រាជធានីភ្នំពេញ ៖ លោកឧបនាយករដ្ឋមន្ត្រីសុខ អាន មានប្រសាសន៍ប្រាប់អ្នកសារព័ត៌មានជាតិ-អន្តរជាតិថា កិច្ចប្រជុំស្តីពីការសម្របសម្រួលគ្នាឱ្យមានសកម្មភាពក្នុងក្របខណ្ឌគណៈកម្មការបេតិកភណ្ឌពិភពលោកនៃអង្គការយូណេស្កូ ដើម្បីជួសជុលប្រាសាទព្រះវិហាររវាងកម្ពុជា-ថៃជាលទ្ធផលជាក់ស្តែងពុំបានទទួលជាផ្លែផ្កាទេ
រាជធានីភ្នំពេញ ៖ លោកឧបនាយករដ្ឋមន្ត្រីសុខ អាន មានប្រសាសន៍ប្រាប់អ្នកសារព័ត៌មានជាតិ-អន្តរជាតិថា កិច្ចប្រជុំស្តីពីការសម្របសម្រួលគ្នាឱ្យមានសកម្មភាពក្នុងក្របខណ្ឌគណៈកម្មការបេតិកភណ្ឌពិភពលោកនៃអង្គការយូណេស្កូ ដើម្បីជួសជុលប្រាសាទព្រះវិហាររវាងកម្ពុជា-ថៃជាលទ្ធផលជាក់ស្តែងពុំបានទទួលជាផ្លែផ្កាទេ ប៉ុន្តែជាការប្រជុំមានអត្ថន័យយ៉ាងជ្រាលជ្រៅ ។
លោកឧបនាយករដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីមានប្រសាសន៍បែបនេះកាលពីព្រឹកថ្ងៃទី២៩ ឧសភា ឆ្នាំ២០១១ នៅបន្ទប់រង់ចាំព្រលានយន្តហោះអន្តរជាតិភ្នំពេញ ក្នុងឱកាសដែលលោកឧបនាយករដ្ឋមន្ត្រី និងប្រតិភូអញ្ជើញ ត្រឡប់មកពីកិច្ចប្រជុំគណៈកម្មការបេតិកភណ្ឌ ពិភពលោកយូណេស្កូទីក្រុងប៉ារីស ប្រទេសបារាំង ។ទាក់ទិនទៅនឹងលទ្ធផលនៃកិច្ចប្រជុំស្តីពីការសម្របសម្រួលឱ្យមានសកម្មភាពក្នុងក្របខណ្ឌគណៈកម្មការបេតិកភណ្ឌពិភពលោកអង្គការយូណេស្កូ ដើម្បីជួសជុលប្រាសាទព្រះវិហារ ដែលពុំបានផ្លែផ្កានោះ លោកឧបនាយករដ្ឋមន្ត្រីសុខ អាន បានបញ្ជាក់ថា ក្នុងកិច្ចប្រជុំនោះគណៈប្រតិភូ និងខាងគណៈកម្មការបេកតិភណ្ឌ យូណេស្កូ បានឃើញនូវមហិច្ឆតារបស់ភាគីថៃ។
នៅក្នុងកិច្ចប្រជុំនេះសំណូមពររបស់ភាគីថៃមាន៣ចំណុចធំ ចំណុចទី១-ភាគីថៃធ្វើយ៉ាងម៉េចចង់ទៅទប់ស្កាត់មិនឱ្យគណៈកម្មការបេតិកភណ្ឌ ពិភពលោក យកការសម្រេចដើម្បីបញ្ជូនក្រុមជំនាញមកធ្វើការសិក្សា និងជួសជុលប្រាសាទព្រះវិហារដែលត្រូវទទួលការខូចខាតពីការបាញ់ផ្លោងគ្រាប់កាំភ្លើងរបស់ទាហានថៃចំនួន៤១៤គ្រាប់ទៅលើប្រាសាទព្រះវិហារ ។
ចំណុចទី២-ថៃបានលើកជាចំហថា ចង់ដកគម្រោងផែនការគ្រប់គ្រងប្រាសាទព្រះវិហារ ចេញពីឯកសាររបស់គណៈកម្មការ ។
ចំណុចទី៣-ថៃចង់បង្ហាញថា ការចរចារវាងកម្ពុជា-ថៃ ត្រូវតែធ្វើទ្វេភាគី ។ ពាក់ព័ន្ធទៅនឹងបំណងរបស់ថៃនេះ លោកឧបនាយករដ្ឋមន្ត្រីគូសបញ្ជាក់ថា គឺអត់បានសម្រេចទាំងអស់ គឺបរាជ័យរបស់ថៃទាំង៣ចំណុច ។
លោកឧបនាយករដ្ឋមន្ត្រីមានប្រសាសន៍បកស្រាយថា មិនបានផ្លែផ្កា ប៉ុន្តែមានន័យជ្រាលជ្រៅសម្រាប់យល់នូវនយោបាយការទូត ការភូតកុហករបស់ថៃ ។ ដូច្នេះចំណុចទី១ គឺថៃគេចង់ទប់ស្កាត់មិនឱ្យមានសម្រេចជាផ្លូវការបញ្ជូនក្រុមជំនាញធ្វើការជួសជុលប្រាសាទដោយថៃគេហ៊ានភូតកុហក នៅលើវេទិកាដែលមានលក្ខណៈជាវេទិកាពិភពលោក (យូណេស្កូ) ។
ដូច្នេះការជួបជុំគ្នានេះ គឺមិនមែនជាការជួបជុំតែពីរភាគីទេ គឺជាការជួបជុំគ្នាដែលរៀបចំឡើងដោយអង្គការយូណេស្កូពិតប្រាកដ ។ ភាគីថៃគេបានលើកឡើងនៅមុខយូណេស្កូថា ប្រាសាទព្រះវិហារអត់មានខូចខាតអ្វីទាំងអស់។ នេះជាចំណុចធំណាស់ដែលបង្ហាញនូវការភូតកុហករបស់ថៃនៅចំពោះមុខអង្គការយូណេស្កូ ចំពោះមុខគណៈកម្មការបេតិកភណ្ឌពិភពលោក។
លោកឧបនាយករដ្ឋមន្ត្រីបញ្ជាក់ថា នេះហើយភាគីថៃដើរទៅជាន់សំបកចេករអិលដួលជាការអាម៉ាស់ណាស់ គេមិនអាចលាក់ជិតទេ ព្រោះកម្ពុជាបានថតធ្វើឯកសារច្រើនណាស់ ធ្វើស្ប៉ត ធ្វើឌីវីឌី បង្ហាញអំពីការការវាយលុកឈ្លានពានរបស់ថៃ បង្ហាញអំពីគ្រាប់ផ្លោងចំនួន៤១៤គ្រាប់ បានថតរូបភាពបង្ហាញអំពីស្លាកស្នាមនៅនឹងជញ្ជាំងប្រាសាទស្តីពីការបាញ់ គ្រាប់ធំៗក្បែរប្រាសាទ ការប្រេះប្រាសាទ ។ ដូច្នេះការភូតកុហករបស់ថៃ គឺជាចំណុចខ្សោយខ្លាំងណាស់ នៅក្នុងការងារការទូតរបស់ថៃ ។ ហេតុអ្វីបានជាភាគីថៃភូតអ៊ីចឹង? ព្រោះថៃចង់ទប់ស្កាត់ថា អត់មានខូចអ្វីទេ មិនចាំបាច់ឱ្យមនុស្សមកជួសជុល ។
ចំណុចទី២-លោកឧបនាយករដ្ឋមន្ត្រីបានបកស្រាយទៀតថា ថៃចង់បានការបម្រើនយោបាយការទូតជាយុទ្ធសាស្ត្ររបស់ខ្លួនថា កម្ពុជា-ថៃចរចាគ្នាតែពីរនាក់បានហើយមិនបាច់មាន UN ក្រុមប្រឹក្សាសន្តិសុខ មិនបាច់មានយូណេស្កូ មិនបាច់មានអាស៊ាន មកលូកដៃទេ ។ រហូតមកដល់បច្ចុប្បន្នឥរិយាបថរបស់ថៃគឺអវិជ្ជមានណាស់ ។ អាស៊ានស្នើបញ្ជូនអ្នកសង្កេតការណ៍មកថៃរករឿង ទប់ស្កាត់រហូត ក្រុមប្រឹក្សាសន្តិសុខ ក៏ភាគីថៃមិនចង់ឱ្យចូលពាក់ព័ន្ធ មានទៅដល់យូណេស្កូថា អត់ខូចខាតអ្វីទេ កុំឱ្យគេចូលពាក់ព័ន្ធ ។
ចំពោះចំណុចនេះថៃនិយាយខុសទៀត ចំពោះលទ្ធផលជាក់ស្តែងគឺវាពុំអីុចឹងទេ ។ សូម្បីនៅក្នុងកិច្ចពិភាក្សានៅក្រោយខ្នងរបស់ខ្ញុំឃើញហើយទង់ជាតិអង្គការសហប្រជាជាតិ ថៃ-កម្ពុជា នេះហើយគឺវាពុំមែនការចរចាទ្វេភាគីទេ។ នៅក្នុងពេលនោះដែរ ថៃចង់ស្នើឱ្យយូណេស្កូចេញក្រៅឱ្យមានតែកម្ពុជា-ថៃបានហើយ។ ប៉ុន្តែការស្នើរបស់ថៃនោះ គឺគេអត់ស្តាប់ថៃទេ ការស្នើនេះ គឺកាន់តែធ្វើឱ្យគេលើកកម្ពស់ គឺលោកជំទាវអគ្គនាយកគាត់អញ្ជើញចូលផ្ទាល់ ជាមនុស្សទី១របស់អង្គការយូណេស្កូគាត់សុខចិត្ត ចំណាយពេល៣ដង ទាំង៣ថ្ងៃចូលរួម ទោះជាគាត់រវល់យ៉ាងណាក៏ដោយ ចូលជួបប្រជុំរវាងកម្ពុជា-ថៃ ។ ដូច្នេះចំណុចនេះយើងឃើញកាន់តែច្បាស់ គឺជាយន្តការនៃការជួបគ្នារវាងកម្ពុជា-ថៃ ដោយមានការចូលរួម ពីមនុស្សទី១ របស់អង្គការយូណេស្កូ ។
ចំណុចទី៣-លោកឧបនាយករដ្ឋមន្ត្រីមានប្រសាសន៍បកស្រាយថា ថៃចង់ធ្វើការឃោសនា ដើម្បីអួតក្អេងក្អាងថា ខ្លួនទៅស្នើដកយកផែនការគ្រប់គ្រងដែលកម្ពុជាដាក់ប្រាសាទទុកជាមិនបានការត្រូវយកមកកែវិញ ហើយដាក់ទៅវិញ សាជាថ្មី ។
លោកជំទាវអគ្គនាយកបានបញ្ជាក់ថា អត់មានគោលការណ៍ដកផែនការគ្រប់គ្រងប្រាសាទព្រះវិហារទេ ។ លោកជំទាវបញ្ជាក់ពីរដង ។ យូណេស្កូយកសេចក្តីពង្រាងនៃការសម្រេចគណៈកម្មការបេតិកភណ្ឌដែលនឹងត្រូវធ្វើការសម្រេចចន្លោះពីថ្ងៃទី១៩ ដល់ថ្ងៃទី២៩ មិថុនា ថៃនិយាយអត់ចេញ ។
លោកឧបនាយករដ្ឋមន្ត្រីសុខ អាន បានគូសបញ្ជាក់ទៀតថា នេះជាការប្រជុំជាលើកទី១ ដែលមានលក្ខណៈកម្ពុជា-ថៃជជែកដោយមានអាជ្ញាកណ្តាល គឺអគ្គនាយកអង្គការយូណេស្កូតែម្តង ។ ដូច្នេះទឡ្ហីករណ៍ត្រូវឆ្លើយឆ្លងគ្នាជាប់តែម្តង ។ ថៃគឺអត់មានទឡ្ហីករណ៍អ្វីមកជជែកតទល់ជាមួយកម្ពុជាបានទេ គឺហាក់ដូចជានិយាយបានថា ដូចជាបាក់ទ័ពអ៊ីចឹង ។ នៅក្នុងការជជែកនោះនៅក្នុងគោលដៅទាំង៣ហ្នឹង ដែលចង់ទប់ស្កាត់នោះ ។ ដល់ពេលចំណុចដែលគេលើកឡើងថា គណៈកម្មការបេតិកភណ្ឌយូណេស្កូ ត្រូវតែចាត់បញ្ជូនក្រុមអ្នកជំនាញឱ្យបានឆាប់បំផុត ដើម្បីសិក្សា និងធ្វើការជួសជុលប្រាសាទព្រះវិហារ ។ ចំណុចនេះថៃអត់ចង់ព្រមនូវចំណុចនោះ តែគាត់អត់មានទឡ្ហីករណ៍អ្វីឡើយ ។ លោកជំទាវអគ្គនាយកបានបញ្ជាក់ថា ពេលនេះលោកមិនព្រម លុះដល់ពេលប្រជុំគណៈកម្មការពេញអង្គប្រហែលមានសរសេរជាងនេះទៅទៀត ព្រោះប្រាសាទខូចគេមិនត្រូវទុកចោលអត់មកជួសជុលទេ ។
លោកឧបនាយករដ្ឋមន្ត្រីសង្កត់ធ្ងន់ថា នេះជាចម្លើយហើយ ដែលថៃថា អត់មានខូចខាតទេ។ គំនិតទាំង៣របស់ថៃគឺពុំបានជោគជ័យទេ ព្រោះកម្ពុជាយើងអត់មានបញ្ហាអ្វីក្រៅពីបញ្ជាក់ថា នៅវេទិកាយូណេស្កូនេះ គឺមិននិយាយពីបញ្ហាព្រំដែន ។ តែថៃនៅតែទន្ទេញហើយទន្ទេញទៀតថា GBC មានហើយទុកឱ្យ GBC ប្រជុំវិញទៅ ចាំ GBC វាស់ព្រំដែនហើយចាំនិយាយពីប្រាសាទព្រះវិហារ ។
ករណីនេះ អង្គការយូណេស្កូមិនព្រមទេ ព្រោះផែនការគ្រប់គ្រងប្រាសាទព្រះវិហារដែលធំបំផុតគឺការថែរក្សាប្រាសាទ អភិរក្សប្រាសាទសហប្រតិបត្តិការអន្តរជាតិ ។ លើសពីនោះគឺការអភិវឌ្ឍប្រកបដោយចីរភាព អភិវឌ្ឍកុំឱ្យមានផលប៉ះពាល់ទៅដល់ប្រាសាទដែលជាបេតិកភណ្ឌជាតិ បេតិកភណ្ឌរបស់ពិភពលោក ។ ចំណុចសំខាន់នៃផែនការគ្រប់គ្រងគឺដូច្នេះ។ នៅក្នុងសម័យព័ត៌មានវិទ្យាទៅហើយ ការផ្តល់ព័ត៌មានមានសភាពលឿនណាស់ កម្ពុជាមានរូបភាពពិត វីដេអូ ស្ប៉ត ហើយបែរជាថៃទៅកុហកគេ គេម៉េចនឹងជឿថៃ ។
ទាក់ទិននឹងរចនាសម្ព័ន្ធរបស់យូណេស្កូ និងស្ថាប័នជំនាញផ្សេងៗពាក់ព័ន្ធទៅនឹងការអភិរក្ស និងការអភិវឌ្ឍប្រកបដោយចីរភាពស្តីពីការចុះបញ្ជីបេតិកភណ្ឌ លោកឧបនាយករដ្ឋមន្ត្រីសុខ អាន បានមានប្រសាសន៍ថា ជាធម្មតាយូណេស្កូ ក៏ដូចជាស្ថាប័នផ្សេងៗទាំង៥របស់ UN ដូច្នេះយូណេស្កូជាស្ថាប័នធំដែលមានសមាជិករហូតដល់១៩៣ប្រទេស ក្នុងនោះមានស្ថាប័នជំនាញផ្សេងៗច្រើនមានខាងអប់រំ ព័ត៌មាន វិទ្យាសាស្ត្រ បច្ចេកវិទ្យានៃផ្នែកមួយៗដូចជាផ្នែកវប្បធម៌នេះជាផ្នែកមួយសំខាន់ជាងគេ ព្រោះសព្វថ្ងៃនេះ ផ្នែកនេះមាននិន្នាការមួយឈានឡើងខ្លាំងណាស់ អំពីបេតិកភណ្ឌនេះ ។ ដូច្នេះការថែរក្សាបេតិកភណ្ឌរបស់មនុស្សជាតិដែលជាភ័ស្តុតាងមួយដ៏ធំបំផុតនៃវប្បធម៌ជាតិរបស់ប្រទេសនីមួយៗ ជាភ័ស្តុតាងសម្ភារជាក់ស្តែងរបស់វប្បធម៌ផ្សេងៗ នៅលើសាកលលោក ។
ដូច្នេះក្នុងផ្នែកបេតិកភណ្ឌនេះ យូណេស្កូ គឺមានស្ថាប័នជំនាញមួយចំនួនខាងថែរក្សាប្រាសាទច្រើនណាស់ ដែលមាននៅក្នុងអង្គការយូណេស្កូនោះ ។ ហើយមានស្ថាប័នមួយទៀតដែលអ្នកហ្វឹកហ្វឺនបណ្តុះបណ្តាលអ្នកជំនាញដែលពាក់ព័ន្ធបុរាណវត្ថុវិទ្យា ស្ថាបត្យកម្មផ្នែកប្រាសាទ ពាក់ព័ន្ធវិស្វកម្មប្រាសាទ ។ ធម្មតាអ្នកជំនាញទាំងនោះហើយដែលគេជួយផ្តល់យោបល់ដែលប្រទេសនីមួយៗគេសុំសហប្រតិបត្តិការពីអ្នកជំនាញទាំងនោះ វិធីសាស្ត្រថ្មីៗយ៉ាងដូចម្តេច បច្ចេកវិទ្យាយ៉ាងម៉េច ដូចជាគេបានមកអនុវត្តនៅប្រាសាទអង្គររបស់យើងរយៈពេលប៉ុន្មានឆ្នាំកន្លងមក ដើម្បីធ្វើយ៉ាងម៉េចឱ្យការងារអភិរក្សាឱ្យមានលក្ខណៈវិទ្យាសាស្ត្រ លក្ខណៈបច្ចេកវិទ្យា ប៉ុន្តែរក្សាបាននូវអ្វីដែលមានភាពដើមរបស់បេតិកភណ្ឌ ។
លោកឧបនាយករដ្ឋមន្ត្រីបញ្ជាក់ថា យូណេស្កូ ស្ថាប័នមានទូលំទូលាយណាស់ ក្នុងការជួយអភិរក្ស ។ ដូច្នេះ នៅក្នុងបញ្ហាជំនាញ ហើយមានទំនាស់យោធាថៃឈ្លានពានមកលើទឹកដីយើង យូណេស្កូមិនមែនជាស្ថាប័នដែលមានសមត្ថកិច្ចនិយាយការងារសន្តិសុខ កងទ័ពទេ គឺភារកិច្ច ក្រុមប្រឹក្សាសន្តិសុខអ.ស.ប ត្រូវអគ្គលេខាធិការដ្ឋានអ.សប ។ ពេលនោះយូណេស្កូគាត់ទាក់ទងអគ្គលេខាធិការអ.ស.ប ក្រុមប្រឹក្សា សន្តិសុខ ធ្វើយ៉ាងម៉េចគឺឱ្យមានការបង្កលក្ខណៈ ដើម្បីថែរក្សាប្រាសាទបាន ។ គឺធ្វើម៉េចបំបាត់មូលហេតុ ដែលអាចឱ្យមានការបំផ្លិចបំផ្លាញប្រាសាទទៀតនៅពេលអនាគត ។
យូណេស្កូគឺមិនមែនជាកន្លែងដែលជជែកគ្នា អំពីបញ្ហាព្រំដែន មិនមែនត្រូវជជែកពីនយោបាយ គឺគេប្រមូលផ្តុំជជែកគ្នាអំពីបញ្ហាជំនាញ បញ្ហាបច្ចេកវិទ្យា បញ្ហាវិទ្យាសាស្ត្រ ដែលការងារបេតិកភណ្ឌត្រូវធ្វើយ៉ាងណារក្សាឱ្យបានល្អ អភិវឌ្ឍរបៀបយ៉ាងម៉េច កុំឱ្យមានផលប៉ះពាល់អវិជ្ជមានទៅលើបេតិកភណ្ឌនេះ ។ ការវាយប្រហារដោយកម្លាំងទ័ពត្រូវឈានទៅដល់ក្រុមប្រឹក្សាសន្តិសុខអង្គការសហប្រជាជាតិដែលគេបានគាំទ្រឱ្យប្រធានអាស៊ានខិតខំធ្វើយ៉ាងណាដោះស្រាយបញ្ហាផ្តល់នូវដំណោះស្រាយបញ្ហាមួយដ៏សមស្រប ចំពោះការវាយលុករបស់ថៃមកលើកម្ពុជា បញ្ហាព្រំដែនក៏ដូចជាបញ្ហាបេតិកភណ្ឌ ។ នៅក្នុងក្របខណ្ឌយូណេស្កូ អ្វីដែលយើងជំរុញខ្លាំង គឺគណៈកម្មការបេតិកភណ្ឌក៏ដូចជាយូណេស្កូគួរតែខិតខំធ្វើយ៉ាងម៉េច ឱ្យមានអ្នកជំនាញការមកជួសជុលនៅលើទីតាំងប្រាសាទរបស់យើងតែម្តង ៕
ចែករំលែកព័តមាននេះ