អ៊ីស្រាអែលវា.យប្រហារជាយក្រុងបេរូត សម្លា.ប់ជនទី២នៃក្រុមហាម៉ាស់
សង្គ្រាមអីុស្រាអែលនិងហាម៉ាស់ ៖ មនុស្សច្រើននាក់បានត្រូវស្លា.ប់កាលពីថ្ងៃទី២មករា នៅជាយក្រុង
សង្គ្រាមអីុស្រាអែលនិងហាម៉ាស់ ៖ មនុស្សច្រើននាក់បានត្រូវស្លាប់កាលពីថ្ងៃទី២មករា នៅជាយក្រុងបេរូតរដ្ឋធានីលីបង់ ក្រោយការវាយប្រហារមួយរបស់កងទ័ពអីុស្រាអែល ប្រឆាំងការិយាល័យមួយកន្លែងរបស់ក្រុមហាម៉ាស់ប៉ាឡេស្ទីន។ តាមបណ្ដាអ្នកទទួលខុសត្រូវលីបង់ថា ជនទី២នៃការិយាល័យនយោបាយរបស់ចលនាហាម៉ាស់ លោកសាឡេហ៍អាល់អារូរីបានត្រូវស្លាប់ក្នុងការវាយប្រហារនេះ។ ការវាយប្រហារនោះនាំឲ្យមានការភ័យខ្លាចថែមទៀតពីការរាលដាលនៃជម្លោះអីុស្រាអែល-ប៉ាឡេស្ទីនទៅកាន់កន្លែងថ្មីទៀតក្នុងតំបន់។
ទីភ្នាក់ងារព័ត៌មានជាតិលីបង់NNAបានផ្ដល់តុល្យការដំបូងនៃការវាយប្រហារនោះរបស់ដ្រូនអីុស្រាអែលថា មានមនុស្ស៤នាក់ស្លាប់និងច្រើននាក់ទៀតរងរបួស ពេលការិយាល័យរបស់ហាម៉ាស់រងការវាយប្រហារ។ ទីភ្នាក់ងារព័ត៌មាននោះគូសបញ្ជាក់ថា ការវាយប្រហារនេះកើតមាននៅដាហីុយេជាយក្រុងខាងត្បូងនៃក្រុងបេរូត ជាតំបន់របស់ក្រុមហេសប៊ុលឡាហ៍លីបង់។ ចំណែកទូរទស្សន៍ផ្លូវការរបស់ក្រុមហាម៉ាស់បានបរិហារការធ្វើឃាតលោកសាឡេហ៍អាល់អារូរី ដែលរស់នៅនិរទេសក្នុងប្រទេសលីបង់ ចាប់តាំងពីច្រើនឆ្នាំមកហើយ។ បន្តិចក្រោយមកចំនួនជនរងគ្រោះស្លាប់បានឡើងដល់៦នាក់ ដូចការប្រកាសរបស់ទីភ្នាក់ងារព័ត៌មានលីបង់មួយទៀត។
AFP បានដកស្រង់សម្ដីបណ្ដាអ្នកទទួលខុសត្រូវលីបង់ថា ជនលេខ២របស់ហាម៉ាស់ជាសមាជិកស្ថាបនិកសាខាប្រដាប់អាវុធរបស់ហាម៉ាស់ នៅតំបន់សីុសហ្ស៊កដានី បានស្លាប់រួមជាមួយបណ្ដាអង្គរក្សលោក ហើយអ្នកទទួលខុសត្រូវដទៃៗទៀតរបស់ក្រុមប្រដាប់អាវុធហាម៉ាស់អាចស្ថិតក្នុងចំណោមជនរងគ្រោះ។
កាសែតអង់គ្លេសTHE GUARDIANនិយាយថា ជនលេខ២របស់ហាម៉ាស់នោះប្រហែលជាកំពុងស្ថិតនៅក្នុងអគាររងការវាយប្រហារ ពេលមានកិច្ចប្រជុំមួយរបស់ក្រុមប៉ាឡេស្ទីនជាមួយបណ្ដាអ្នកទទួលខុសត្រូវរបស់ហេសប៊ុលឡាហ៍។
លោកសាឡេហ៍អាល់អារូរីធ្លាប់ត្រូវបាននាយករដ្ឋមន្ត្រីអ៊ីស្រាអែលលោកបេនចាមីននេតាន់យ៉ាហ៊ូគំរាមសម្លាប់ តាំងពីមុនការវាយប្រហាររបស់ក្រុមហាម៉ាស់លើអ៊ីស្រាអែលថ្ងៃទី៧តុលា។ លោកនេតាន់យ៉ាហ៊ូក៏ធ្លាប់ស្នើដល់កងទ័ពលោកនិងភ្នាក់សម្ងាត់អ៊ីស្រាអែល តាមធ្វើឃាតបណ្ដាអ្នកទទួលខុសត្រូវក្រុមហាម៉ាស់ទោះជានៅទីណាក្ដី។ លោកក៏ជាកម្មវត្ថុនៃទណ្ឌកម្មរបស់អាមេរិកនិងធ្លាប់ជាប់ក្នុងពន្ធនាគារអីុស្រាអែលអស់ពេលដល់ជិត២០ឆ្នាំ ៕
ចែករំលែកព័តមាននេះ