ខេត្តកណ្តាល ៖ កម្លាំងប៉ូលិសការិយាល័យប្រឆាំងគ្រឿងញៀនសហការជាមួយប៉ូលិសស្រុកកោះធំ និងអាជ្ញាធរដែនដី បានធ្វើការឆែកឆេរលំនៅឋានមួយនៅភូមិក្បាលកោះទាវ ឃុំសំពៅពូន ស្រុកកោះធំ ដែលសង្ស័យថា មានលាក់ទុកថ្នាំញៀនធ្វើការចែកចាយក្នុងភូមិសាស្ត្រ និងធ្វើការឃាត់ខ្លួនស្ត្រីម្នាក់ជាម្ចាស់ផ្ទះ ព្រមទាំងរឹបអូសបានវត្ថុតាង
ខេត្តកណ្តាល ៖ កម្លាំងប៉ូលិសការិយាល័យប្រឆាំងគ្រឿងញៀនសហការជាមួយប៉ូលិសស្រុកកោះធំ និងអាជ្ញាធរដែនដី បានធ្វើការឆែកឆេរលំនៅឋានមួយនៅភូមិក្បាលកោះទាវ ឃុំសំពៅពូន ស្រុកកោះធំ ដែលសង្ស័យថា មានលាក់ទុកថ្នាំញៀនធ្វើការចែកចាយក្នុងភូមិសាស្ត្រ និងធ្វើការឃាត់ខ្លួនស្ត្រីម្នាក់ជាម្ចាស់ផ្ទះ ព្រមទាំងរឹបអូសបានវត្ថុតាងថ្នាំញៀនម៉ាទឹកកក១០កញ្ចប់ តូច កាលពីវេលាម៉ោង៣និង៤០នាទីរសៀល ថ្ងៃទី២៤ ឧសភា ។
លោកវរសេនីយ៍ឯក លន់ សុផាត ស្នងការរងទទួលបន្ទុកប្រឆាំងគ្រឿងញៀនបានឱ្យដឹងថា ដោយអនុវត្តតាមបទបញ្ជារបស់អគ្គស្នងការនគរបាលជាតិ និងមានការចង្អុលបង្ហាញពីលោកស្នងការផងនោះ លោកបានបញ្ជាឱ្យកម្លាំងជំនាញរបស់លោកធ្វើការស្រាវជ្រាវរហូតដល់កំណត់មុខសញ្ញាជនសង្ស័យចែកចាយថ្នាំញៀន។ បន្ទាប់មកបានសហការជាមួយអាជ្ញាធរដែនដីធ្វើការឆែកឆេរលំនៅឋានរបស់ឈ្មោះឃាង ស្រស់ ភេទស្រី អាយុ៥២ឆ្នាំ នៅភូមិក្បាលកោះទាវ ឃុំសំពៅពូន ស្រុកកោះធំ និងឃាត់ខ្លួនម្ចាស់ផ្ទះ ព្រមទាំងរឹបអូសបានវត្ថុតាងមានថ្នាំញៀនប្រភេទម៉ាទឹកកកចំនួន១០កញ្ចប់តូច ។
លោកស្នងការរងបានឱ្យដឹងទៀតថា មុខសញ្ញាដែលកម្លាំងលោកតាមដានមានការសង្ស័យចែកចាយថ្នាំញៀននោះ គឺជាកូនប្រុសរបស់ស្ត្រីឈ្មោះឃាង ស្រស់ នោះ ម្នាក់ឈ្មោះគឹម កៅ អាយុ២១ឆ្នាំ និងម្នាក់ទៀតឈ្មោះគឹម សាង អាយុ១៨ឆ្នាំ ។ ជនទាំងពីរនាក់នេះបានរត់គេចខ្លួននៅពេលដែលកម្លាំងប៉ូលិសចុះទៅដល់ផ្ទះរបស់ពួកគេ។
ក្រោយពីឃាត់ខ្លួនស្ត្រីឈ្មោះឃាង ស្រស់ មកសាកសួរបានឆ្លើយសារភាពថា គាត់ពុំមានទាក់ទងជាមួយថ្នាំញៀននោះទេ ។ កន្លងមកគាត់ឧស្សាហ៍ឃើញក្មេងស្ទាវៗមកផ្ទះគាត់ទាក់ទងជាមួយកូនប្រុសគាត់ជាញឹកញាប់ដែរ ប៉ុន្តែគាត់មិននឹកស្មានថា កូនគាត់មានថ្នាំញៀនលក់បែបនេះទេ។ រហូតដល់មានប៉ូលិសមកព័ទ្ធផ្ទះ ហើយធ្វើការឆែកឆេររកឃើញថ្នាំញៀននៅលើខ្នងទូក្នុងផ្ទះគាត់ ទើបគាត់ភ្ញាក់ខ្លួនតែម្តង ។ បច្ចុប្បន្នស្រ្តីឈ្មោះឃាង ស្រស់ ជាម្ចាស់ផ្ទះត្រូវបានប៉ូលិសកសាងសំណុំរឿងដើម្បីបញ្ជូនទៅកាន់សាលាដំបូងចាត់ការតាមនីតិវិធី ៕
ចែករំលែកព័តមាននេះ