ការហាមឃាត់ប្រជាកសិករមិនឱ្យធ្វើស្រែប្រាំង ដោយសារបារម្ភពីការខ្វះខាតទឹកក្នុងឆ្នាំ២០២៤នោះ នៅតែជាប្រធានបទក្តៅ និងផ្ទុះប្រតិកម្មពីមហាជន រហូតឈានដល់ការស្នើយោបល់ពីអ្នកជំនាញឱ្យរំលាយក្រសួងធនធានទឹកចូលទៅក្រសួងកសិកម្មតែមួយវិញ
រាជធានីភ្នំពេញ ៖ ការហាមឃាត់ប្រជាកសិករមិនឱ្យធ្វើស្រែប្រាំង ដោយសារបារម្ភពីការខ្វះខាតទឹកក្នុងឆ្នាំ២០២៤នោះ នៅតែជាប្រធានបទក្តៅ និងផ្ទុះប្រតិកម្មពីមហាជន រហូតឈានដល់ការស្នើយោបល់ពីអ្នកជំនាញឱ្យរំលាយក្រសួងធនធានទឹកចូលទៅក្រសួងកសិកម្មតែមួយវិញ។
ជាឆ្លើយតបចំពោះមតិរិះគន់ជុំវិញការហាមប្រាមមិនឱ្យពលរដ្ឋធ្វើស្រែប្រាំងនោះ អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានឆ្លើយតបនឹងសំណួររបស់ 60Buzz ទាំងស្រុងថា ៖
សំណួរទី១- តើក្រសួងធនធានទឹក ឆ្លើយតបយ៉ាងណា ចំពោះការរិះគន់លើការហាមប្រាមមិនឱ្យពលរដ្ឋធ្វើស្រែប្រាំង ដោយបារម្ភពីការខ្វះខាតទឹក?
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានពន្យល់ដោយរំលឹកពីប្រវត្តិនៃការធ្វើស្រូវប្រាំងនៅកម្ពុជាថា «មុនពេលដែលក្រសួងធនធានទឹកបង្កើតចុងឆ្នាំ១៩៩៩ ស្រូវប្រាំងផលិតក្នុងក្របខណ្ឌទូទាំងប្រទេស ប្រមាណតែ២៥ម៉ឺនហិកតាប៉ុណ្ណោះ ប៉ុន្តែឈានមកដល់ឆ្នាំ២០២២-២០២៣ ស្រូវប្រាំងប្រមាណ៦៥ហិកតា។ មានន័យថា ក្រោយពីមានវត្តមានក្រសួងធនធានទឹក គឺស្រូវប្រាំងនៅកម្ពុជាបានកើនឡើងប្រមាណ៤០ម៉ឺនហិកតា ហើយនិន្នាការនៃការផលិតស្រូវប្រាំងបន្តកើនឡើងជាបន្តបន្ទាប់ ជាពិសេសក្នុងឆ្នាំ២០២៤នេះ ស្រូវប្រាំងមានតម្លៃល្អមានការកើនឡើងខ្លាំង ទើបប្រជាពលរដ្ឋសម្រុកដាំដុះ»។
ត្រង់ចំណុចកើនឡើងនេះ លោក ចាន់ យុត្ថា សង្កត់ធ្ងន់ថា «នៅក្នុងផែនការផលិតស្រូវប្រាំងទូទាំងប្រទេសមានក្នុងរង្វង់៥០ម៉ឺនហិកតាតែប៉ុណ្ណោះ ប៉ុន្តែឈានមកដល់ពាក់កណ្តាលខែមករានេះ ស្រូវប្រាំងជិត៦០ម៉ឺនហិកតាហើយដែលត្រូវបានដាំដុះរួច។ ស្របគ្នានៃការសម្រុកធ្វើស្រូវប្រាំងនាឆ្នាំនេះ ជំរុញឱ្យក្រសួងធនធានទឹក សម្តែងការព្រួយបារម្ភច្រើនចំណុចដូចជា ៖ ១- ទីតាំងផ្ទៃដីស្រែដែលកសិករមិនដែលផលិតស្រូវប្រាំងទេ តែឆ្នាំនេះ ព្រោះតម្លៃស្រូវល្អ ពួកគាត់ក៏ធ្វើការដាំដុះនៅទីតាំងដែលមិនមានប្រភពទឹក នេះជាបញ្ហាប្រឈម។ ២- ទីតាំងផលិតស្រូវប្រាំងដែលគាត់ដាំដុះលើកទី១ហើយ ក្រោយពេលប្រមូលផលរួច ក៏ដាំដុះលើកទី២ទៀត ក៏ជាបញ្ហាប្រឈមដែរ ដូចយើងដឹងស្រាប់ប្រទេសយើងក្នុងរដូវប្រាំងមិនមានភ្លៀងសម្រាប់ជំនួយទេ ការដាំដុះស្រូវប្រាំង គឺពឹងទាំងស្រុងទៅនឹងប្រភពទឹកដែលក្រសួងបានកសាងរួច។ អញ្ចឹងកន្លែងដែលមិនមានប្រភពទឹក គឺប្រឈមខ្លាំង ខណៈពីមួយឆ្នាំទៅមួយឆ្នាំក្រសួងកំពុងតែខិតខំពង្រីកសក្តានុពលទឹក សម្រាប់ការប្រើប្រាស់ប្រចាំថ្ងៃក្នុងជីវភាពរស់នៅរបស់ពលរដ្ឋ ទាំងការដាំដុះទាំងក្នុងរដូវប្រាំង និងវស្សា»។
សំណួរទី២- តើការខ្វះខាតទឹកក្នុងរដូវប្រាំងឆ្នាំ២០២៤នេះ អាចប្រឈមទូទាំងប្រទេស ឬក៏តាមតំបន់មួយចំនួនតូចទេ? ខេត្តណា ឬតំបន់ណាដែលប្រឈមខ្លាំងជាងគេ?
ឆ្លើយតបនឹងសំណួរនេះ អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានបញ្ជាក់ថា «សម្រាប់ឆ្នាំ២០២៤ ក៏ដូចជាឆ្នាំ២០២៣កន្លងមក កម្ពុជាទទួលឥទ្ធិពលពីបាតុភូតអេលីនូ ដែលមកដល់ពេលនេះយើងកំពុងទទួលរងឥទ្ធិពលនេះ ស្ទើរតែ១០០ភាគរយ ដូចនេះនៅចុងរដូវវស្សា រដ្ឋមន្ត្រីក្រសួងធនធានទឹក បានណែនាំ២ចំណុចជាសំខាន់ ៖ ទី១- ត្រូវតែគ្រប់គ្រងប្រភពទឹកដែលមានស្រាប់អោយបានគត់មត់ល្អ ម្យ៉ាងដោយសារឆ្នាំនេះ ទឹកទន្លេទាប ដូច្នេះបណ្តាអាងផ្ទុកទឹក ដូចជា ៖ ព្រែក បឹងបួរ ធម្មជាតិមួយចំនួនដែលនៅអមសងខាងទន្លេ ទាំងទន្លេមេគង្គលើ មេគង្គក្រោម ទន្លេបាសាក់ ទន្លេសាប ពុំមានទឹកចូលគ្រប់គ្រាន់ល្អទេ កន្លែងល្អ ឯកឧត្តមរដ្ឋមន្ត្រីក៏បានបញ្ជាឱ្យបូមបញ្ចូលបន្ថែម សម្រាប់ទុកប្រើប្រាស់ក្នុងរដូវប្រាំង»។
លោក ចាន់ យុត្ថា បានបញ្ជាក់ថា «ទី២ – ទឹកដែលថែរក្សាបាន ទុកជាអាទិភាពសម្រាប់ការប្រើប្រាស់ប្រចាំថ្ងៃ ចៀសវាងការខ្វះខាតធ្ងន់ធ្ងរ ដូចជា ៖ រដូវប្រាំងឆ្នាំ២០១៥-២០១៦ ដែលយើងជួបប្រទះកន្លងមក។ ហើយសល់ពីនោះ គឺយើងទុកប្រើប្រាស់សម្រាប់ការដាំដុះនារដូវប្រាំង នេះឯង»។
លោក ចាន់ យុត្ថា បានបញ្ជាក់លើចំណុចនេះថា «ប្រសិនបើការដាំដុះស្រូវប្រាំងក្នុងរង្វង់៥០ម៉ឺនហិកតា ទៅតាមផែនការរបស់ក្រសួងកសិកម្ម ទៅតាមសក្តានុពលទឹកដែលយើងមាន គឺមិនមានបញ្ហាចោទធ្ងន់ធ្ងរទេ តែបញ្ហាធ្ងន់ធ្ងរនៅឆ្នាំ២០២៤ គឺការដាំដុះនៅតំបន់ដែលគ្មានប្រភពទឹក និងការដាំដុះស្រូវប្រាំងលើកទី២។ ប៉ុន្តែទោះបីជាបែបនេះក្តី ក្រសួងនៅតែបន្តអនុវត្តភារៈកិច្ចរបស់ខ្លួន មានន័យថា គឺការនាំយកទឹកទៅជួយប្រជាកសិករឱ្យអស់ពីលទ្ធភាព។ជាក់ស្តែងកន្លងមក ក្រសួងធ្លាប់ធ្វើនៅស្រុកមោងឬស្សី ដែលមានតែប្រភពទឹកតូចៗដូចជា ៖ ស្ទឹងដូនទ្រី ស្ទឹងតូច តែប៉ុណ្ណោះ។ ហើយពេលជួបបញ្ហាប្រឈម ក្រសួងបានបង្វែរទឹកដល់ទៅជាង១០០គីឡូម៉ែត្រ តាមប្រឡាយមេពីស្រុករតនៈមណ្ឌល ប៉ុន្តែនៅឥឡូវនេះ អាងទឹកដ៏ធំមួយដែលមានសមត្ថភាពភាពស្តុកទឹក១៦៣លានម៉ែត្រគូប កំពុងសាងសង់នៅក្នុងស្រុករុក្ខគីរី ដើម្បីយកមកផ្គត់ផ្គង់ដល់ស្រុកមោងឬស្សី ចុងឆ្នាំ២២០២៤នេះ ហើយស្រុកមោងឬស្សី នឹងលែងមានបញ្ហាប្រឈមហើយ»។
លោក ចាន់ យុត្ថា បានបញ្ជាក់ទៀតថា «ដោយឡែកចំពោះតំបន់ផ្សេងៗក្នុងក្របខណ្ឌទូទាំងប្រទេស យើងក៏កំពុងតែបន្តអភិវឌ្ឍន៍ដូចគ្នា ប៉ុន្តដូចយើងដឹងស្រាប់ហើយ យើងត្រូវការពេលវេលា ត្រូវការថវិកាសម្រាប់ការអភិវឌ្ឍន៍»។
សំណួរទី៣- តើប្រព័ន្ធធារាសាស្ត្រសម្រាប់ទឹកផ្គត់ផ្គង់ក្នុងវិស័យកសិកម្ម មានការវិវឌ្ឍន៍បែបណាដែរ ពេលឈានមកដល់ឆ្នាំ២០២៤នេះ?
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានឱ្យដឹងថា «នៅក្នុងគោលនយោបាយរបស់រាជរដ្ឋាភិបាល គឺយើងមានផែនការក្នុងការអភិវឌ្ឍន៍ហេដ្ឋារចនាសម្ព័ន្ធធារាសាស្ត្រឱ្យបានជាង៣ម៉ឺនហិកតាក្នុងមួយឆ្នាំ ដែលប្រើប្រាស់កញ្ចប់ថវិការដ្ឋ។ ក្រៅពីនេះ ក្រសួងក៏មានកិច្ចសហប្រតិបត្តិការជាមួយដៃគូរអភិវឌ្ឍន៍ និងបណ្តាប្រទេសជាមិត្តផ្សេងៗទៀត ដូចជា ADB JICA Worldbank AFD…. និងប្រទេសជាមិត្តដូចជា កូរ៉េ ចិន ជប៉ុន ឥណ្ឌា.. ដូចនេះយើងនឹងបន្តធ្វើការអភិវឌ្ឍន៍»។
លោក ចាន់ យុត្ថា បានបន្តថា «ជាក់ស្តែងនៅចុងឆ្នាំនេះ អាងស្តុកទឹកក្នុងស្រុករុក្ខគីរី ដែលមានសមត្ថភាពស្តុកទឹក១៦៣លានម៉ែត្រគូប នឹងលេចចេញជារូបរាង។ ហើយនៅតាមបណ្តាខេត្តនានាក៏ដូចគ្នា នៅលើដងស្ទឹងសែនកន្លងមក យើងបានសាងសង់អាងទឹករក្សានៅឯខេត្តព្រះវិហារ ហើយគ្រោងនឹងសាងសង់មួយទៀតឆាប់ៗ អាងទឹកដងកាំបិត ខណៈនៅខេត្តកំពង់ធំ យើងក៏មានអាងស្តុកទឹករួចស្រេចហើយនៅស្ទឹងស្ទោង ហើយយើងនឹងសាងសង់ថ្មីមួយទៀតឆាប់ៗ ទាំងនេះបង្ហាញថា ក្រសួងធនធានទឹកមានផែនការអភិវឌ្ឍន៍ជាបន្តបន្ទាប់»។
ក្រៅពីឆ្លើយតបនឹងសំណួរទាំង៣ខាងលើនេះ អ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានទទួលស្គាល់ថា «ស្ថានភាពបច្ចុប្បន្ន ប្រព័ន្ធធារាសាស្ត្ររបស់ក្រសួងពិតជាមិនទាន់ឆ្លើយតបទាំងស្រុងបានតាមតម្រូវការរបស់ប្រជាកសិករទេ ប៉ុន្តែក្រសួងនឹងបន្តខិតខំ»។
លោក ចាន់ យុត្ថា អះអាងថា «វិស័យទឹក នៅតែត្រូវបានចាត់ទុកជាវិស័យអាទិភាព ក្នុងចំណោមវិស័យទាំង៥ នៃគោលនយោបាយបញ្ចកោណរបស់រាជរដ្ឋាភិបាលកម្ពុជា មនុស្ស ទឹក ផ្លូវ ភ្លើង និងឌីជីថល»។
ជាចុងក្រោយ ដើម្បីចៀសវាងបញ្ហាខ្វះខាតទឹក អ្នកនាំពាក្យក្រសួងធនធានទឹក បានស្នើសុំការយោគយល់ពីបងប្អូនប្រជាពលរដ្ឋនៅ២ចំណុច ដោយចំណុចទី១- ទីតាំងណាដែលគ្មានប្រភពទឹក សូមកុំធ្វើការដាំដុះស្រូវប្រាំង ហើយក្រសួងនឹងព្យាយាមដោះស្រាយជាបន្តបន្ទាប់!។ ទី២- សូមដាំដុះស្រូវប្រាំងតែ១លើកបានហើយ ព្រោះសក្តានុពលទឹករបស់យើងមានកំណត់ ខណៈរដូវប្រាំងគ្មានភ្លៀងហើយ ឆ្នាំនេះយើងកំពុងរងឥទ្ធិពលអេលនីណូ ដែលធ្វើឱ្យសីតុណ្ហភាពហក់ឡើងខ្ពស់កំឡុងខែមីនា និងខែមេសាខាងមុខនេះ រួមទាំងភ្លៀងកក់ខែតិចតួច ដូច្នេះសូមអំពាវនាវ និងការយោគយល់ពីប្រជាកសិករ។
គួររំលឹកថា ៖ រឿងហាមធ្វើស្រូវប្រាំង! អ្នកជំនាញស្នើថា ក្រសួងទឹកគួររំលាយចូលក្រោមក្រសួងកសិកម្មវិញ ៕ អត្ថដោយដោយ ៖ អោម ចែតច័ន្ទណារ៉ា
ចែករំលែកព័តមាននេះ