ពន្លឺថ្មី! កូរ៉េខាងជើងត្រៀមទទួលភ្ញៀវទេសចរលើកដំបូង ក្រោយខកខានតាំងពីឆ្នាំ២០២០
កូរ៉េខាងជើង ៖ ក្រុមមួយមកពីប្រទេសរុស្ស៊ីបានត្រៀមខ្លួនក្លាយជាភ្ញៀវទេសចរដំបូងគេ ដែលត្រូវ
កូរ៉េខាងជើង ៖ ក្រុមមួយមកពីប្រទេសរុស្ស៊ីបានត្រៀមខ្លួនក្លាយជាភ្ញៀវទេសចរដំបូងគេ ដែលត្រូវបានអនុញ្ញាតចូលក្នុងប្រទេសកូរ៉េខាងជើង ចាប់តាំងពីការបិទព្រំដែនប្រឆាំងនឹងជំងឺរាតត្បាតកូវីដ-១៩ បានចាប់ផ្តើមនៅដើមឆ្នាំ ២០២០។ នេះបើយោងតាមការបង្ហោះរបស់អាជ្ញាធររុស្ស៊ី និងមគ្គុទ្ទេសក៍ទេសចរណ៍លោកខាងលិច ដែលត្រូវបានចេញផ្សាយដោយទីភ្នាក់សារព័ត៌មាន Reuters នៅថ្ងៃទី១២ ខែមករា ឆ្នាំ២០២៤។
ប្រទេសកូរ៉េខាងជើងបានដាក់ការគ្រប់គ្រងព្រំដែនដ៏តឹងរ៉ឹងបំផុតនៅលើពិភពលោក អំឡុងពេលការរីករាលដាលជំងឺកូវីដ-១៩ ហើយមិនទាន់បានបើកព្រំដែនពេញលេញឡើងវិញ សម្រាប់ជនបរទេសនៅឡើយទេ។ ការធ្វើដំណើរដែលត្រូវបានផ្សព្វផ្សាយដោយទីភ្នាក់ងារដែលមានមូលដ្ឋាននៅទីក្រុង Vladivostok នៅតំបន់ Primorsky Krai ប្រទេសរុស្ស៊ី ត្រូវបានរៀបចំឡើងនៅពេលអភិបាលនៃតំបន់ភាគខាងកើតឆ្ងាយរបស់រុស្ស៊ី ដែលមានព្រំប្រទល់ជាប់នឹងប្រទេសកូរ៉េខាងជើងមួយនេះ បានធ្វើដំណើរទស្សនកិច្ចនៅទីក្រុងព្យុងយ៉ាង ដើម្បីពិភាក្សាកាលពីខែធ្នូឆ្នាំមុន។ អភិបាលតំបន់បានបញ្ជាក់នៅក្នុងសារបង្ហោះលើបណ្តាញ Telegram កាលពីពេលថ្មីៗនេះថា ដំណើរកម្សាន្តរយៈពេល៤ថ្ងៃ នឹងចេញដំណើរនៅថ្ងៃទី៩ ខែកុម្ភៈខាងមុខ។
លោក Simon Cockerell អ្នកគ្រប់គ្រងទូទៅនៅ Koryo Tours ដែលជាក្រុមហ៊ុនទេសចរណ៍លោកខាងលិចឯករាជ្យមានមូលដ្ឋាននៅទីក្រុងប៉េកាំង ឯកទេសទេសចរណ៍ជាក្រុម និងឯករាជ្យទៅកាន់ប្រទេសកូរ៉េខាងជើង ដែលមិនពាក់ព័ន្ធនឹងការធ្វើដំណើរនោះ បានបញ្ជាក់ប្រាប់ Reuters ថា ដៃគូរបស់គាត់នៅក្នុងប្រទេសកូរ៉េខាងជើងបានអះអាងថា ដំណើរទស្សនកិច្ចរបស់រុស្ស៊ីនឹងប្រព្រឹត្តទៅស្ថិតក្រោមកាលៈទេសៈពិសេស។ លោកថ្លែងថា «វាជាសញ្ញាល្អ ប៉ុន្តែខ្ញុំស្ទាក់ស្ទើរក្នុងការនិយាយថា វាចាំបាច់នឹងនាំឱ្យមានការបើកចំហរកាន់តែទូលំទូលាយ ដោយសារតែកាលៈទេសៈពិសេសសម្រាប់ការធ្វើដំណើរមួយនេះ។ ប៉ុន្តែដោយសារថា គ្មានភ្ញៀវទេសចរណាបានមកដល់បួនឆ្នាំមកហើយ ដំណើរទេសចរណ៍ណាមួយអាចត្រូវបានគេមើលឃើញថា គឺជាជំហានវិជ្ជមានទៅមុខ»។
មេដឹកនាំកូរ៉េខាងជើង លោក គីម ជុងអ៊ុន និងប្រធានាធិបតីរុស្ស៊ី លោក វ្ល៉ាដឺមៀ ពូទីន បានជួបគ្នាសម្រាប់កិច្ចប្រជុំកំពូលមួយ នៅភាគខាងកើតប្រទេសរុស្ស៊ី កាលពីខែកញ្ញា ឆ្នាំមុន ហើយមេដឹកនាំទាំងពីរសន្យាថា នឹងពង្រឹងកិច្ចសហប្រតិបត្តិការផ្នែកសេដ្ឋកិច្ច នយោបាយ និងយោធា បើទោះបីជាមានទណ្ឌកម្មអន្តរជាតិយ៉ាងណាក៏ដោយ។
វិស័យទេសចរណ៍មិនបានប៉ះពាល់ចំពោះដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ ដែលដាក់កម្រិតលើអាជីវកម្មជាមួយនឹងប្រទេសកូរ៉េខាងជើង ជុំវិញកម្មវិធីអាវុធនុយក្លេអ៊ែរ និងមីស៊ីលផ្លោងរបស់ខ្លួន។ យោងតាមការប៉ាន់ស្មានដោយទីភ្នាក់សារព័ត៌មាន NK News ដែលមានមូលដ្ឋាននៅទីក្រុងសេអ៊ូល ប្រទេសកូរ៉េខាងត្បូង បានបង្ហាញថា មួយឆ្នាំមុនផ្ទុះជំងឺកូវីដ-១៩ ប្រទេសកូរ៉េខាងជើងបានមើលឃើញការកើនឡើងនៃភ្ញៀវទេសចរចិន ដែលអាចផ្តល់ប្រាក់ចំណូលបន្ថែមរហូតដល់ ១៧៥លានដុល្លារក្នុងឆ្នាំ ២០១៩៕
ចែករំលែកព័តមាននេះ