៉ាងតឹងរ៉ឹង ៕
ចែករំលែកព័តមាននេះ