រាជធានីភ្នំពេញ ៖ ចាប់ផ្តើមពីការចូលរួមដោយចៃដន្យរបស់អ្នកស្ម័គ្រចិត្តម្នាក់មកពីអង្គការអាមេរិកខេន ភីសខប ឥឡូវនេះ ក្រុមសិស្សានុសិស្សនិងគ្រូបង្រៀនជាង២.០០០នាក់ មកពីខេត្តផ្សេងៗគ្នា បានចូលរួមជាបន្តបន្ទាប់ក្នុងកម្មវិធីទស្សនកិច្ចសិក្សាដែលរៀបចំដោយផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា
រាជធានីភ្នំពេញ ៖ ចាប់ផ្តើមពីការចូលរួមដោយចៃដន្យរបស់អ្នកស្ម័គ្រចិត្តម្នាក់មកពីអង្គការអាមេរិកខេន ភីសខប ឥឡូវនេះ ក្រុមសិស្សានុសិស្សនិងគ្រូបង្រៀនជាង២.០០០នាក់ មកពីខេត្តផ្សេងៗគ្នា បានចូលរួមជាបន្តបន្ទាប់ក្នុងកម្មវិធីទស្សនកិច្ចសិក្សាដែលរៀបចំដោយផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា។
កាលពីថ្ងៃទី២០ មករា លោកលី ចេ អ្នកស្ម័គ្រចិត្តរបស់អង្គការអាមេរិកខេន ភីសខប ដែលកំពុងបំពេញការងារនៅស្រុកវាលរេញ ខេត្តព្រះសីហនុ បានចូលរួមក្នុងដំណើរទស្សនកិច្ចសិក្សាមួយដែលរៀបចំដោយផ្នែកកិច្ចការសាធារណៈនៃ អ.វ.ត.ក។ មួយខែក្រោយលោក លី ចេ បាននាំសិស្ស និងគ្រូចំនួន៥១០នាក់មកពីវិទ្យាល័យ ហ៊ុន សែន វាលរេញ ចូលរួមក្នុងដំណើរទស្សនកិច្ចដូចគ្នា។
នៅក្នុងលិខិតផ្ញើជូនផ្នែកកិច្ចការសាធារណៈនៃ អ.វ.ត.ក នាពេលក្រោយមក លោកលី ចេ បានសង្កត់ធ្ងន់ថា «ខ្ញុំសូមថ្លែងអំណរគុណលោកជាថ្មីម្តងទៀតដែលបានផ្តល់ឱកាសនេះដល់សិស្សរបស់ខ្ញុំ។ នេះគឺជាបទពិសោធន៍ដ៏មានតម្លៃសម្រាប់សិស្សរបស់ខ្ញុំ ក៏ដូចជាសម្រាប់រូបខ្ញុំផ្ទាល់ដែលបានឃើញសិស្សរបស់ខ្ញុំចាប់អារម្មណ៍ និងមានភាពសប្បាយរីករាយក្នុងអំឡុងដំណើរទស្សនកិច្ចសិក្សានេះ»។ «ខ្ញុំគ្មានអ្វីក្រៅពីកោតសរសើរដល់ អ.វ.ត.ក ចំពោះបដិសណ្ឋារកិច្ចដ៏កក់ក្តៅចំពោះយើងខ្ញុំ។ ខ្ញុំមានអារម្មថាមានកំហុសដែលពុំបានជួយច្រើនក្នុងការរៀបចំដំណើរទស្សនកិច្ចនេះ ប៉ុន្តែការធ្វើបែបនេះគឺជាឱកាសដ៏ពិសេសឲ្យប្រជាជនក្នុងសហគមន៍បានចូលរួមក្នុងការរៀបចំគម្រោងនេះដោយខ្លួនគាត»។ លោកលី ចេ បន្ថែម។ ពាក្យសរសើរត្រូវបាននិយាយតគ្នាពីមាត់មួយទៅមាត់មួយក្នុងចំណោមអ្នកស្ម័គ្រចិត្តរបស់អង្គការអាមេរិកខេន ភីសខប អំពីគុណប្រយោជន៍នៃដំណើរទស្សនកិច្ចនេះ និងអំពីឱកាសដែលអាចឲ្យសិស្សានុសិស្សទទួលបានចំណេះដឹងទូលំទូលាយអំពីសង្គមទាំងមូល។
នៅថ្ងៃទី២៦ ខែឧសភា សិស្សនិងគ្រូចំនួន ៣៥៩នាក់ មកពីវិទ្យាល័យ ហ៊ុន សែន ឈូក បានមកធ្វើទស្សនកិច្ចសិក្សាដែលរៀបចំទៅតាមសំណូមពររបស់អ្នកស្រី ជេនីហ្វឺ អូហ្សាវ៉ា ហាន់សុន ជាអ្នកស្ម័គ្រចិត្តនៃអង្គការអាមេរិកខេន ភីសខប ប្រចាំនៅស្រុកឈូក ខេត្តកំពត។ អ្នកស្រី ជេនីហ្វឺ បានឲ្យដឹងថា គាត់បានឮលោកលី ចេ សហការីរបស់គាត់ ពោលសរសើរអំពីដំណើរទស្សកិច្ចនេះ ហើយខ្លួនគាត់ផ្ទាល់ក៏យល់ស្របថានេះជាឱកាសដ៏ប្រពៃដែលអាចឲ្យសិស្សរបស់គាត់មានឱកាសរៀនសូត្រអំពីប្រវត្តិសាស្រ្តរបបខ្មែរក្រហម និងអំពីដំណើរការកាត់សេចក្តីទៅលើរបបនេះ។ ជាងនេះទៅទៀត នេះក៏ជាឱកាសឲ្យសិស្សបានធ្វើដំណើរឆ្ងាយពីសហគមន៍របស់ខ្លួន និងស្វែងយល់ពីអ្វីដែលទូលំទូលាយជាងមុន។
សិស្សនិងគ្រូដែលចូលរួមបានទស្សនាសារមន្ទីរទួលស្លែង (អតីតមន្ទីរ ស-២១) បន្ទាប់មកធ្វើដំណើរមកកាន់សាលសវនាការរបស់ អ.វ.ត.ក ដែលនៅទីនោះទាំងអស់គ្នាបានអង្គុយក្នុងសាលសវនាការ និងស្តាប់ប្រសាសន៍របស់លោកឌឹម សុវណ្ណារុំ មន្ត្រីទទួលបន្ទុកផ្នែកកិច្ចការសាធារណៈដែលជម្រាបជូនអំពីរចនាសម្ព័ន្ធរបស់តុលាការ អំពីដំណើរការនីតិវិធីនិងអំពីការវិវឌ្ឍន៍ទូទៅរបស់តុលាការ។
នៅមុនពេលបន្តដំណើរទៅទស្សនាវាលពិឃាតជើងឯកជាមួយក្រុមសិស្សានុសិស្ស អ្នកស្រី ជេនីហ្វឺ បានគូសបញ្ជាក់ថា «ខ្ញុំសង្ឃឹមថា ដំណើរទស្សនកិច្ចនៅពេលនេះគឺជាជំហានចាប់ផ្តើមដែលទាក់ទាញចំណាប់អារម្មណ៍របស់សិស្សទៅលើប្រធានបទខ្មែរក្រហម និងបន្តស្រាវជ្រាវស្វែងយល់បន្ថែមទៀតទៅលើប្រធានបទនេះ។ ថ្ងៃនេះខ្ញុំសង្កេតឃើញថា សិស្សយកចិត្តទុកដាក់ស្តាប់ និងកត់ត្រានូវអ្វីដែលគាត់បានឃើញនិងបានឮនៅគុកទួលស្លែង និងនៅសាលសវនាការ។ ខ្ញុំដឹងថា គ្រូៗរបស់គាត់បានដាក់ការងារមួយចំនួនឲ្យពួកគាត់ធ្វើពេលត្រឡប់ទៅវិញ។ នេះជាសញ្ញាវិជ្ជមាននៃការវិវឌ្ឍន៍ចំណេះដឹងរបស់សិស្ស ហើយខ្ញុំជឿជាក់ថា នឹងមានការពិភាក្សាទៅលើប្រធានបទនេះជាបន្តទៀត ហើយការពិភាក្សានេះមានប្រយោជន៍ច្រើន ជាពិសេសសម្រាប់សិស្សដែលត្រូវប្រឡងបញ្ចប់ថ្នាក់វិទ្យាល័យនៅឆ្នាំនេះ។ ខ្ញុំក៏មានសង្ឃឹមដែរថា នឹងមានដំណើរទស្សនកិច្ចលើកក្រោយៗទៀតសម្រាប់សិស្សរបស់ខ្ញុំដែលពុំទាន់មានឱកាសបានចូលរួមនៅឡើយ»។
ចន្លោះពីខែមីនាដល់ខែឧសភា ឆ្នាំ២០១១ នេះ សិស្សនិងគ្រូជាង២.០០០នាក់ហើយ ដែលមកពីខេត្តបន្ទាយមានជ័យ កំពង់ចាម កំពត និងខេត្តព្រះសីហនុ បានចូលរួមក្នុងកម្មវិធីទស្សនកិច្ចសិក្សារបស់ អ.វ.ត.ក តាមសំណូមពររបស់អ្នកស្ម័គ្រចិត្តនៃអង្គការអាមេរិកខេន ភីសខប។
យោងតាមការឲ្យដឹងរបស់លោកចិន ហែមវិចិត្រ អ្នកសម្របសម្រួលកម្មវិធីផ្សព្វផ្សាយរបស់ផ្នែកកិច្ចការសាធារណៈនៃ អ.វ.ត.ក បានឲ្យដឹងថា រហូតមកដល់ពេលនេះ លោកបានទទួលសារអេឡិកត្រូនិច និងទូរស័ព្ទពីអ្នកស្ម័គ្រចិត្តនៃអង្គការអាមេរិកខេន ភីសខប មកពីគ្រប់២៤ខេត្តក្រុងទូទាំងព្រះរាជាណាចក្រកម្ពុជា ដែលស្នើសុំឲ្យ អ.វ.ត.ក រៀបចំកម្មវិធីទស្សនកិច្ចសិក្សាសម្រាប់សិស្សនៅសាលារបស់ខ្លួន ហើយឥឡូវនេះលោកកំពុងតែរៀបចំកម្មវិធីទៅតាមសំណូមពរ។ ក្រៅពីនេះ អ.វ.ត.ក ក៏នៅតែបន្តកម្មវិធីទស្សនកិច្ចសិក្សាសម្រាប់ប្រជាពលរដ្ឋទូទៅ និងសម្រាប់សាលារៀនផ្សេងៗទៀតទៅតាមសំណើសុំ៕
ចែករំលែកព័តមាននេះ