ឥឡូវនេះបណ្តាញសង្គមសឹងតែដើរតួនាទីជំនួសអោយជំនាញគ្រប់យ៉ាង រាប់ចាប់តាំងពីវេជ្ជបណ្ឌិតរហូតដល់ឱសថការី ដូច្នេះសូមប្រុងប្រយ័ត្នអស់លោក/លោកស្រីដែលចេះតែស្វែងរកពពួកឱសថក៏ដូចជា ផលិតផលលើកសម្រស់ និងប៉ូវកម្លាំងតាមបណ្តាញសង្គម ។
មកដល់ពេលនេះ នៅលើបណ្តាញសង្គមបណ្តាគណនីនៅលើបណ្តាញសង្គមហ្វេសប៊ុកក្តី តេឡេក្រាមក្តី តិកតក់ក្តី ឬបណ្តាញសង្គមផ្សេងៗទៀត ទោះបីជាពួកគេមានលេខបញ្ជីការពីក្រសួងសុខាភិបាល ឬពីស្ថាប័នណាមួយស្របច្បាប់ក៏ដោយ ហើយសូម្បីតែពួកគេជាវេជ្ជបណ្ឌិតដែលរៀនចប់មានចំណេះមានជំនាញក៏ដោយក៏យើងមិនគួរនឹងស្វែងរកប្រភេទទំនិញ ឬឱសថទាំងនេះមកព្យាបាលជំងឺ ឬលេបផ្តេសផ្តាសដោយគ្រាន់តែមើលវីដេអូ ឬតាមដានការផ្សាយដែលពួកគេបន្តផ្ទាល់ ហើយទម្លាក់ទីតាំង ឬលេខទូរស័ព្ទ និងទម្លាក់លុយ រួចយកផលិតផលទាំងនោះមកប្រើប្រាស់ដោយមិនបានពិគ្រោះពិនិត្យ និងធ្វើរោគវិនិច្ឆ័យនោះបានឡើយ ។
នៅពេលបច្ចុប្បន្ននេះ ពពួកក្រុមអ្នកលក់ឱសថតាមប្រព័ន្ធបណ្តាញសង្គមទាំងនេះមានច្រើនណាស់ ហើយម្នាក់ៗ គឺសុទ្ធតែពូកែ ហើយមានអ្នកខ្លះអួតរហូតដល់ថ្នាំទិព្វ ថ្នាំស័ក្តសិទ្ធថែមទៀត ។ ពពួកថ្នាំ ឬឱសថដែលសំបូរហើយត្រូវគេផ្សព្វផ្សាយលក់នៅពេលនេះ គឺច្រើនមាន ពពួកថ្នាំជំនួយផ្លូវភេ.ទ ទឹកនោមផ្អែម ពពួកឈឺសន្លាក់ ថ្នាំប៉ូវជំនួយសុខភាព ថ្នាំជំនួយបេះដូង ថ្នាំបំបាត់ការឈឺចាប់ ក៏ដូចជាពពួកថ្នាំលើកសម្រស់ នោះមិនរាប់បញ្ចូលនូវប្រភេទផលិតផល លាប ដូចជាឡេ ម្សៅ ថ្នាំរិត ឆ្នាំថ្លោះគ្រិចរាប់សិបប្រភេទទៀតឡើយ ។
ពពួកថ្នាំទាំងអស់នេះ ត្រូវបានក្រុមអ្នកលក់តាមអនឡាញ តាមផេកនោះអួតថា មកពីប្រទេសនេះប្រទេសនោះ គឺមានតាំងពីសហរដ្ឋអាមេរិក ម៉ាឡេស៊ី ថៃ ចិន ជប៉ុន ដែលមានតាំងពីពពួកគ្រាប់ និងពពួកសេរ៉ូ ក៏ដូចជាសេរ៉ូមឡើងទៅ ។
ក្រុមអ្នកលក់ទាំងនេះ គឺកំពុងតែប្រកាសលក់ក្តែងៗនៅលើបណ្តាញសង្គម ទោះបីជាពួកគេ ភាគច្រើន គឺគ្មានជំនាញផ្នែកវេជ្ជសាស្ត្រនេះ សូម្បីតែបន្តិច ខណៈដែលគេដឹងថា ដើម្បីក្លាយជាវេជ្ជបណ្ឌិតដែលអាចព្យាបាលជំងឺទូទៅនានា ដើម្បីសង្គ្រោះជីវិតមនុស្សបានគេទាមទារសិក្សាច្រើនឆ្នាំទើបទទួលសញ្ញាប័ត្រ ។ ដើម្បីអាចលក់ថ្នាំ និងក្លាយជាអ្នកព្យាបាលគេបាន គឺគេត្រូវសិក្សាតាំងពីទស្សនៈវិជ្ជា ចិត្តសាស្ត្រ មុខវិជ្ជាមូលដ្ឋានរបស់ពេទ្យតាំងពី ការសិក្សាសារពាង្គកាយរបស់មនុស្សលំអិតតាំងពីក្បាលដងខ្លួន សរសៃឈា.ម ឬសរសសៃប្រាសាទ ជីវៈវិទ្យា ក៏ដូជជាគីមីវិទ្យា ជាដើម ។ រៀនហើយក៏មិនមែនចេញទៅលក់ថ្នាំ និង ព្យាបាល ជំងឺភ្លាមៗដែរ គឺត្រូវឆ្លងកាត់ការធ្វើ ការហាត់ការដកស្រង់បទពិសោធន៍នៅតាមមន្ទីរពេទ្យ រួចប្រឡង ហើយក៏អាចនឹងចេញទៅបន្តសិក្សាឯកទេសមួយរយៈពេលថែមទៀត។
នៅពេលដែលចេញធ្វើការហើយទោះបីជាអាចក្លាយជាវេជ្ជបណ្ឌិតហើយនោះ ក៏ត្រូវចំណាយ ពេលព្យាយាមមើលឯកសារ ស្វ័យសិក្សាទ្រឹស្តី និងការចងក្រងឯកសារថ្មីជាប្រចាំថែមទៀត ទើបអាចនឹងព្យាបាល និងសង្គ្រោះជីវិតមនុស្សបានប្រកបដោយឯកទេសត្រឹមត្រូវ ។ ប៉ុន្តែក្រុមអ្នកលក់ឱថថនៅតាមអនឡាញមិនដូច្នេះឡើយ ។
ក្រុមអាជីវករតាមអនឡាញភាគច្រើន គឺដឹងតែចេញមកឃោសនាហើយអួតផលិតផលខ្លួនឯង សុទ្ធតែឱសថនេះពួកគេដូច្នេះពូកែដូច្នោះ ដែលសកម្មភាពបែបនេះ គឺពិតជាគ្រោះថ្នាក់បំផុត ។ គ្រោះថ្នាក់ទីមួយនោះ គឺថាយើងដែលជាអ្នកដែលប្រើប្រាស់នោះអាចខាតបង់ថវិកា និងលុយកាក់ដែលខ្លួនសន្សំយកទៅទិញផលិតផលទាំងនេះ ។ ចំណុចដែលគួរយកចិត្តទុកដាក់មួយទៀតនោះ គឺយើងមិនដឹងថា នៅក្នុងឱសថទាំងនោះតើវាផ្សំឡើយដោយសារធាតុអ្វីខ្លះ ដែលនោះហើយ គឺជាគ្រោះថ្នាក់ជាពិសេស គឺនៅក្នុងករណីយើងចេះតែបន្តលេប ។ ម្យ៉ាងវិញ ទៀតក្រុមអ្នកលក់ទាំងនេះ នៅក្នុងករណីមានរឿង គឺគ្រាន់តែបិទផេកនោះទៅបើកផេកផ្សេង គឺនៅដដែល រីឯយើងជាអ្នកដែលប្រើប្រាស់នេះ គឺបានត្រឹមតែខូចសុខភាពហើយអាចស្លា.ប់ទាំងខ្លួនថែមទៀតក៏ថាបាន ។
សរុបមកវិញឱសថជាអាវុ.ធមុខពីរសូមកុំស្វែងរកឱសថព្យាយាមជំងឺគ្រប់ប្រភេទតាមបណ្តាញសង្គមពីក្រុមអ្នកលក់ដែលចេះតែអួត តែគ្មានសញ្ញាប័ត្រវេជ្ជបណ្ឌិតជំនាញ ។ រាល់ការសម្រេចចិត្តទិញឱសថនានាយកទៅប្រើប្រាស់គប្បីទៅជួប និងពិគ្រោះយោបល់ជាមួយនឹងក្រុមវេជ្ជបណ្ឌិជំនាញ ហើយយកវេជ្ជបញ្ជានោះទៅឱសថស្ថានដែលមានលើបញ្ជីការ មានទីតាំងច្បាស់លាស់ទើបយើងមានសុវត្ថិភាព ៕
ចែករំលែកព័តមាននេះ