រាជធានីភ្នំពេញ ៖ រដ្ឋមន្ត្រីក្រសួងយុត្តិធម៌ បានប្រកាសដាក់ចេញសសរស្តម្ភ ចំនួន២ ដើម្បីធ្វើកំណែទម្រង់ប្រព័ន្ធតុលាការនៅកម្ពុជា ឲ្យបានឆាប់រហ័សជូនប្រជាពលរដ្ឋ ក្នុងនោះ ដោះស្រាយវិវាទក្រៅប្រព័ន្ធតុលាការ ។
ការដាក់ចេញរបស់រដ្ឋមន្ត្រីក្រសួងយុត្តិធម៌ ធ្វើឡើងក្នុងកិច្ចប្រជុំផ្សព្វផ្សាយ ស្តីពី កិច្ចដំណើរការរបស់ខ្លួនដល់អង្គការសង្គមស៊ីវិល និងដៃគូអភិវឌ្ឍន៍ កាលពីថ្ងៃទី១៥ ខែមករា ឆ្នាំ២០២៤ ។
ថ្លែងនៅក្នុងកិច្ចប្រជុំ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) បានលើកឡើងថា កិច្ចប្រជុំផ្សព្វផ្សាយនេះ ត្រូវបានរៀបចំទ្បើង ក្នុងគោលបំណងសំខាន់ចំនួន ២ គឺទី១. ដើម្បីផ្សព្វផ្សាយឱ្យកាន់តែស៊ីជម្រៅបន្ថែមទៀត អំពីកិច្ចដំណើរការរបស់អាជ្ញាធរជាតិដោះស្រាយវិវាទ ក្រៅប្រព័ន្ធតុលាការ និងទី២. ពិនិត្យលទ្ធភាព ក្នុងការធ្វើកិច្ចសហការជាមួយគ្នា ក្នុងកិច្ចដំណើរការក្នុងការជួយដោះស្រាយវិវាទក្រៅប្រព័ន្ធតុលាការ ជូនដល់ប្រជាពលរដ្ឋ ។
ឯកឧត្តម បានគូសបញ្ជាក់ថា ជាទិសដៅការងារទៅមុខ ការកែទម្រង់ប្រព័ន្ធយុត្តិធម៌នៅកម្ពុជា នឹងត្រូវប្រមូលផ្តុំការយកចិត្តទុកដាក់ទៅលើសសរស្តម្ភ ចំនួន២ គឺសសរស្តម្ភទី១- ការកែទម្រង់ប្រព័ន្ធតុលាការ ដោយផ្តោតលើគុណភាព និងប្រសិទ្ធភាព នៃការផ្តល់សេវាយុត្តិធម៌ប្រកបដោយភាពឆាប់រហ័ស និងផ្តោតលើគុណភាព នៃយុត្តិធម៌ ប្រកបដោយភាពសុក្រឹត និងភាពត្រឹមត្រូវ និងសសរស្តម្ភទី២- ការកែទម្រង់ប្រព័ន្ធ ដោះស្រាយ វិវាទក្រៅប្រព័ន្ធតុលាការ ដែលមានលក្ខណៈងាយស្រួល សម្បូរបែប និងដោះស្រាយបញ្ចប់វិវាទ តាមរយៈការសម្រុះសម្រួលផ្សះផ្សាវិវាទឱ្យបានឆាប់រហ័សជូនប្រជាពលរដ្ឋ ព្រមទាំងរួមចំណែក លើកកម្ពស់វប្បធម៌សន្តិភាពនិយម ក្នុងសង្គមកម្ពុជា ។
ឯកឧត្តមបន្ថែមថា ក្នុងន័យនេះ ការបង្កើត នូវអាជ្ញាធរជាតិ ដោះស្រាយវិវាទ ក្រៅប្រព័ន្ធតុលាការ គឺជាកិច្ចការអាទិភាពមួយ នៃគោលនយោបាយកែទម្រង់របស់រាជរដ្ឋាភិបាល នីតិកាលទី៧ និងជាការបោះជំហានថ្មីមួយ ក្នុងការកែទម្រង់ ប្រព័ន្ធដោះស្រាយវិវាទ នៅកម្ពុជា ។
ក្រោយពីបានស្តាប់បទបង្ហាញលើប្រធានបទចំនួន២ (ទី១)- អាជ្ញាធរជាតិ ដោះស្រាយវិ វាទក្រៅប្រព័ន្ធតុលាការ និង(ទី២)- គម្រោងនៃការ ដោះស្រាយវិវាទក្រៅប្រព័ន្ធតុលាការ សម្រាប់ក្រុមគោលដៅជាក្រុមជនជាតិដើមភាគតិច និងក្រុមអ្នករស់នៅតំបន់ដាច់ស្រយាល,
សូមជម្រាបថា អង្គប្រជុំក៏មានវេទិកាពិភាក្សាបើកទូលាយ ដើម្បីផ្តល់ឱកាសដល់អ្នកចូលរួមអាចលើកទ្បើងអំពីសំណួរ សំណូមពរ មតិយោបល់ និងការយល់ឃើញជុំវិញកិច្ចដំណើរការរបស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ ។
តាមរយៈកិច្ចសន្ទនា ដោយបើកទូលាយខាងលើ ជារួមតំណាងអង្គការសង្គមស៊ីវិល និងដៃគូអភិវឌ្ឍន៍ បានសម្តែងនូវការសាទរ និងការគាំទ្រដល់ការបង្កើតអាជ្ញាធរជាតិ ដោះស្រាយវិវាទក្រៅប្រព័ន្ធតុលាការ ព្រមទាំងបង្ហាញ នូវឆន្ទៈក្នុងការចូលរួមសហការជាមួយស្ថាប័នថ្មីនេះ ក្នុងបេសកកម្ម ចុះជួយដោះស្រាយវិវាទជូនប្រជាពលរដ្ឋ ។
ក្នុងកិច្ចប្រជុំនោះដែរ ឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធាន អ.ដ.ក. បានចាត់ទុក អង្គការសង្គមស៊ីវិល និងដៃគូអភិវឌ្ឍន៍ជាដៃគូសហការ ដ៏សំខាន់មួយរបស់ អ.ដ.ក. ហើយការចូលរួមរបស់តំណាងអង្គការសង្គមស៊ីវិល និងដៃគូអភិវឌ្ឍន៍ ក្នុងកិច្ចប្រជុំនេះ ពិតជាបង្ហាញឱ្យឃើញពីការគាំទ្រដ៏មានសារសំខាន់ដល់កិច្ចដំណើរការរបស់ អ.ដ.ក.ដើម្បីអាចឈានទៅសម្រេចបាននូវបេសកកម្មចុះដោះស្រាយវិវាទជូនប្រជាពលរដ្ឋនៅមូលដ្ឋាន ពិសេសនៅតំបន់ដាច់ស្រយាល និងតំបន់ដែលមានជនជាតិដើមភាគតិចរស់នៅ សំដៅជំរុញ និងលើកកម្ពស់យន្តការដោះស្រាយវិវាទក្រៅប្រព័ន្ធតុលាការ សម្រាប់ជាផលប្រយោជន៍រួម របស់ប្រជាពលរដ្ឋកម្ពុជា។
គួរបញ្ជាក់ថា កិច្ចប្រជុំមានការចូលរួមពីតំណាងអង្គការសង្គមស៊ីវិល និងដៃគូអភិវឌ្ឍន៍ សរុបប្រមាណជា ៤០ អង្គភាព ដែលបាននិងកំពុងធ្វើការងារពាក់ព័ន្ធនឹងការដោះស្រាយ វិវាទក្រៅប្រព័ន្ធតុលាការនៅកម្ពុជា ៕
ចែករំលែកព័តមាននេះ