ទី​ក្រុង​តូក្យូ៖ គ្រាន់​តែ​ឆ្លង​ចូល​ឆ្នាំ​២០២៤​ភ្លាម ប្រទេស​ជប៉ុន​ហាក់​ដូចជា​យីអ៊ុន​ដាក់​ខ្លាំង​មែន​ទែន​។ ប្រទេស​នេះ​​ជួប​នឹង​គ្រោះ​​រញ្ជួយ​ដី​​​កាល​ពី​ថ្ងៃ​ចន្ទ​​​ ​បណ្ដាល​ឱ្យ​ស្លាប់​មនុស្ស​យ៉ាង​តិច​៤៨​នាក់​,​ និង​ខូច​ខាត​ទ្រព្យ​សម្បត្តិ​​​ជា​ច្រើន​ មិន​​ទាន់​បញ្ចប់​នៅ​ឡើយ​ផង​ ឥឡូវ​នេះ ​​មាន​​ហេតុ​ការណ៍​ឆេះ​យន្ត​ហោះ​ដឹក​អ្នក​ដំណើរ​​នៅ​អាកាស​យាន​ដ្ឋាន​នៃ​ទី​ក្រុង​តូក្យូ​​ថែម​ទៀត​​។ សាក្សី​និយាយ​ថា​អ្នក​ដំណើរ និង​បុគ្គលិក​ក្រុម​​ហ៊ុន​អាកាស​ចរណ៍​សរុប​ចូល​គ្នា​ស្មើ​នឹង​៣៧៩​នាក់​អាច​ជម្លៀស​ខ្លួន​ដោយ​សុវត្ថិ​ភាព​។

​សាក្សី​និយាយ​ថា​​យន្ត​ហោះ​នេះ​ប៉ះ​ទង្គិច​គ្នា​ជា​មួយ​យន្ត​ហោះ​ខ្នាត​តូច​មួយ​គ្រឿង​របស់​ឆ្មាំ​ការ​ពារ​ដែន​សមុទ្ទ​។ ​​​ដោយ​ឡែក​ ​បុគ្គលិក​៥​នាក់​នៅ​ក្នុង​ចំណោម​៦​នាក់​ដែល​ស្ថិត​នៅ​ក្នុង​យន្ត​ហោះ​របស់​ឆ្មាំ​ការ​ពារ​ដែន​សមុទ្ទ​មិន​ទាន់​ដឹង​ថា​ស្លាប់​ ឬ​រស់​នៅ​ឡើយ​ទេ​។ នៅ​ក្នុង​ចំណោម​នោះ មាន​តែ​អាកាស​យានិក​ធំ​ម្នាក់​ប៉ុណ្ណោះ​ដែល​គេ​ដឹង​ថា​គាត់​​​អាច​រួច​ផុត​ជីវិត​ពី​គ្រោះ​ថ្នាក់​​​។​

​តាម​រយៈ​រូប​ភាព​នៅ​​​កន្លែង​កើត​ហេតុ​​ដែល​ផ្សាយ​បន្ត​ផ្ទាល់​តាម​​រយៈ​កញ្ចក់​​ទូរ​ទស្សន៍​អឹន​អេច​ខេ​ជប៉ុន​ ​(NHK)​ ​គេ​ឃើញ​យន្ត​ហោះ​ម៉ាក​អ៊ែរបឺស​អា​៣៥០ (Airbus A350) របស់​ក្រុម​ហ៊ុន​អាកាស​ចរណ៍​ជប៉ុន​អ៊ែរឡាញ​ (Japan Airlines) ​ឆេះ​នៅ​ក្នុង​អណ្ដាត​ភ្លើង​យ៉ាង​​​សន្ធោ​សន្ធៅ​ បន្ទាប់​ពី​យន្ត​ហោះ​​បើក​ចាក​គន្លង​ផ្លូវ​នៅ​ពេល​ចុះ​ចត​។ ទោះ​បី​ទី​ភ្នាក់​ងារ​ពន្លត់​អគ្គិភ័យ​នៅ​អាកាស​យាន​ដ្ឋាន​ព្យាយាម​អស់​ពី​សមត្ថ​ភាព​ដើម្បី​ពន្លត់​ភ្លើង​​​យ៉ាង​ណា​​ក្ដី  ក៏​ប៉ុន្តែ​នៅ​ទី​បញ្ចប់​​ភ្លើង​ឆេះ​ពេញ​បន្ទុក​តែ​ម្ដង​​។

នេះ​ជា​រឿង​គួរ​ឱ្យ​ភ្ញាក់​ផ្អើល​មួយ​ហើយ​ ប៉ុន្តែ​រឿង​ដែល​គួរ​ឱ្យ​ភ្ញាក់​ផ្អើល​បំផុត​ដែល​អាច​​ចាត់​ទុក​​ថា​ជា​អព្ភូត​ហេតុ​ចម្លែក​​ក៏​បាន​ដេរ​គឺ​​ទោះ​បី​ត្រូវ​​​ហ៊ុម​ព័ទ្ធ​ដោយ​ភ្លើង​យ៉ាង​នេះ​ក្ដី​ ក៏​អ្នក​ដំណើរ​ និង​បុគ្គលិក​អាកាស​ចរណ៍​អាច​ជម្លៀស​ខ្លួន​ដោយ​សុវត្ថិ​ភាព​គ្រប់​ៗ​គ្នា​ដោយ​គ្មាន​នរណា​ម្នាក់​រង​របួស​ធ្ងន់​ធ្ងរ​ឡើយ​។​ ​ក្នុង​​នោះ អ្នក​ដំណើរ​៣៦៧​នាក់​ និង​បុគ្គលិក​ក្រុម​ហ៊ុន​អាកាស​ចរណ៍​១២​នាក់​​។​

​តាម​រយៈ​វីឌីអូ​ឃ្លីប​ដែល​គេ​​ចែក​ចាយ​ត​គ្នា​យ៉ាង​ព្រោង​ព្រាត​តាម​បណ្ដាញ​សង្គម គេ​ឃើញ​អ្នក​ដំណើរ​ដែល​ស្ថិត​នៅ​ក្នុង​យន្ត​ហោះ​កំពុង​ឆាប​ឆេះ​នោះ​ស្រែក​កង​រំពង​​​ចេញ​ពី​ក្នុ​ង​យន្ត​ហោះ​​​ ខណៈ​ដែល​មាន​ភ្លើង និង​ផ្សែង​ហុយ​ទ្រលោម​​​​ទៅ​លើ​អាកាស​​។ អ្នក​​ខ្លះ​ចុះ​ដល់​ដី​ ហើយ​រត់​ប្រសាច​ពេញ​​ដង​ផ្លូវ​​។​ អ្នក​នាំ​ពាក្យ​ឆ្មាំ​កា​រពារ​ដែន​សមុទ្ទ​ជប៉ុន​ថ្លែង​ថា​ការ​ប៉ះ​គ្នា​​រវាង​យន្តហោះ​ដឹក​អ្នក​ដំណើរ​ និង​យន្ត​ហោះ​របស់​ឆ្មាំ​សមុទ្ទ​កើត​ឡើង​នៅ​ពេល​យន្ត​ហោះ​ឆ្មាំ​សមុទ្ទ​​ត្រៀម​​​ចាក​ចេញ​ដំណើរ​ឆ្ពោះ​ទៅ​​អាកាស​យាន​ដ្ឋាន​នីអ៊ីហ្កាតាក់ (Niigata airport)​ ​​​ដើម្បី​​យក​​ជំនួយ​ទៅ​ចែក​ជូន​អ្នក​ដែល​កំពុង​ជាប់​ផុង​នៅ​មួយ​កន្លែង​​​ដោយ​សារ​ការ​​រញ្ជួយ​ដី​។

​ក្រុម​ហ៊ុន​អាកាស​ចរណ៍​ជប៉ុន​អ៊ែរឡាញ (Japan Airlines) ​ថ្លែង​ថា​យន្ត​ហោះ​របស់​​​ខ្លួន​​​មួយ​គ្រឿង​​ចាក​ចេញ​​ពី​អាកាស​យាន​ដ្ឋាន​ស៊ីនឈីតូសេ (Shin-Chitose) ​ស្ថិត​នៅ​លើ​កោះ​ហុក​កៃដូ (Hokkaido)។ ក្រោយ​​ហេតុ​ការណ៍​នេះ នាយក​រដ្ឋ​មន្ត្រី​ជប៉ុន ​បាន​បញ្ជា​ឱ្យស្ថាប័ន​ពាក់​ព័ន្ធ​ទាំង​អស់​សហ​ការ​គ្នា​ដើម្បី​វាយ​តម្លៃ​ទៅ​លើ​ទំហំ​នៃ​ការ​ខូច​ខាត​ឱ្យ​បាន​ជា​ប្រញាប់​ ដើម្បី​រាយ​ការណ៍​ជូន​សារណ​ជន​ឱ្យ​បាន​ជ្រាប​ច្បាស់​អំពី​ស្ថាន​ការណ៍​ពិត​។ នេះ​បើ​យោង​តាម​ការ​ប្រកាស​របស់​ខុទ្ទ​កាល័យ​របស់​លោក​៕​

ប្រភព៖ Reuters
https://www.reuters.com/world/asia-pacific/fire-breaks-out-plane-runway-japans-tokyo-haneda-airport-nhk-2024-01-02/

ព័ត៌មាន​បច្ចុប្បន្ន​ភាព​​ចុង​ក្រោយ​បង្ហាញ​ថា​មនុស្ស​​៥​នាក់​ដែល​ស្ថិត​នៅ​ក្នុង​យន្ត​ហោះ​ខ្នាត​តូច​របស់​ឆ្មាំ​ការ​ពារ​ដែន​សមុទ្ទ​ជប៉ុន​បាន​ស្លាប់​ហើយ​ ហើយ​គេ​បាន​រក​ឃើញ​សាក​សព​​របស់​ពួកគេ​​​គ្រប់​ចំនួន​​រួច​ហើយ​​។ នេះ​បើ​យោង​តាម​ទី​ភ្នាក់​ងារ​ព័ត៌​មាន​អា​អែហ្វ​ប៉េ​ (AFP) ដែល​ដក​ស្រង់​ប្រភព​ពី​​រដ្ឋ​មន្ត្រី​ក្រសួង​ដឹក​ជញ្ជូន​របស់​ប្រទេស​ជប៉ុន​។ ប្រព័ន្ធ​ផ្សព្វ​ផ្សាយ​របស់​​​ជប៉ុន​អឹន​អេច​ខេ (NHK) ​ក៏​បាន​បញ្ជាក់​ថា​អ្នក​ទាំង​ប្រាំ​នាក់​នោះ​​​បាន​ស្លាប់​ពិត​ប្រាកដ​​មែន​។ និយាយ​ដោយ​សង្ខេប​ មាន​តែ​អាកាស​យានិក​ធំ (captain) ម្នាក់​គត់​នៅ​ក្នុង​ចំណោម​៦​នាក់​នោះ​​ដែល​អាច​រួច​ផុត​ពី​សេចក្ដី​ស្លាប់​។ ប៉ុន្តែ​គាត់​ក៏​បាន​​រង​របួស​យ៉ាង​ធ្ងន់​ធ្ងរ​​​ស្ទើរ​ស្លាប់​​ស្ទើរ​រស់​​​ទម្រាំ​អាច​រំដោះ​ខ្លួន​​ចេញ​ពី​​​ហេតុ​ការណ៍​ដ៏​រន្ធត់​នេះ​៕​​

ប្រភព៖ BBC
https://www.bbc.com/news/live/world-asia-67862184