ខេត្តកំពត ៖ ប្រជាពលរដ្ឋរាប់រយនាក់នៅឃុំផ្សេងៗពីគ្នា ក្នុងស្រុកបន្ទាយមាសបាននាំ គ្នាសម្រុកទៅជីកកកាយយកដុំថ្មពុកផុយដែលអ្នកស្រុកឱ្យឈ្មោះថាជីធម្មជាតិ នៅភ្នំកន្លង់ ស្ថិតនៅឃុំស្តេចគង់ខាងជើង មកលក់ឱ្យឈ្មួញ។ សកម្មភាពជីកកកាយរុករកដុំថ្មពុកផុយដែលអះអាងថា ជាជីដើម្បីទុកថ្លឹងលក់ឱ្យក្រុមហ៊ុនមួយនៅក្នុងស្រុកដែលកំពុងប្រមូលទិញ
ខេត្តកំពត ៖ ប្រជាពលរដ្ឋរាប់រយនាក់នៅឃុំផ្សេងៗពីគ្នា ក្នុងស្រុកបន្ទាយមាសបាននាំ គ្នាសម្រុកទៅជីកកកាយយកដុំថ្មពុកផុយដែលអ្នកស្រុកឱ្យឈ្មោះថាជីធម្មជាតិ នៅភ្នំកន្លង់ ស្ថិតនៅឃុំស្តេចគង់ខាងជើង មកលក់ឱ្យឈ្មួញ។
សកម្មភាពជីកកកាយរុករកដុំថ្មពុកផុយដែលអះអាងថា ជាជីដើម្បីទុកថ្លឹងលក់ឱ្យក្រុមហ៊ុនមួយនៅក្នុងស្រុកដែលកំពុងប្រមូលទិញ ។ ការលើកគ្នារាប់រយនាក់ទៅកាយយកថ្មផុយនេះ ពិតជាធ្វើឱ្យមានការភ្ញាក់ផ្អើល ព្រោះភ្នំទំហំប្រហែល១គីឡូម៉ែត្រក្រឡា ត្រូវបានគេរកឃើញថា មានរ៉ែអាចផលិតជាជីធម្មជាតិបាន ។ ប្រជាពលរដ្ឋម្នាក់ដែលកំពុងជីករណ្តៅដីរកដុំថ្មនឹងគេនោះ បាននិយាយថា អ្នកភូមិទាំងចាស់ ទាំងក្មេង បាននាំគ្នាមកជីករណ្តៅនៅលើភ្នំកន្លង់នេះស្វែងរកដុំថ្មមានតម្លៃទុកលក់ឱ្យក្រុមហ៊ុនមួយដែលមកពីភ្នំពេញ ឈរចាំទិញនៅជើងភ្នំតែម្តង ។
គាត់បានរៀបរាប់ថា ទោះបីជាមានប្រជាពលរដ្ឋរាប់រយនាក់នាំគ្នាមកជីករកដុំថ្មលក់ឱ្យក្រុមហ៊ុនក៏ដោយ គ្មានអាជ្ញាធរមករំខានពួកគាត់ឡើយ ។ ទោះបីជាបែបណា ប្រជាពលរដ្ឋនិយាយត្អូញត្អែរថា ក្រុមហ៊ុនទទួលទិញដុំថ្មនេះគេឱ្យតម្លៃថោកបំផុតគឺដុំថ្មមួយគីឡូក្រាមមានតម្លៃតែ៨៤កាក់។ ដូច្នេះ១រយគីឡូក្រាមស្មើនឹង៨.៤០០ រៀលប៉ុណ្ណោះ តែគ្មានអ្វីនឹងរកទៅហើយបានគេមកទិញបែបនេះក៏ចេះតែនាំគ្នាប្រឹងទៅ។ គាត់និយាយថា ការលីសែងថ្មចុះមកពីលើភ្នំមិនមែនជារឿងធម្មតាទេ គឺផ្លូវចុះពីលើកំពូលភ្នំឆ្ងាយ ត្រូវចំណាយកម្លាំងច្រើន ។
ស្ត្រីម្នាក់ទៀតជាអ្នកកាយដីរកថ្មដែរ និយាយថា ខាងក្រុមហ៊ុនបើអាណិតពលរដ្ឋគួរណាស់តែឱ្យ តម្លៃថ្មក្នុងមួយគីឡូក្រាម១០០រៀល ទើបស័ក្តិសម ព្រោះទំនិញឥឡូវឡើងថ្លៃខ្ពស់ ណាស់ដែរ ។
លោកអ៊ូ គីន មេឃុំស្តេចគង់ខាងជើង បានប្រាប់ឱ្យដឹងថា ក្រុមហ៊ុនមកទិញថ្មពីពលរដ្ឋនេះគឺក្រុមហ៊ុនគេមានច្បាប់ត្រឹមត្រូវពីមន្ទីរឧស្សាហកម្ម រ៉ែ និងថាមពលខេត្ត។ លោកមេឃុំមានប្រសាសន៍ ថា យោងទៅតាមច្បាប់របស់ក្រុមហ៊ុនគឺមានរយៈពេលត្រឹមតែ៣ខែទេ ដែលក្រុមហ៊ុនអះអាងថាជាការសាកល្បង បើយកដុំថ្មនោះទៅផលិតជីលាយ ជាមួយសារធាតុផ្សេងៗទៀត សម្រេចបានជោគ ជ័យមានគុណភាព ហើយមានការគាំទ្រពីប្រជាពលរដ្ឋច្រើនអាចបន្តធ្វើអាជីវកម្មទៅមុខទៀត ។
គេបានសម្គាល់ឃើញថា នៅឆ្នាំ២០០៣ ដុំថ្មដែលគេពិនិត្យឃើញថា អាចយកទៅធ្វើជីបាននោះត្រូវបានក្រុមឈ្មួញដឹកចេញតាមទូកចេញពីភ្នំកន្លង់ឆ្ពោះទៅប្រទេសវៀតណាម ប៉ុន្តែអាជ្ញាធរនៅតាមព្រំដែនមិនឱ្យដឹកចេញ ។
មានការរំឭកឱ្យដឹងថា តាំងពីសម័យខ្មែរក្រហមក៏មានគម្រោងធ្វើរោងចក្រផលិតជីនៅភ្នំកន្លង់នេះដែរ។ កាលណោះជនជាតិចិនជាអ្នករៀបចំ តែក្រោយថ្ងៃរំដោះ៧ មករា ប្រទេសជាតិមានសុខសន្តិភាព ក៏មានក្រុមហ៊ុនផ្សេងៗចូលមកពិនិត្យមើលថ្មនេះជាបន្តបន្ទាប់ដែរ ។
លោកសុខ មាន មន្ត្រីនគរបាលឃុំនិយាយថា អ្នកចំណាកស្រុកភាគច្រើនដែលបានទាក់ទាញពីភូមិ ស្រុកទៅរកការងារធ្វើបានវិលមកវិញអស់ហើយ ដោយសារតែពួកគាត់មានការងារធ្វើនៅជិតផ្ទះ៕
ចែករំលែកព័តមាននេះ