ខេត្តស្វាយរៀង ៖ សិក្ខាសាលាស្តីពីការធ្វើឱ្យប្រសើរឡើងនូវប្រសិទ្ធភាពសង្វាក់ផលិតកម្មដំណាំបន្លែ អង្គការសង្គមស៊ីវិល ស្ថាប័នរដ្ឋ វិស័យឯកជន និងតំណាងសហគមន៍បានជួបជុំគ្នានៅសាលប្រជុំឆ្នេរទន្លេភូមិរោងបន្លែ សង្កាត់ស្វាយរៀង ក្រុងស្វាយរៀង កាលពីថ្ងៃទី២៦ ឧសភា ដោយមានអ្នកចូលរួមជិត២០០នាក់
ខេត្តស្វាយរៀង ៖ សិក្ខាសាលាស្តីពីការធ្វើឱ្យប្រសើរឡើងនូវប្រសិទ្ធភាពសង្វាក់ផលិតកម្មដំណាំបន្លែ អង្គការសង្គមស៊ីវិល ស្ថាប័នរដ្ឋ វិស័យឯកជន និងតំណាងសហគមន៍បានជួបជុំគ្នានៅសាលប្រជុំឆ្នេរទន្លេភូមិរោងបន្លែ សង្កាត់ស្វាយរៀង ក្រុងស្វាយរៀង កាលពីថ្ងៃទី២៦ ឧសភា ដោយមានអ្នកចូលរួមជិត២០០នាក់។
លោកស្រីពៅ ធីតា អនុប្រធានមន្ទីរកសិកម្មខេត្តថ្លែងថា សិក្ខាសាលានេះមានគោលបំណងផ្តល់ឱកាសឱ្យគ្រប់ភាគីពាក់ព័ន្ធចូលរួមពិភាក្សាគ្នាពីការងារអភិវឌ្ឍវិស័យកសិកម្មជាពិសេសដំណាំបន្លែ ទាញចំណាប់អារម្មណ៍ អង្គការសង្គមស៊ីវិល ក្រុមហ៊ុនឯកជន គ្រឹះស្ថានមីក្រូហិរញ្ញវត្ថុក្នុងការគាំទ្រ និងធ្វើឱ្យប្រសើរឡើងនូវប្រសិទ្ធភាពសង្វាក់ផលិតកម្មដំណាំបន្លែ ស្វែងយល់ពីបញ្ហានានាដែលនាំឱ្យកសិករមានការស្ទាក់ស្ទើរក្នុងការដាំបន្លែ។ ពង្រឹងសហការគ្រប់ភាគីពាក់ព័ន្ធទាំងអស់ដើម្បីគាំទ្រ និងដោះស្រាយបញ្ហានានារបស់កសិករក្នុងផលិតកម្មបន្លែ។
លោកស្រីបន្តទៀតថា ដើម្បីអនុវត្តការងារទទួលបានជោគជ័យ និងមាននិរន្តរភាពលុះត្រាតែមានការសហការគ្នាល្អរវាងអន្តរស្ថាប័នរដ្ឋ អង្គការជាតិ អន្តរជាតិ ជាមួយកសិករ និងវិស័យឯកជនដើម្បីជជែកពិភាក្សាគ្នារិះរកគ្រប់មធ្យោបាយដើម្បីធ្វើឱ្យវិស័យកសិកម្មមានការរីកចំរើនឈានទៅរកការកាត់បន្ថយភាពក្រីក្រ។
តំណាងសមាគមផ្គត់ផ្គង់បន្លែបានមានមតិថា កន្លងមកប្រជាកសិករនៅមានការស្ទាក់ស្ទើរក្នុងការដាំបន្លែដោយសារប្រជាកសិករមួយចំនួនខ្វះដើមទុន ខ្វះបច្ចេកទេស ជាពិសេសគឺគ្មានទីផ្សារ ដូច្នេះទើបប្រជាកសិករស្ទាក់ស្ទើរក្នុងការដាំបន្លែ។ មន្ទីរកសិកម្មខេត្តបានសហការជាមួយអង្គារ IVY គាំទ្របង្កើតជាសមាគមដើម្បីផ្គត់ផ្គង់ទីផ្សារ ដោយសមាគមប្រមូលទិញបន្លែពីសមាជិកយកទៅលក់ឱ្យកាស៊ីណូបាវិត៣ដងក្នុងមួយសប្តាហ៍ ។ ទោះបីជាបែបណាក្តី ក៏នៅតែត្រូវការបន្លែជាច្រើនទៀតដើម្បីផ្គត់ផ្គង់ និងតំរូវឱ្យបង្កើនសមាជិកអនុវត្តគោលនយោបាយភូមិមួយផលិតផលមួយ បន្លែធម្មជាតិ ។ កសិករសុំឱ្យស្ថាប័នក្រុមហ៊ុនឯកជន គ្រឹះស្ថានមីក្រូហិរញ្ញវត្ថុជួយគាំទ្រលើវិស័យដំណាំបន្លែនេះ ដោយសារបច្ចុប្បន្នទីផ្សារក្នុងខេត្តនៅខ្វះបន្លែ មិនទាន់ផ្គត់ផ្គង់បាននៅឡើយ។
លោកសុខ សុថា នាយកសហព័ន្ធស៊ីហាបបានធ្វើបទបង្ហាញថា ជាការពិតណាស់កសិករត្រូវការឱ្យអ្នកពាក់ព័ន្ធទាំងអស់ផ្តល់អនុសាសន៍ក្នុងកិច្ចពិភាក្សានេះដើម្បីរកដំណោះស្រាយ។ នៅលើពិភពលោកមនុស្សរាប់លាននាក់ខ្វះស្បៀងអាហារ ហើយនៅកម្ពុជាខ្វះបន្លែត្រូវការជួយទាំងបច្ចេកទេស ជួយរកគ្រាប់ពូជល្អ ជាពិសេសរកទីផ្សារ ដូច្នេះហើយទើបបង្កើតឱ្យមានសិក្ខាសាលានេះ។ សហព័ន្ធស៊ីហាបគាំទ្រដល់សមាគមកសិករក្នុងការផលិតផលិតផលកសិកម្មហើយសង្ឃឹមថា នឹងមានការផ្តល់ក្តីសង្ឃឹមដល់
កសិករ។
អ្នកស្រីសុខ វ៉ាន់ការ កសិករភូមិសំរោង ឃុំឈើទាល ស្រុកស្វាយជ្រំបានបង្ហាញបទពិសោធន៍ប្រកបដោយជោគជ័យលើការផលិតបន្លែដោយសមាជិកក្រុមដាំបន្លែបង្វិលគ្នា ហើយឱ្យសមាជិកម្នាក់ ប្រមូលបន្លែទៅឱ្យអង្គការ IVY និងមន្ទីរកសិកម្មដឹកបញ្ជូនឱ្យកាស៊ីណូ។ ការពិភាក្សាជាក្រុមលទ្ធផលឃើញថា កសិករនៅក្រៅក្រុមពេលបន្លែទីផ្សារឡើងថ្លៃមិនលក់ឱ្យសមាគម ដូច្នេះសមាគមខ្វះខាតបន្លែផ្គត់ផ្គង់ឱ្យកាស៊ីណូត្រូវទិញបន្លែតាមទីផ្សារខុសកុងត្រា ។ បញ្ហានេះត្រូវបង្កើនសមាជិកទើបអាចធានាតម្លៃបាន ៕
ចែករំលែកព័តមាននេះ