ខេត្តក្រចេះ៖ គួរអោយសោកស្តាយ ខណៈសត្វកន្ទាយក្បាលកង្កែបញី វ័យជំទង់មួយក្បាលទម្ងន់ ២៦គីឡូក្រាម ថែមទាំងមានពង ក្នុងពោះ ត្រូវបានគេប្រទះឃើញងា.ប់ នៅកោះអណ្ដែងខ្ចី ឃុំវឌ្ឍនះ ស្រុកសំបូរ ខេត្តក្រចេះ កាលពីថ្ងៃទី២៣ ខែមករា ឆ្នាំ២០២៤ នេះ។
របាយការណ៍ខណ្ឌជលផលក្រចេះ បញ្ជាក់ថា ការធ្វើកោសល្យវិច្ច័យរបស់មន្រ្តីជំនាញនៃខណ្ឌរដ្ឋបាលជលផលក្រចេះ និងអង្គការ WCS បានសន្និដ្ឋានថា សត្វកន្ធាយក្បាលកង្កែបនេះ ងា.ប់ដោយសារជាប់សន្ទូចរនង ដោយឃើញមានផ្លែសន្ទូចទាក់ជាប់នឹងជើងរបស់វា។
អង្គការ WCS ក៏បានបញ្ជាក់បន្ថែមថា ជាទូទៅ ផ្លែសន្ទូច ដែលមិនបិតនុយងាយទាក់ជាប់សត្វកន្ធាយក្បាលកង្កែបដោយខ្លួនសត្វកន្ធាយប្រភេទនេះ មានលក្ខណៈទន់ ហើយកន្ធាយក្បាលកង្កែប ត្រូវបានចាត់ជាប្រភេទងាយរងគ្រោះ ដោយអនុក្រឹត្យលេខ ១២៣អនក្រ ដូចនេះ ការចាប់ និងជួញដូរជាអំពើខុសច្បាប់។
រដ្ឋបាលជលផល និងអង្គការ WCS សូមអំពាវនាវដល់បងប្អូនប្រជានេសាទ និងបងប្អូននៅតាមមូលដ្ឋាន ចូលរួមថែរក្សាប្រភេទសត្វនេះ ឱ្យបានគង់វង្ស និងចៀសវាងការចាប់ និងជួញដូរខុសច្បាប់ ដោយពុំនោះទេ នឹងត្រូវទទួលទោសតាមច្បាប់ជាធរមាន៕ ដោយ៖ រ៉ូ សាលី
ចែករំលែកព័តមាននេះ