សេតវិមានចោទថាកូរ៉េខាងជើងជួយផ្ដល់មីស៊ីលដល់រុស្ស៊ីក្នុងការច្បាំងជាមួយអ៊ុយក្រែន
សង្គ្រាមអ៊ុយក្រែន ៖ សេតវិមានលើកឡើងកាលពីថ្ងៃទី៤មករាថា បណ្ដាមីស៊ីលដែលកូរ៉េខាងជើងផ្ដល់
សង្គ្រាមអ៊ុយក្រែន ៖ សេតវិមានលើកឡើងកាលពីថ្ងៃទី៤មករាថា បណ្ដាមីស៊ីលដែលកូរ៉េខាងជើងផ្ដល់ដល់រុស្ស៊ី ត្រូវបានប្រើក្នុងការវាយប្រហារទ្រង់ទ្រាយធំរយៈពេលប៉ុន្មានថ្ងៃចុងក្រោយនេះលើអ៊ុយក្រែន។
អ្នកនាំពាក្យក្រុមប្រឹក្សាសន្តិសុខជាតិអាមេរិកលោក្JOHN KIRBY អះអាងថា បណ្ដាព័ត៌មានរបស់យើងគូសបញ្ជាក់ថា កូរ៉េខាងជើងបានផ្ដល់នាពេលថ្មីៗនេះដល់រុស្សុី នូវប្រព័ន្ធបាញ់មីសីុលបាលីស្ទិកនិងគ្រាប់មីសីុលបាលីស្ទិកជាច្រើនគ្រាប់។ អ្នកនាំពាក្យរូបនេះបន្តថា ការផ្ទេរគ្រឿងសព្វាវុធនេះបញ្ជាក់ពីសេចក្ដីត្រូវការសម្រាប់សភាអាមេរិក អនុម័តកញ្ចប់ថវិកាជំនួយយោធាថ្មីដល់អ៊ុយក្រែន។ លោកចូបៃដិនបានស្នើនាពេលមុននេះដល់សភាឲ្យមានប្រតិកម្មដោយប្រញាប់ ក្រោយការវាយប្រហារដ៏សន្ធប់របស់រុស្សុីលើអ៊ុយក្រែន ខណៈការចរចាកំពុុងធ្វើយ៉ាងស្វិតស្វាញ ដើម្បីឲ្យសភាអាមេរិកអនុម័តកញ្ចប់ថវិកាជំនួយធំមួយដល់អ៊ុយក្រែន។
លោកJOHN KIRBY បន្តថា កងទ័ពរុស្ស៊ីក្នុងការបាញ់ស្រោចមីស៊ីលលើអ៊ុយក្រែន បានប្រើកាលពីថ្ងៃទី៣០ធ្នូ យ៉ាងហោចណាស់មីស៊ីល១គ្រាប់ដែលកូរ៉េខាងជើងផ្ដល់ឲ្យ។ មីស៊ីលនោះបានផ្ទុះក្នុងចម្ការមួយនៅតំបន់ហ្សាប៉ូរីហ្ស៊ីយ៉ាភាគខាងត្បូងអ៊ុយក្រែន។ បន្ទាប់មកមីស៊ីលច្រើនគ្រាប់ត្រូវបានរុស្ស៊ីបាញ់ស្រោចមកកាន់អ៊ុយក្រែននាថ្ងៃទី២មករាក្នុងក្របខណ្ឌ នៃការវាយប្រហារតាមអាកាសធំមួយ។
អ្នកនាំពាក្យសន្តិសុខជាតិអាមេរិករូបនេះលើកឡើងថា សហរដ្ឋអាមេរិកនិងបណ្ដាសម្ព័ន្ធមិត្ត ពេលនេះបានលើកបញ្ហានោះចំពោះក្រុមប្រឹក្សាសន្តិសុខអ.ស.ប ឲ្យពិចារណាលើការផ្ដល់មីសីុលនេះរបស់ក្រុងព្យុងយ៉ាង ដែលតំណាងឲ្យការរំលោភបំពានលើទណ្ឌកម្មអ.ស.បប្រឆាំងកូរ៉េខាងជើង។
កាលពីខែតុលាកន្លងមកនេះសហរដ្ឋអាមេរិកធ្លាប់អះអាងថា កុងតឺន័រផ្ទុកឧបករណ៍យោធានិងគ្រាប់រំសេវដល់ទៅជាង១០០០ ត្រូវបានកូរ៉េខាងជើងផ្ដល់ឲ្យរុស្សុីនាប៉ុន្មានសប្ដាហ៍មុននេះ។ ចំណែកកូរ៉េខាងត្បូងក៏វាយតម្លៃដែរថា កូរ៉េខាងជើងធ្លាប់បានផ្ដល់ដល់រុស្សុីគ្រាប់កាំភ្លើងធំជាង១លានគ្រាប់សម្រាប់សង្គ្រាមនៅអ៊ុយក្រែន ជាថ្នូរនឹងការផ្ដល់ការណែនាំខាងបច្ចេកទេសសម្រាប់បណ្ដាផ្កាយរណបរបស់ខ្លួន។
លោក JOHN KIRBY ធ្លាប់ថ្លែងទៅកាន់សារព័ត៌មានថា ជាថ្នូរនឹងការផ្ទេរគ្រឿងសព្វាវុធ ក្រុងព្យុងយ៉ាងស្វែងរក ឲ្យទទួលបានបណ្ដាឧបករណ៍យោធារុស្សុីនិងបណ្ដាបច្ចេកវិទ្យាទំំនើបៗ។ លោកថារុស្សុីក៏មានបំណងទិញមីសីុលពីសម្ព័ន្ធមិត្តអីុរ៉ង់ផងដែរ៕
ចែករំលែកព័តមាននេះ