ខេត្តបន្ទាយមានជ័យ ៖ បុរសជាអ្នកបើកបរត្រាក់ទ័រម្នាក់បានស្លា.ប់ភ្លាមនៅនឹងកន្លែងដោយសាររថយន្តបែនដឹកដីបុកត្រាក់ទ័រគាត់ពីក្រោយ ។ ហេតុការណ៍នេះបានកើតឡើងកាលពីវេលាម៉ោង៩និង៥០នាទីយប់ ថ្ងៃទី២០ ឧសភា ឆ្នាំ២០១១ នៅលើផ្លូវជាតិលេខ៦ ត្រង់ចំណុចចន្លោះបង្គោលភ្លើង SKL 0590-0591 ខាងកើតភូមិរហាល
ខេត្តបន្ទាយមានជ័យ ៖ បុរសជាអ្នកបើកបរត្រាក់ទ័រម្នាក់បានស្លាប់ភ្លាមនៅនឹងកន្លែងដោយសាររថយន្តបែនដឹកដីបុកត្រាក់ទ័រគាត់ពីក្រោយ ។ ហេតុការណ៍នេះបានកើតឡើងកាលពីវេលាម៉ោង៩និង៥០នាទីយប់ ថ្ងៃទី២០ ឧសភា ឆ្នាំ២០១១ នៅលើផ្លូវជាតិលេខ៦ ត្រង់ចំណុចចន្លោះបង្គោលភ្លើង SKL 0590-0591 ខាងកើតភូមិរហាល ឃុំរហាល ស្រុកព្រះនេត្រព្រះ ។
លោកអនុសេនីយ៍ឯក កែវ ប៊ុនយឿន អធិការនគរបាលស្រុកព្រះនេត្រព្រះ បានប្រាប់ឱ្យដឹងថា ជនរងគ្រោះជាអ្នកបើកបរត្រាក់ទ័រឈ្មោះរ៉ម លឿយ ភេទប្រុស អាយុ២៩ឆ្នាំ នៅភូមិណាំតៅ ឃុំណាំតៅ ស្រុកភ្នំស្រុក ខេត្តបន្ទាយមានជ័យ ។ ចំណែករថយន្តបង្កហេតុម៉ាក FUSO ពណ៌ស្លាទុំ លាយស គ្មានស្លាកលេខ បើកបរដោយឈ្មោះភ័ណ ភេទប្រុស អាយុ២៧ឆ្នាំ នៅស្រុកក្រឡាញ់ ខេត្តសៀមរាប ក្រោយពេលកើតហេតុបានរត់គេចខ្លួនបាត់។
លោកអធិការនគរបាលស្រុកបានបន្តទៀតថា តាមសាក្សីដែលឃើញហេតុការណ៍នេះ បាននិយាយប្រាប់សមត្ថកិច្ចថា មុនពេលកើតហេតុគេឃើញរថយន្តបើកពីក្រោយត្រាក់ទ័រចំនួន២គ្រឿងក្នុងទិសដៅស្របគ្នាពីកើតទៅលិច ក្នុងល្បឿនយ៉ាងលឿន។ លុះមកដល់ចំណុចកើតហេតុរថយន្តនោះបានបើកវ៉ាត្រាក់ទ័រមួយគ្រឿង ក៏ជ្រុលចង្កូតទៅបុកត្រាក់ទ័រមួយគ្រឿងទៀត នៅពីមុខពេញមួយទំហឹង បណ្តាលឱ្យត្រាក់ទ័រដាច់ជា២ ឯអ្នកបើកបរបានខ្ទាតធ្លាក់ពីលើត្រាក់ទ័រមកលើថ្នល់ក៏ត្រូវរថយន្តកិនពីលើបណ្តាលឱ្យស្លាប់ភ្លាមក្នុងថ្លុកឈាម។ បន្ទាប់ពីបុកត្រាក់ទ័រហើយរថយន្តបានរេចង្កូតធ្លាក់ពីលើផ្លូវបន្តទៅបុកសសរបង្គោលភ្លើងមួយដើមទៀតទើបទៅមុខលែងរួច។
ទាក់ទិននឹងករណីគ្រោះថ្នាក់ចរាចរណ៍នេះ ប្រជាពលរដ្ឋដែលរស់នៅតាមបណ្តោយផ្លូវនោះបានរិះគន់យ៉ាងខ្លាំងចំពោះរថយន្ត ជាពិសេសរថយន្តដឹកអ្នកដំណើរដែលតែងតែបើកបរលឿនមិនថានៅទីប្រជុំជនទេ ព្រោះអ្នកបើកបរទាំងនោះគេគិតថា មិនមែនជារថយន្តរបស់គេ ។ បើមានហេតុការណ៍អ្វីកើតឡើង គឺមានក្រុមហ៊ុន ឬអ្នកធានារ៉ាប់រងជាអ្នកដោះស្រាយ ឯរូបគេធ្វើយ៉ាងណាឱ្យតែរត់គេចខ្លួនរួច ចង់អ្នកណាស្លាប់ ក៏គេមិនខ្វល់ឡើយ ។ ដូច្នេះម្ចាស់រថយន្ត ឬក៏ក្រុមហ៊ុនត្រូវតែសហការជាមួយសមត្ថកិច្ចដើម្បីចាប់ខ្លួនអ្នកបើកបរល្មើសច្បាប់ចរាចរណ៍យកមកផ្តន្ទាទោសតាមច្បាប់ ដូចជាករណីគ្រោះថ្នាក់ចរាចរណ៍នេះជាដើម ម្ចាស់រថយន្តដឹកដីនោះមិនគួរឱ្យឈ្មោះភ័ណនេះរួចខ្លួនពីសំណាញ់ច្បាប់ឡើយ ៕
ចែករំលែកព័តមាននេះ