ក្រុមហ៊ុន Airbus និងប្រទេសបារាំង ត្រៀមស៊ើបអង្កេតករណីឆេះយន្តហោះនៅជប៉ុន
ទីក្រុងតូក្យូ៖ ក្រុមហ៊ុនអ៊ែរបឺស និងរដ្ឋាភិបាលបារាំងត្រៀមបញ្ជូនក្រុមការងារទៅប្រទេសជប៉ុនដើម្បី
ទីក្រុងតូក្យូ៖ ក្រុមហ៊ុនអ៊ែរបឺស និងរដ្ឋាភិបាលបារាំងត្រៀមបញ្ជូនក្រុមការងារទៅប្រទេសជប៉ុនដើម្បី
ទីក្រុងតូក្យូ៖ ក្រុមហ៊ុនអ៊ែរបឺស និងរដ្ឋាភិបាលបារាំងត្រៀមបញ្ជូនក្រុមការងារទៅប្រទេសជប៉ុនដើម្បីស៊ើបអង្កេតសំណុំរឿងយន្តហោះពីរគ្រឿងបុកគ្នានៅពេលចុះចតនៅអាកាសយានដ្ឋានហានេដា (Haneda) នៃទីក្រុងតូក្យូកាលពីល្ងាចម្សិលមិញ។ ដោយសារយន្តហោះដែលឆាបឆេះយ៉ាងសន្ធោសន្ធៅនោះម៉ាកអ៊ែរបឺសអា៣៥០ (Airbus A350) ដូចនេះ ក្រុមហ៊ុនអ៊ែរបឺសនឹងបញ្ជូនក្រុមអ្នកជំនាញដើម្បីពន្លឿនការស៊ើបអង្កេត។ គួររំលឹកថា អ្នកដំណើរជប៉ុនជម្លៀសខ្លួនដោយសុវត្ថិភាពចេញពីយន្តហោះកំពុងឆេះ
សូមរំលឹកឡើងវិញថា កាលពីល្ងាចថ្ងៃអង្គារ យន្តហោះអ៊ែរបឺសខាងលើចុះចតនៅលើផ្លូវសុខៗ ស្រាប់តែបើកទៅបុកមួយទំហឹងជាមួយយន្តហោះខ្នាតតូចរបស់ឆ្មាំការពារដែនសមុទ្ទជប៉ុន បណ្ដាលឱ្យឆេះយ៉ាងសន្ធោសន្ធៅមួយរំពេច។ ប៉ុន្តែសំណាងល្អ អ្នកជិះនៅក្នុងយន្តហោះអ៊ែរបឺសដែលមានគ្នាសរុប៣៧៩នាក់ (អ្នកដំណើរ៣៦៧នាក់ និងបុគ្គលិកក្រុមហ៊ុនអាកាសចរណ៍១២នាក់) អាចរួចផុតពីសេចក្ដីស្លាប់យ៉ាងចម្លែក។
ដោយឡែកងាកមកចាប់អារម្មណ៍ទៅលើក្រុមហ៊ុនអ៊ែរបឺស និងរដ្ឋាភិបាលបារាំងដែលគ្រោងបញ្ជូនមនុស្សទៅជប៉ុនវិញម្ដង។ តាមរយៈសេចក្ដីថ្លែងការណ៍ចុះផ្សាយកាលពីយប់មិញ ក្រុមហ៊ុនអ៊ែរបឺសបញ្ជាក់ថាយន្តហោះម៉ាកអា៣៥០ (A350)នោះត្រូវបានលក់ទៅឱ្យក្រុមហ៊ុនអាកាសចរណ៍របស់ជប៉ុនកាលពីខែវិច្ឆិកា ឆ្នាំ២០២១ (គិតទៅយន្តហោះនៅថ្មីនៅឡើយទេ)។
ក្រុមហ៊ុនថ្លែងបន្តទៀតថាការចាត់ក្រុមការងារចុះទៅប្រទេសជប៉ុនលើកនេះស្របទៅតាមការផ្ដល់អនុសាសន៍ពីសំណាក់ស្ថាប័នអាកាសចរណ៍ស៊ីវិលអន្តរជាតិ (International Civil Aviation Organization)។ គោលបំណងធំរបស់ក្រុមហ៊ុនគឺផ្ដល់ការគាំទ្រផ្នែកបច្ចេកទេសសម្រាប់អាជ្ញាធរជប៉ុនដែលធ្វើការលើផ្នែកធានាសុវត្ថិភាពក្នុងការដឹកជញ្ជូន។ ទន្ទឹមនឹងនោះកាលពីយប់មិញ ទីភ្នាក់ងារអាកាសចរណ៍ប្រទេសបារាំងប្រាប់ថាខ្លួនក៏ត្រៀមបញ្ជូនក្រុមអ្នកស៊ើបអង្កេតទៅប្រទេសជប៉ុនផងដែរ។
ពាក់ព័ន្ធនឹងហេតុការណ៍ឆេះយន្តហោះនេះ, គេអាចដឹងតម្រុយខ្លះៗជាបណ្ដើរៗហើយ។ មុនពេលកើតហេតុ, ក្រុមអ្នកត្រួតពិនិត្យការហោះហើរនៅព្រលានយន្តហោះហានេដា (Haneda) នៃទីក្រុងតូក្យូ បានឱ្យសញ្ញាទៅយន្តហោះរបស់ក្រុមហ៊ុនអាកាសចរណ៍ជប៉ុនអ៊ែរឡាញ (Japan Airlines) ថាអាចចុះចតបាន។ ពេលនោះ ដោយសារយន្តហោះខ្នាតតូចរបស់ឆ្មាំការពារដែនសមុទ្ទជប៉ុនក៏ស្ថិតនៅលើគន្លងផ្លូវតែមួយ អ្នកត្រួតពិនិត្យការហោះហើរក៏ឱ្យសញ្ញាទៅយន្តហោះខ្នាតតូចនោះឱ្យទច់ដំណើរមួយគ្រាសិន កុំទាន់ហោះឡើង ចាំអ៊ែរបឺសចុះចតដល់ដីសិន។ នេះបើយោងតាមប្រភពពីក្រសួងដឹកជញ្ជូនជប៉ុន។
ដោយសារទទួលបានសញ្ញានេះហើយទើបយន្តហោះជប៉ុនអ៊ែរឡាញចុះចតនៅលើផ្លូវ ហើយក៏បុកគ្នាមួយទំហឹង បង្កើតជាអណ្ដាតភ្លើងឆាបឆេះមួយរំពេចនៅម៉ោង៦ល្ងាច (ត្រូវនឹងម៉ោង៤រសៀលនៅកម្ពុជា)។ យន្តហោះទាំងពីរគ្រឿងក៏ឆេះយ៉ាងសន្ធោសន្ធៅដូចគ្នា។ នៅក្នុងចំណោមមនុស្ស៦នាក់ដែលជិះនៅក្នុងយន្តហោះខ្នាតតូចនោះ មានតែអាកាសយានិកធំ ឬកាពីទែនម្នាក់ប៉ុណ្ណោះដែលនៅរស់។ ចំណែកមនុស្ស៥នាក់ទៀតស្លាប់ទាំងអស់។
ដោយឡែក អ្នកជិះនៅក្នុងយន្តហោះអ៊ែរបឺសអាចគ្រប់គ្រងស្ថានការណ៍បានល្អ។ ពួកគេខំទប់អារម្មណ៍មិនឱ្យជ្រួលច្របល់ខ្លាំងពេក ទោះបីអ្នកខ្លះស្រែកកងរំពងចេញពីក្នុងយន្តហោះដែលត្រូវភ្លើងឆេះ និងបញ្ចេញផ្សែងហុយទ្រលោមពេញផ្ទៃអាកាស។ ពួកគេខំប្រឹងបើកទ្វារនៅលើយន្តហោះចំនួនបីឱ្យចំហទាំងអស់ ហើយចុះពីលើនោះតាមសម្រួល។ អ្នកខ្លះដាក់ជាសំណួរថាតើនេះជាអព្ភូតហេតុអស្ចារ្យ ឬជាសំណាងមួយនៅក្នុងចំណោមមួយម៉ឺនគ្រោះថ្នាក់ឬយ៉ាងណាដែលពួកគេអាចរំដោះខ្លួនចេញដោយសុវត្ថិភាព? (ប្រភព៖ NHK និងប្រភពដទៃទៀត)
ចែករំលែកព័តមាននេះ