ខេត្តកំពត ៖ ស្រូវរដូវប្រាំងជាច្រើនហិកតារបស់ប្រជាពលរដ្ឋនៅឃុំភ្នំប្រសាទ និងឃុំផ្សេងៗទៀត ស្ថិតក្នុងស្រុកកំពង់ត្រាច ខេត្តកំពត កំពុងប្រឈមនិងការខូចខាត ខណៈស្រូវដែលជិតប្រមូលផល ស្រាប់តែប្រជាពលរដ្ឋម្នាក់ៗហាក់ដូចជាដណ្ដើមគ្នាបូមទឹកអស់ពីប្រឡាយដាក់ស្រូវពង្រោះរបស់ខ្លួន។
បន្ទាប់ពីប្រជាពលរដ្ឋបូមទឹកអស់ពីប្រឡាយយកទៅស្រោចស្របស្រូវរបស់ខ្លួនអស់ កាលពីព្រឹកថ្ងៃទី០៨ ខែមករា លោកអូន ខន អភិបាលស្រុកកំពង់ត្រាច រួមដំណើរជាមួយលោកហៀង ម៉េង ប្រធាននាយកដ្ឋានវិស្វកកម្មក្រសួងធនធានទឹក និងឧត្តុនិយមបានចុះមកពីនិត្យផ្ទាល់ដំណាំស្រូវដែលមានការខ្វះខាតទឹករួមទាំងអាជ្ញាធរមូលដ្ឋានភូមិ-ឃុំ ។
លោកហៀង ម៉េង ប្រធាននាយកដ្ឋានវិស្វកកម្មក្រសួងធនធានទឹកមានប្រសាស៍ថា ស្រូវប្រាំងរបស់ប្រជាពលរដ្ឋ1250ហិកតា ជិតបានប្រមូលផលហើយតែខ្វះខាតទឹកស្រោចស្រប ក្នុងនោះមានឃុំព្រែកក្រឹស-ឃុំបឹងសាលាខាងជើង-ឃុំភ្នំប្រាសាទ-ឃុំអង្គសុរភី ក្នុងស្រុកកំពង់ត្រាច និងមួយផ្នែកទៀតប្រជាពលរដ្ឋនៅឃុំស្ដេចគង់ខាងត្បូង ស្រុកបន្ទាយមាស ខេត្តកំពត ក៏មានការខ្វះខាតទឹកក្នុងការប្រើប្រាស់បូមដាក់ស្រូវពង្រោះដែរ។
លោកហៀង ម៉េង មានប្រសាសន៍ថា បើអស់ទឹកពីប្រឡាយសម្រាប់ធ្វើការស្រោចស្របស្រូវពលរដ្ឋហើយបើមិនជួយរកប្រភពទឹកបូមចូលក្នុងប្រឡាយវិញទេ ច្បាស់ជាស្រូវពួកគាត់ខូចអស់មិនខាន់ឡើយ ព្រោះអីស្រូវទាំងអស់នោះ សុទ្ធតែជិតប្រមូលផលទៅហើយ។
លោកហៀក ម៉េង មានប្រសាសន៍ទៀតថា មូលហេតុនៃការខ្វះទឹកមកពីប្រជាពលរដ្ឋធ្វើស្រូវរដូវ ប្រាំងចំនួនបីដងក្នុងរដូវប្រាំង ដោយសារតែតម្លៃស្រូវបានឡើងថ្លៃក្នុងមួយគីឡូស្រូវ១៤៨០រៀល តែទោះជាមានការខ្វះខាតទឹកយ៉ាងណាក៏ដោយថ្នាក់ក្រសួង និងមន្ទីរធនធានទឹកខេត្តកំពត ដឹកម៉ាស៊ីនទឹកមកបូមចែកចាយទឹកមិនអោយស្រូវពួកគាត់ខួចខាត ។
ចែករំលែកព័តមាននេះ