តាមប្រភពពី BBC ផ្សាយថា តុលាការកំពូលសិង្ហបុរីបានសម្រេចការដាក់ទោសស្របច្បាប់នៃការកាត់ក្តីរបស់សាលាឧទ្ធរណ៍ដាក់ពន្ធនាគារ លោកអាឡាន់ ឆាដ្រេក អ្នកនិពន្ធជនជាតិអង់គ្លេសរយៈពេល៦សប្តាហ៍ ពីបទប្រមាថលើប្រព័ន្ធតុលាការយុត្តធម៌របស់សិង្ហបុរីរួមទាំងពិន័យជាប្រាក់ចំនួន១៦.៥១០ដុល្លារ ពីការសរសេរសៀវភៅឈ្មោះ« Once Ajolly Hangman: Singapore Justic In The Dock » ដែលចោទប្រកាន់ការប្រើច្បាប់របស់សិង្ហបុរីខ្វះយុត្តិធម៌ ។
ទោះជាយ៉ាងណា ខាងផ្នែកអង្គការសិទ្ធិមនុស្សបង្ហាញពីប្រតិកម្មអស់សង្ឃឹមចំពោះការសម្រេចចិត្តខាងលើដោយបញ្ជាក់ថា តុលាការសិង្ហបុរីគួរតែដកចេញដំណើរការរឿងក្តីចំពោះលោកឆាដ្រេក ដោយនិយាយថា ការដាក់ទោសលោកឆាដ្រេក ដែលមិនបានធ្វើអ្វីច្រើនជាងការទាមទារឱ្យមានការកែទម្រង់ច្បាប់ ចាត់ទុកថាជាការខូចខាតដល់ការនិយាយស្តីតាមបែបសេរីនៅសិង្ហបុរី ។
នៅក្នុងរបាយការណ៍បញ្ជាក់ទៀតថា លោកឆាដ្រេក ដែលកន្លងមកស្នាក់នៅប្រទេសសិង្ហបុរី ត្រូវបានចាប់ខ្លួនកាលពីខែកក្កដាបន្ទាប់ពីលោកធ្វើដំណើរទៅសិង្ហបុរី ដើម្បីឃោសនាផ្សព្វផ្សាយសៀវភៅរបស់ខ្លួន ។ សៀវភៅខាងលើបានប្រមូលផ្តុំទស្សនៈរបស់អ្នកជំនាញផ្នែកសិទ្ធិមនុស្ស មេធាវី អតីតប៉ូលិស រួមទាំងអតីតមន្ត្រីប្រហារជីវិតអ្នកទោសប្រចាំពន្ធនាគារ ឆាងគី របស់សិង្ហបុរី ។
អតីតមន្ត្រីប្រហារជីវិតបានគូសបញ្ជាក់ថា គេបានប្រហារជីវិតអ្នកទោសបុរស-ស្ត្រីជាច្រើននាក់ ចាប់តាំងពីឆ្នាំ១៩៥៩ រហូតដល់ពេលចូលនិវត្តន៍ក្នុងឆ្នាំ២០០៦ ៕
ចែករំលែកព័តមាននេះ