រាជធានីភ្នំពេញ ៖ ស្នូរកាំភ្លើងខ្លីមួយគ្រាប់បានបន្លឺឡើងនៅផ្ទះលេខ១៣៧E1 ផ្លូវលេខ១៣៩ សង្កាត់មនោរម្យ ខណ្ឌ៧មករា បង្កការភ្ញាក់ផ្អើលដល់អ្នករស់នៅជិតខាង ដែលនោះជាការរៀលកៃកាំភ្លើងបណ្តាលឱ្យស្ត្រីម្នាក់រងរបួសធ្លាយកំភួនជើងខាងស្តាំត្រូវនាំចូលមន្ទីរពេទ្យកាល់ម៉ែត ដើម្បីសង្គ្រោះ ។ ហេតុការណ៍នេះបានកើតឡើងកាលពីវេលាម៉ោង៧និង៤៥នាទីព្រឹក ថ្ងៃទី២៧ ឧសភា ។
ស្ត្រីរងគ្រោះដោយសារការរៀលកៃកាំភ្លើងនោះឈ្មោះព្រំ ថាវី អាយុ២២ឆ្នាំ ជាបុគ្គលិកក្លឹបកីឡាស្នួកឃ័រនៅម្តុំផ្លូវត្រសក់ផ្អែម ខណ្ឌដូនពេញ ស្នាក់នៅផ្ទះជួលកើតហេតុ ជាមួយគូស្នេហ៍ឈ្មោះមួង ម៉ាត្រា ភេទប្រុស អាយុ២៤ឆ្នាំ ជាគ្រូបង្ហាត់យោធាក្រាំងចេក ដែលមានឋានន្តរស័ក្តិអនុសេនីយ៍ត្រី ។
ទាក់ទិននឹងករណីផ្ទុះអាវុធដែលថាបណ្តាលមកពីរៀលកៃនោះ ត្រូវបានប្រភពព័ត៌មានពីសមត្ថកិច្ចកងរាជអាវុធហត្ថឱ្យដឹងថា គ្រូបង្ហាត់យោធាសាលា ក្រាំងចេកលោកមួង ម៉ាត្រា និងនារីឈ្មោះព្រំ ថាវី គ្រាន់តែជាគូកំណាន់មិនទាន់ជាប្តីប្រពន្ធទេ ប៉ុន្តែអនាគតទៅពួកគេនឹងក្លាយជាគូស្វាមីភរិយានឹងគ្នា ។ មន្ត្រីកងរាជអាវុធហត្ថបានឱ្យដឹងទៀតថា បានជាមានការអះអាងយ៉ាងដូច្នេះ ពីព្រោះសព្វថ្ងៃពួកគេបានជួលផ្ទះស្នាក់នៅជាមួយគ្នាធម្មតាទៅហើយ ហើយពួកគេកំពុងសន្សំប្រាក់ដើម្បីរៀបការ ។
ហេតុការណ៍បណ្តាលឱ្យមានការរៀលកៃកាំភ្លើងនេះដំបូងលោកអនុសេនីយ៍ត្រី មួង ម៉ាត្រា បានរៀបចំខ្លួនស្លៀកពាក់ឯកសណ្ឋានជាយោធាបម្រុងទៅកាន់កន្លែងធ្វើការ ហើយយកកាំភ្លើងខ្លីម៉ាក K54 ស៊កចូលក្នុងស្រោមជាប់ចង្កេះ ស្រាប់តែរៀលកៃផ្ទុះ១គ្រាប់បណ្តាលឱ្យត្រូវកំភួនជើងស្តាំអនាគតភរិយាតែម្តង ។
ប៉ុន្តែប្រភពអ្នកជិតខាងបានឱ្យដឹងថា នៅពេលលោកមួង ម៉ាត្រា ចេញទៅធ្វើការ គូស្នេហ៍ទាំង២នាក់នេះ មានការឈ្លោះប្រកែកគ្នា ហើយខាងស្រីស្ទុះទៅឆក់យកកាំភ្លើងទំនងមិនចង់ឱ្យលោកមួង ម៉ាត្រា ចេញពីផ្ទះទើបបណ្តាលឱ្យរៀលកៃផ្ទុះ១គ្រាប់ត្រូវកំភួនជើងខ្លួនឯង ។ ទាំងអស់នេះជាប្រភពព័ត៌មានមិនផ្លូវការទេ ព្រោះគូស្នេហ៍ទាំង២នាក់មិនបានប្រាប់អ្វីទាំងអស់ដល់អ្នកកាសែតឡើយ មិនតែប៉ុណ្ណោះពួកគេបែរជាចង់ប្រឈមមុខជាមួយអ្នកយកព័ត៌មាននៅក្នុងមន្ទីរពេទ្យកាល់ម៉ែតទៀតផង ។ កាំភ្លើងខ្លីម៉ាក K54 មួយដើមរបស់លោកស័ក្តិ១រូបនោះត្រូវបានសមត្ថកិច្ចកងរាជអាវុធខេត្តខណ្ឌ៧មករា ដកទុក ហើយនៅពេលខាងស្រីបានធូរស្រាលបន្តិច សមត្ថកិច្ចកងរាជអាវុធហត្ថមានភារកិច្ចអញ្ជើញម្ចាស់កាំភ្លើងទៅសាកសួរ នោះទើបមានព័ត៌មានជាផ្លូវការ ៕
ចែករំលែកព័តមាននេះ