ខេត្តតាកែវ ៖ ម្តាយយើង ម្តាយគេ! ពេលដែលឃើញមនុស្សមានវ័យចំណាស់ ត្រូវរស់ទីពឹងខ្លួនឯង ពិតជាអាសូរពេកក្រៃ ព្រោះតែវ័យរបស់គាត់សមតែទទួលបានការមើលថែ និងមានឱកាសទៅបុណ្យទាននៅតាមទីអារាម។ ប៉ុន្តែជីវិ.តរបស់លោកយាយ អ៊ឹម អ៊ូក អាយុ៨៧ឆ្នាំ បែរជាត្រូវធ្វើដំណើរចេញ ពីខេត្តតាកែវ មកលក់សណ្តែកដីស្ងោរ នៅឯរាជធានីភ្នំពេញនាព្រឹក ហើយត្រូវវិលត្រឡប់ទៅផ្ទះវិញនាពេលល្ងាច។
យ៉ាងណាមិញ ដូចពាក្យចាស់តែងពោលថា «ខ្លួនទីពឹងខ្លួន» បើមិនជួយខ្លួនឯងមុនទេ គឺទេវតាមិនជួយនោះទេ។ តួយ៉ាង ការតស៊ូរបស់លោកយាយ អ៊ឹម អ៊ូក ត្រូវបានដឹងលឺដល់ថ្នាក់ដឹកនាំ រហូតទទួលបាននូវដំណឹងដ៏រីករាយមួយ នោះគឺសម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា បានចេញមុខជួយលោកយាយហើយ។
សម្តេចតេជោ ហ៊ុន សែន ប្រធានគណបក្សប្រជាជនកម្ពុជា កាលពីរាត្រីថ្ងៃទី២ ខែមករា ឆ្នាំ២០២៤នេះ បានប្រកាសផ្ដល់ប្រាក់ឧបត្ថម្ភដល់លោកយាយ អ៊ឹម អ៊ូក ដែលមានវ័យ៨៧ឆ្នាំ ចំនួន៥០ម៉ឺនរៀលជារៀងរាល់ខែ ដើម្បីដោះស្រាយជីវភាពប្រចាំថ្ងៃ។ ក្នុងនោះផងដែរ សម្ដេចតេជោ ក៏បានបញ្ជាឱ្យលោក សេង ទៀង មន្ត្រីជំនិតសម្ដេច ទទួលបន្ទុកលើករណីនេះផងដែរ។
សម្តេចតេជោ បានបញ្ជាក់នៅក្នុងសំណេររបស់សម្តេចថា «ខ្ញុំសំណូមពរឱ្យគាត់ឈប់លក់សណ្តែកដី ដែលធ្វើដំណើរផ្លូវឆ្ងាយ ដោយជំនួសវិញនូវការផ្តល់ថវិការរបស់ខ្ញុំ៥០ម៉ឺនរៀលក្នុងមួយខែ។ ទឹកប្រាក់នេះ មានចំនួនច្រើនជាងប្រាក់ដែលគាត់លក់បាន៥ពាន់ទៅ១ម៉ឺនរៀលក្នុងមួយថ្ងៃ»។
សូមបញ្ជាក់ថា លោកយាយ អ៊ឹម អ៊ូក មានទីលំនៅក្នុងខេត្តតាកែវ ត្រូវធ្វើដំណើរមកលក់សណ្តែកដីស្ងោរ នៅរាជធានីភ្នំពេញនាព្រឹក ហើយវិលត្រឡប់ទៅផ្ទះវិញ នាពេលល្ងាចជារៀងរាល់ថ្ងៃ ។
ក្រោយទទួលបានព័ត៌មាននេះ សម្ដេចតេជោ ក៏បានបញ្ជាឱ្យលោក សេង ទៀង នាំយកថវិកា២លានរៀល ជូនលោកយាយ អ៊ឹម អ៊ូក នៅស្រុកកំណើតនាខេត្តតាកែវ កាលពីថ្ងៃទី២ ខែមករា ឆ្នាំ២០២៤។
តាមរយៈវីដេអូឃ្លីបខ្លីមួយ ដែលបានបង្ហោះនៅក្នុងហ្វេសប៊ុករបស់សម្តេចតេជោផងដែរនោះ លោក យាយ អ៊ឹម អ៊ូក បានសន្យាឈប់លក់សណ្ដែកដីស្ងោរ តាមសំណូមពររបស់សម្ដេច ហ៊ុន សែន។
ជាមួយនឹងការប្រកាសជួយឧបត្ថម្ភលោកយាយដែលមានវ័យជរានេះ មហាជនបានសម្តែងនូវសេចក្តីត្រេកអរជំនួសលោកយាយ ដែលត្រូវបានសម្តេចតេជោជួយដល់ជីវភាព និងអ្នកប្រើប្រាស់បណ្តាញសង្គម ក៏បានសម្តែងនូវក្តីដឹងគុណចំពោះសម្តេចផងដែរ ដែលតែងតែជួយទុក្ខលំបាករបស់ប្រជា ជន៕
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ