ខេត្តកំពង់ឆ្នាំង ៖ បុគ្គលិកអគ្គិសនីម្នាក់បានស្លាប់ ពេលដឹកទៅសង្គ្រោះនៅមន្ទីរពេទ្យបង្អែកខេត្តកំពង់ឆ្នាំង បន្ទាប់ពីឡើងបង្គោលដោះខ្សែភ្លើងដើម្បីរំកិលបង្គោល តែសង្ស័យខុសបច្ចេកទេសបណ្ដាលឱ្យឆក់។ ហេតុការណ៍នេះ កើតឡើងកាលពីវេលាម៉ោងប្រមាណ១០និង១០នាទីព្រឹកថ្ងៃទី១៩ ខែមករា ឆ្នាំ២០២៤ ស្ថិតនៅចំណុចព្រែកល្វា ក្នុងភូមិភូមិតាមល់លើ ឃុំកោះថ្កូវ ស្រុកជលគិរី ខេត្តកំពង់ឆ្នាំង ។
សាក្សីនៅកន្លែងកើតហេតុបានឲ្យដឹងថា ជនរងគ្រោះមានឈ្មោះ សុខ តេងភេទប្រុស អាយុ៣៦ឆ្នាំ រស់នៅភូមិទឹកល្អក់ ឃុំក្រាំងលាវ ស្រុករលាប្អៀរ ជាក្រុមការងារអគ្គិសនីខេត្តកំពង់ឆ្នាំង ។
មុនកើតហេតុ ជនរងគ្រោះឡើងទៅលើបង្គោលភ្លើង ដើម្បីដោះខ្សែភ្លើងរំកិលបង្គោលចេញដើម្បីកុំឲ្យទើសផ្លូវប្រជាពលរដ្ឋបើកបរឆ្លងកាត់ពេលនោះ។ ពេលឡើងទៅលើបង្គោល បានប៉ះខ្សែភ្លើងបណ្ដាលឲ្យឆក់ជនរងគ្រោះសន្លប់បាត់ជាប់នៅលើបង្គោលពេលនោះ ក្រុមការងារខាងអគ្គិសនី បាននាំគ្នាឡើងទៅយកជនរងគ្រោះចុះមកដី និងបានដឹកជនរងគ្រោះតាមរថយន្តទៅសង្គ្រោះនៅមន្ទីរពេទ្យបង្អែកខេត្ត តែជាអកុសលជនរងគ្រោះបានស្លាប់បាត់ទៅហើយ ។
ក្រោយពីពិនិត្យសាកសពរួចរាល់ ហើយសមត្ថកិច្ចនគរបាលជំនាញ បានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕
ចែករំលែកព័តមាននេះ