ខេត្តបាត់ដំបង ៖ យុវជន២នាក់ស្លា.ប់នៅនឹងកន្លែងកើតហេតុ និង២នាក់ទៀតរងរបួសធ្ងន់ក្នុងឧប្បត្តិហេតុគ្រោះថ្នាក់ចរាចររវាងអ្នកជិះម៉ូតូ និងរថយន្តកាលពីវេលាម៉ោង៨ និង៣០នាទីយប់ ថ្ងៃទី២៨ ឧសភា លើផ្លូវជាតិលេខ៥៧ក្នុងភូមិចែងក្តារ ឃុំភ្នំសំពៅ ស្រុកបាណន់។ មន្ត្រីនគរបាលមូលដ្ឋាននិយាយថា
ខេត្តបាត់ដំបង ៖ យុវជន២នាក់ស្លាប់នៅនឹងកន្លែងកើតហេតុ និង២នាក់ទៀតរងរបួសធ្ងន់ក្នុងឧប្បត្តិហេតុគ្រោះថ្នាក់ចរាចររវាងអ្នកជិះម៉ូតូ និងរថយន្តកាលពីវេលាម៉ោង៨ និង៣០នាទីយប់ ថ្ងៃទី២៨ ឧសភា លើផ្លូវជាតិលេខ៥៧ក្នុងភូមិចែងក្តារ ឃុំភ្នំសំពៅ ស្រុកបាណន់។
មន្ត្រីនគរបាលមូលដ្ឋាននិយាយថា គ្រោះថ្នាក់ចរាចរនេះកើតឡើងដោយសារក្រុមយុវជន៤នាក់ជិះម៉ូតូឌុបគ្នាទៅបុករថយន្តកូរ៉េក្នុងទិសដៅបញ្ច្រាសគ្នា បណ្តាលឱ្យអ្នកជិះម៉ូតូ២នាក់ស្លាប់នៅនឹងកន្លែងកើតហេតុ និង២នាក់ទៀតរងរបួសធ្ងន់ ហើយត្រូវរថយន្តសង្គ្រោះរបស់ការិយាល័យចរាចរខេត្តដឹកទៅមន្ទីរពេទ្យភ្លាម។
លោកមី ឆេងលី នាយនគរបាលប៉ុស្តិ៍ឃុំភ្នំសំពៅបានបញ្ជាក់ថា អ្នកស្លាប់មានឈ្មោះរ៉ន សាវី ហៅហ៊ូ អាយុ២៤ឆ្នាំ និងឈ្មោះឈឿន ម៉ុច អាយុ២៥ឆ្នាំ រីឯអ្នករបួសធ្ងន់ឈ្មោះអូន ចាន់ថន អាយុ២២ឆ្នាំ និងឈ្មោះរ៉ន វ៉េត អាយុ២០ឆ្នាំ ទាំង៤នាក់នេះជិះម៉ូតូម៉ាកវ៉េវពណ៌ក្រហមពាក់ស្លាកលេខកំពង់ចាម១F៨៧៤៤។ រីឯរថយន្តដែលម៉ូតូបុកទាំងកំរោលធុនកូរ៉េពាក់ស្លាកលេខភ្នំពេញ២I២១៤៥ របស់ក្រុមហ៊ុនរ័ត្នសម្បត្តិដែលដឹកកូនកៅស៊ូ ហើយអ្នកបើកបរបានរត់គេចខ្លួនបាត់។
តាមការបំភ្លឺពីសាក្សីថា គេឃើញក្រុមអ្នកជិះម៉ូតូជិះពីទិសខាងលិចឆ្ពោះទៅទិសខាងកើត លុះដល់ចំណុចនោះគេឃើញអ្នកជិះម៉ូតូបន្ថែមល្បឿនឡើងជែងរថយន្តធំ១គ្រឿងដែលបើកស្របទិសគ្នា ហើយភ្លាមនោះក្រុមអ្នកជិះម៉ូតូជ្រុលទៅបុករថយន្តកូរ៉េទាំងកំរោល ។
សាច់ញាតិរបស់ជនរងគ្រោះដែលទៅទទួលយកសាកសព លោកអ៊ាក់ មេន អាយុ៥០ឆ្នាំ ប្រាប់ថា ក្រុមយុវជនដែលរងគ្រោះទាំង៤នាក់រស់នៅភូមិគ ឃុំស្នឹង ស្រុកបាណន់។ ពួកគេជិះឌុបគ្នាចេញពីផ្ទះរបស់គាត់ក្នុងគោលបំណងទៅមើលការប្រគំតន្ត្រីនៅក្នុងក្រុងបាត់ដំបង លុះបន្តិចក្រោយមកស្រាប់តែឮថា ជួបគ្រោះថ្នាក់ចរាចរណ៍តែម្តង។
មន្ត្រីនគរបាលចរាចរខេត្តបញ្ជាក់ថា អ្នកជិះម៉ូតូជិះឆ្លងគំនូសលឿងទៅបុករថយន្តកូរ៉េនោះដែលស្ថិតនៅខាងឆ្វេងដៃរបស់ខ្លួន ហើយក្រោយការពិនិត្យកំលាំងជំនាញបាននាំយករថយន្ត និងម៉ូតូទៅកាន់ការិយាល័យដើម្បីដោះស្រាយតាមច្បាប់ ៕
ចែករំលែកព័តមាននេះ