អតីតអគ្គនាយកមូលនិធិរូបិយវត្ថុអន្តរជាតិ IMF លោក Dominique Strauss-Kahn កាលពីថ្ងៃទី២៥ ឧសភា កន្លងមក ត្រូវបាននាំខ្លួនចេញពីកន្លែងស្នាក់នៅបណ្តោះអាសន្នទៅកាន់ភូមិគ្រឹះមួយកម្ពស់២ជាន់នៅទីក្រុងញូវយ៉ក ដែលស្ថិតក្រោមការយាមកាមយ៉ាងតឹងរ៉ឹងរយៈពេល២៤ម៉ោង ។ លោក Strauss-Kahn ត្រូវនាំខ្លួនទៅកាន់ភូមិគ្រឹះនោះ ដើម្បីរង់ចាំទទួលការកាត់ទោសពីបទចោទប្រកាន់ពីការរំលោភបំពានផ្លូវភេទលើស្ត្រីអ្នកបម្រើមួយរូបនៅសណ្ឋាគារមួយ ។
លោក Strauss-Kahn បានត្រូវចាប់ខ្លួនកាលពីសប្តាហ៍មុននៅក្នុងទីក្រុងញូវយ៉ក ពីបទចោទប្រកាន់ប៉ុនប៉ងរំលោភបំពានផ្លូវភេទលើស្ត្រីអ្នកបម្រើនៅសណ្ឋាគារមួយរូប ហើយលោកត្រូវបានដោះលែង តាមរយៈការបង់ប្រាក់ធានា១លានដុល្លារ ។ ប៉ុន្តែបើទោះបីជាលោកត្រូវដោះលែងដោយការបង់ប្រាក់ធានាក៏ដោយ ក៏លោកនៅត្រូវជាប់ឃុំឃាំងក្នុងផ្ទះដែរ ។
នៅពេលត្រូវនាំខ្លួនពីកន្លែងស្នាក់នៅបណ្តោះអាសន្ននោះលោក Strauss-Kahn មិនត្រូវដាក់ខ្នោះដៃទេ ប៉ុន្តែស្ថិតក្រោមការគ្រប់គ្រងរបស់ប៉ូលិសនិងមន្ត្រីសន្តិសុខជាច្រើននាក់។ នៅពេលទៅនៅភូមិគ្រឹះនោះ លោក Strau-ss-Kahn នឹងត្រូវអនុញ្ញាតឱ្យចេញក្រៅ តែសម្រាប់ការបង្ហាញខ្លួននៅតុលាការ និងជួបមេធាវីរបស់លោកប៉ុណ្ណោះ ៕
ចែករំលែកព័តមាននេះ