គម្រោងវិនិយោគធំៗចិននៅកម្ពុជានឹងចាប់ផ្តើមប្រមូលលុយបានច្រើននៅឆ្នាំ ២០២៤នេះ ផលបន្ទាប់ពីការបោះទុនវិនិយោគប៉ុន្មានឆ្នាំមកនោះ ។ ដើម្បីពន្លឿនការអភិវឌ្ឍប្រទេសជាតិ កម្ពុជាបានកំពុងទាក់ទាញការវិនិយោគពីបរទេស លើគ្រប់វិស័យ ដោយឈរលើច្បាប់ និងការអនុគ្រោះជាច្រើន ដែលជាអំណោយផលមួយដល់ការមកបណ្ដាក់ទុនរបស់បរទេសនៅកម្ពុជា…
គម្រោងវិនិយោគធំៗចិននៅកម្ពុជានឹងចាប់ផ្តើមប្រមូលលុយបានច្រើននៅឆ្នាំ ២០២៤នេះ ផលបន្ទាប់ពីការបោះទុនវិនិយោគប៉ុន្មានឆ្នាំមកនោះ ។ ដើម្បីពន្លឿនការអភិវឌ្ឍប្រទេសជាតិ កម្ពុជាបានកំពុងទាក់ទាញការវិនិយោគពីបរទេស លើគ្រប់វិស័យ ដោយឈរលើច្បាប់ និងការអនុគ្រោះជាច្រើន ដែលជាអំណោយផលមួយដល់ការមកបណ្ដាក់ទុនរបស់បរទេសនៅកម្ពុជា ។
ក្រៅពីនេះសន្តិភាព ស្ថិរភាពសង្គម ការគោរពច្បាប់ ជាផ្នែកសំខាន់ដែលមិនអាចខ្វះបាន ។ គម្រោងធំៗមួយចំនួនបានដាក់ឱ្យដំណើរជាបន្តបន្ទាប់ នៅក្នុងនោះមានដូចជាគម្រោងផ្លូវល្បឿនលឿនភ្នំពេញខេត្តព្រះសីហនុ ដែលបានសម្ពោធដាក់ឱ្យប្រើប្រាស់កាលពីឆ្នាំ២០២២ គម្រោងអាកាសយានដ្ឋានអន្តរជាតិសៀមរាប អង្គរ ដែលសម្ពោធដាក់ឱ្យប្រើប្រាស់កាល ពីឆ្នាំ២០២៣ កន្លងមកថ្មីៗនេះជាដើម។
ក្រោយពីបានបើកដំណើរការប្រមាណជា២ឆ្នាំកន្លងមក នៅក្នុងឱកាសចូលឆ្នាំសកល ឆ្នាំ២០២៤ បីថ្ងៃកន្លងមកនេះ ផ្លូវល្បឿនលឿនភ្នំពេញ-ខេត្តព្រះសីហនុ មានយានយន្តសរុបជាង៨ម៉ឺនគ្រឿង បានឆ្លងកាត់ផ្លូវល្បឿនលឿន តែមួយគត់របស់កម្ពុជា និងដែលជាការវិនិយោគដោយក្រុមហ៊ុនចិនមួយនេះ ។
តាមឱ្យការដឹងរបស់មន្ត្រីក្រសួងសាធារណៈ និងដឹកនាំជញ្ជូនថា ក្នុងថ្ងៃទី៣០ ខែធ្នូ ឆ្នាំ២០២៣ មានយានយន្តឆ្លងកាត់២១,៩០០គ្រឿង, ថ្ងៃទី៣១ ខែធ្នូ ឆ្នាំ២០២៣ មានយានយន្តឆ្លងកាត់ចំនួន២៨,៩០០គ្រឿង និងថ្ងៃទី១ ខែមករា ឆ្នាំ២០២៤ មានយានយន្តឆ្លងកាត់ចំនួន៣៣,១០០គ្រឿង ។ តាមចំនួនរថយន្ត៨ម៉ឺននេះធ្វើឱ្យវិស័យឯកជនដែលបានវិនិយោគបានទទួលផលជាទីមោទនពីការរកស៊ីនៅកម្ពុជាផងដែរ ។
ជាមួយវត្តមានរថយន្តចំនួន៨ម៉ឺនគ្រឿងឆ្លងកាត់ក្នុងរយៈពេលបីថ្ងៃនេះ គេអាចគិតជាមធ្យមរថយន្តមួយត្រូវបង់ថ្លៃ ក្នុងមួយជើងចំនួន១២ដុល្លារនោះ ឃើញថាក្រុមហ៊ុនវិនិយោគលើផ្លូវល្បឿនលឿននេះអាចទទួលបានចំណូលប្រមាណ៨៨ម៉ឺនដុល្លារ ។
ផ្លូវល្បឿនលឿនភ្នំពេញ-ព្រះសីហនុ មានប្រវែង១៨៧.០៥គីឡូម៉ែត្រ ជាផ្លូវរបៀងយុទ្ធសាស្ត្រសំខាន់បំផុតនៅកម្ពុជាជួយកាត់បន្ថយ ពេលវេលាធ្វើដំណើរពីរាជធានីភ្នំពេញ ទៅផែសមុទ្រ ក្រុងព្រះសីហនុពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ ។ ផ្លូវល្បឿនលឿននេះសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) ចំណាយថវិកាជិត ២ពាន់លានដុល្លារ បានសម្ពោធដាក់ឱ្យប្រើប្រាស់នានៅថ្ងៃទី៩ ខែវិច្ឆិកា ឆ្នាំ២០២២។
ផ្លូវល្បឿនលឿនភ្នំពេញ-ព្រះសីហនុ វិនិយោគក្រោមរូបភាព(BTO) គឺសាងសង់ ប្រតិបត្តិការ ហើយចុងក្រោយផ្ទេរមកជូនរដ្ឋាភិបាលកម្ពុជា ។ ថ្លៃសេវាឆ្លងកាត់ផ្លូវនេះអាស្រ័យលើប្រភេទរថយន្តទំហំស៊ីឡាំងម៉ាស៊ីនរថយន្តដែលជាមធ្យមម្ចាស់រថយន្តត្រូវចំណាយ ថវិកា៨សែនដុល្លារក្នុងមួយគីឡូម៉ែត្រ ពោលក្នុងការធ្វើដំណើរលើផ្លូវជិត២០០គីឡូម៉ែត្រនេះ សម្រាប់រថយន្តគ្រួសារចំណាយថវិកាជិត១២ដុល្លារក្នុងការធ្វើដំណើរមួយជើង ។
ផ្លូវល្បឿនលឿនពីភ្នំពេញ-ព្រះសីហនុ មានការកកស្ទះយ៉ាងខ្លាំងនៅបញ្ជរបង់ប្រាក់ រាជធានីភ្នំពេញ នៅល្ងាចថ្ងៃទី១ ខែមករា ឆ្នាំ២០២៤ ។ ការកកស្ទះនេះ អាជ្ញាធរបានណែនាំឱ្យអ្នកដំណើររកផ្លូវវាងមកតាមផ្លូវជាតិលេខ៤ តាមច្រកកំពង់ស្ពឺខាងលិច ឬខាងកើតក៏បាន ។
បើយោងតាមសេចក្តីប្រកាសរបស់ក្រសួងសាធារណៈការ និងដឹកជញ្ជូន ការកកស្ទះ បណ្តាលមកពីពលរដ្ឋមិនទាន់យល់ដឹងច្បាស់ការប្រើប្រាស់គន្លងផ្លូវ។ កម្ពុជាទើបមានផ្លូវល្បឿនលឿនភ្នំពេញ ខេត្តព្រះសីហនុមួយខ្សែប៉ុណ្ណោះ ខណៈដែលផ្លូវប្រភេទនេះខ្សែរទី២ ភ្នំពេញ ស្វាយរៀង ក្រុងបាវិត កំពុងសាងសង់ ចំណែកផ្លូវខ្សែទី៣ ភ្នំពេញ ខេត្តសៀមរាបកំពុងសិក្សា ។
ចំណែកព្រលានយន្តហោះអន្តរជាតិសៀមរាបអង្គរ ដែលវិនិយោគដោយក្រុមហ៊ុនចិនដែរនោះក៏ទំនងជានឹងចាប់ផ្តើមរកលុយបានច្រើននៅឆ្នាំ២០២៤នេះ ផងដែរ ពីព្រោះឆ្នាំ២០២៤នេះគេរំពឹងថាចំនួនទេសចរបរទេសមកកាន់ខេត្តសៀមរាបនឹងមានការកើនឡើងច្រើន។ ព្រលានយន្តហោះនេះទើបតែសម្ពោធអោយប្រើប្រាស់ជាផ្លូវការកាលពីឆ្នាំ២០២៣ ប៉ុណ្ណោះ ។ ការចូលរួមវិនិយោគរបស់បរទេស មិនត្រឹមធ្វើឱ្យកម្ពុជាទទួលបានហេដ្ឋារចនាសម្ព័ន្ធថ្មីទំនើបប៉ុណ្ណោះទេ តែនឹងជំរុញកំណើនសេដ្ឋកិច្ចកម្ពុជា សម្រួលការរស់នៅរបស់ពលរដ្ឋ ជាពិសេសបានចូលរួមលើកកម្ពស់ជីវភាពពលរដ្ឋផងដែរ ។
ក្រៅគម្រោងហេដ្ឋាចរនាសម្ព័ន្ធ វិស័យឯកជនមកពីបរទេសបានកំពុងវិនិយោគនៅកម្ពុជាក្នុងវិស័យជាច្រើនទៀត ដូចជា កសិកម្ម ទេសចរណ៍ ហើយស្របពេលដែលកម្ពុជាមានការអភិវឌ្ឍ ក្រុមហ៊ុនទាំងនោះក៏បានកំពុងប្រមូលផលពីការវិនិយោគរបស់ខ្លួនទៅវិញដែរ ៕
ចែករំលែកព័តមាននេះ