រាជធានីភ្នំពេញ ៖ រថយន្តម៉ាកតូយ៉ូតា ពណ៌ស២បាំងមួយគ្រឿង ដែលគេអះអាងថា អ្នកបើកបរស្រវឹងជោកជាំទើបចេញពីផឹក បានបើកបោះពួយបុកចូលលំនៅឋានប្រជាពលរដ្ឋដែលនៅជាប់ផ្លូវទាំងយប់ បណ្តាលឱ្យម៉ូតូចំនួន៣គ្រឿងរងការខូចខាត ទ្វារកញ្ចក់បែក និងបុរសម្នាក់ឈ្មោះលន់ សំអ៊ុល អាយុ៣០ឆ្នាំ រងរបួសស្រាល
រាជធានីភ្នំពេញ ៖ រថយន្តម៉ាកតូយ៉ូតា ពណ៌ស២បាំងមួយគ្រឿង ដែលគេអះអាងថា អ្នកបើកបរស្រវឹងជោកជាំទើបចេញពីផឹក បានបើកបោះពួយបុកចូលលំនៅឋានប្រជាពលរដ្ឋដែលនៅជាប់ផ្លូវទាំងយប់ បណ្តាលឱ្យម៉ូតូចំនួន៣គ្រឿងរងការខូចខាត ទ្វារកញ្ចក់បែក និងបុរសម្នាក់ឈ្មោះលន់ សំអ៊ុល អាយុ៣០ឆ្នាំ រងរបួសស្រាល ។
គ្រោះថ្នាក់នេះត្រូវសមត្ថកិច្ចឱ្យដឹងថា បានកើតឡើងកាលពីវេលាម៉ោង១០ និង៤០នាទីយប់ ថ្ងៃទី២៦ ឧសភា នៅចំណុចផ្ទះលេខ១២២E ផ្លូវលេខ៥៩៨ សង្កាត់ស្វាយប៉ាក ខណ្ឌប្ញស្សីកែវ ។ រថយន្តនេះបើកបរដោយបុរសឈ្មោះច័ន្ទ សុទ្ធី អាយុ៤៣ឆ្នាំ មានទីលំនៅផ្ទះលេខ១៧១៣ ផ្លូវជាតិលេខ២ សង្កាត់ចាក់អង្រែក្រោម ខណ្ឌមានជ័យ ។
តាមសាក្សីនៅកន្លែងកើតហេតុបានឱ្យដឹងថា រថយន្តម៉ាកតូយ៉ូតា ពណ៌ស២បាំងនោះពាក់ស្លាកលេខបាត់ដំបង 2A 4601 ធ្វើដំណើរតាមផ្លូវជាតិលេខ៥ ក្នុងទិសដៅពីជើងមកត្បូង ។ នៅពេលធ្វើដំណើរមកដល់ចំណុចខាងលើ ក៏បត់ស្តាំដៃតាមផ្លូវលេខ៥៩៨ ប៉ុន្តែដោយសារតែល្បឿនលឿន ក៏ជ្រុលចង្កូតហោះទៅបុកចូលលំនៅឋានខាងឆ្វេងដៃពេញទំហឹង ។ នៅក្នុងហេតុការណ៍នេះ បណ្តាលឱ្យខូចខាតម៉ូតូចំនួន៣គ្រឿងគឺ C100 កូរ៉េចំនួន២គ្រឿង និងម៉ាកស្គូពី ១គ្រឿង ហើយជញ្ជាំងផ្ទះ និងកញ្ចក់ក៏រងការខូចខាតដែរ និងមនុស្សម្នាក់ដែលអង្គុយលេងលើម៉ូតូបានរងរបួស ។
បន្ទាប់ពីកើតមានគ្រោះថ្នាក់នេះគេឃើញអ្នកបើកបរចុះពីលើរថយន្តទាំងស្រវឹងជោកជាំ ។ ភ្លាមៗនោះ សមត្ថកិច្ចបានចុះទៅដល់ហើយនាំយករថយន្តមកកាន់អធិការដ្ឋានខណ្ឌប្ញស្សីកែវ ដើម្បីដោះស្រាយសងការខូចខាត ។
ដោយឡែកមានគ្រោះថ្នាក់ចរាចរណ៍មួយករណីទៀតបានកើតឡើងលើផ្លូវជាតិលេខ៥ ស្ថិតក្នុងសង្កាត់ស្វាយប៉ាក ខណ្ឌប្ញស្សីកែវនេះដែរ បណ្តាលឱ្យបុរសម្នាក់ដែលដើរឆ្លងថ្នល់ស្លាប់បាត់បង់ជីវិតនៅនឹងកន្លែង ហើយម្នាក់ទៀតរងរបួសបញ្ជូនទៅកាន់មន្ទីរពេទ្យ ។ បន្ទាប់ពីកើតមានគ្រោះថ្នាក់ រថយន្តបានបើកគេចទៅបាត់ ដោយពុំមានសាក្សីណាអះអាងថា រថយន្តម៉ាកអ្វីឡើយ ។
ជនរងគ្រោះដោយរថយន្តបុកត្រូវសមត្ថកិច្ចឱ្យដឹងថា ឈ្មោះថន សុភ័ស្ត អាយុ៣១ឆ្នាំ ជាជាងកាត់កញ្ចក់ ស្នាក់នៅផ្ទះជួលក្នុងភូមិស្វាយប៉ាក សង្កាត់ស្វាយប៉ាក ប៉ុន្តែអ្នករងរបួសពុំត្រូវគេស្គាល់ឈ្មោះទេ ។ តាមសាក្សីនៅកន្លែងកើតហេតុបានឱ្យដឹងថា គេឃើញជនរងគ្រោះទាំងពីរនាក់ធ្វើដំណើរឆ្លងផ្លូវពីទិសខាងកើតទៅលិច ខណៈនោះស្រាប់តែមានរថយន្ត ១គ្រឿងពណ៌ខ្មៅ មិនស្គាល់ម៉ាកធ្វើដំណើរមកពីទិសខាងត្បូងបុកជនរងគ្រោះទាំងពីរនាក់ពេញទំហឹងតែម្តង ៕
ចែករំលែកព័តមាននេះ