តុលាការក្រុងបែលហ្ក្រាដទទួលបន្ទុកឧក្រិដ្ឋកម្មសង្គ្រាមបានផ្អាកកាលពីយប់ថ្ងៃទី២៦ ឧសភា នូវការសួរចម្លើយអតីតប្រមុខកងទ័ពបូស្នី-ស៊ែប លោក RATKO MLADIC ដែលទើបចាប់ខ្លួនបានដោយសារស្ថានភាពសុខភាព មិនល្អរបស់គេ ។ មេធាវីលោក MILOS SALJIC ថ្លែងទៅកាន់ក្រុមអ្នកកាសែតថា ចៅក្រមស៊ើបអង្កេតចង់សួរចម្លើយលោក MLADIC ហើយត្រូវផ្អាកវិញ ដោយសារបញ្ហាសុខភាពរបស់លោក ។
លោក BRUNO VEKARIC រដ្ឋអាជ្ញារងរបស់តុលាការនេះថ្លែងប្រាប់សារព័ត៌មានថា ការសួរចម្លើយនឹងធ្វើនៅថ្ងៃទី២៧ ឧសភា ។លោក MLADIC ត្រូវបានចាប់ខ្លួនកាលពីព្រឹកថ្ងៃទី២៦ ឧសភា នៅភាគឦសានស៊ែរប៊ីជា កន្លែងដែលលោកលាក់ខ្លួនក្នុងកសិដ្ឋានមួយដែលជារបស់សមាជិកគ្រួសារលោកម្នាក់ ។
អតីតឧត្តមសេនីយ៍មូស្នី-ស៊ែប រូបនេះទទួលការចោទប្រកាន់ពីបទប្រល័យពូជសាសន៍កាលពីឆ្នាំ១៩៩៥ ដោយតុលាការ TPIY ពីបទសម្លាប់រង្គាលមនុស្ស៨.០០០នាក់នៅក្រុងស្រេប្រេនីកា កាលពីខែកក្កដា ឆ្នាំ១៩៩៥ និងការស្លាប់ជនស៊ីវិលជាច្រើនរយនាក់ក្នុងពេលឡោមព័ទ្ធក្រុងសារ៉ា យ៉េវ៉ូ (១៩៩២-១៩៩៥) ។
មុនពេលប្រកាសពីការលើកពេលសួរចម្លើយទូរទស្សន៍រដ្ឋស៊ែបប៊ី RTS បានផ្សាយរូបភាពនានាដែលគេឃើញលោក MLADIC ត្រូវប៉ូលិសនាំទៅកាន់ចៅក្រមស៊ើបអង្កេតរបស់ តុលាការ ។
ពួកអ្នកជាតិនិយមជាច្រើនសិបនាក់បានប្រមូលផ្តុំគ្នាកាលពីយប់ថ្ងៃទី២៦ ឧសភា នៅកណ្តាលក្រុងបែលហ្ក្រាដ ដើម្បីតវ៉ាប្រឆាំងនឹងការចាប់ខ្លួនលោក MLADIC ហើយប៉ះទង្គិច គ្នា រយៈពេលខ្លីជាមួយប៉ូលិស៕
ចែករំលែកព័តមាននេះ