ខេត្តឧត្តរមានជ័យ ៖ បន្ទាប់ពីការប៉ះទង្គិចគ្នានៅតាមខ្សែបន្ទាត់ព្រំដែនកម្ពុជា-សៀមចំណុចប្រាសាទតាក្របី ប្រាសាទតាមាន់ធំ ប្រាសាទខ្នារថ្មដូន ជប់គគីរយ៉ាងធ្ងន់ធ្ងរបណ្តាលឱ្យកងទ័ពទាំងសងខាងរងរបួស និងស្លា.ប់អស់ជាច្រើននាក់កាលពីថ្ងៃទី២២ មេសា រហូតដល់ថ្ងៃទី៣ ឧសភា មក ពេលនេះបានស្ងប់ស្ងាត់ឡើងវិញហើយ
ខេត្តឧត្តរមានជ័យ ៖ បន្ទាប់ពីការប៉ះទង្គិចគ្នានៅតាមខ្សែបន្ទាត់ព្រំដែនកម្ពុជា-សៀមចំណុចប្រាសាទតាក្របី ប្រាសាទតាមាន់ធំ ប្រាសាទខ្នារថ្មដូន ជប់គគីរយ៉ាងធ្ងន់ធ្ងរបណ្តាលឱ្យកងទ័ពទាំងសងខាងរងរបួស និងស្លាប់អស់ជាច្រើននាក់កាលពីថ្ងៃទី២២ មេសា រហូតដល់ថ្ងៃទី៣ ឧសភា មក ពេលនេះបានស្ងប់ស្ងាត់ឡើងវិញហើយ។
លោកវរសេនីយ៍ឯក នាក់ វង្ស មេបញ្ជាការរង និងជានាយសេនាធិការកងពលថ្មើរជើងលេខ៤២ប្រចាំតំបន់ប្រាសាទតាមាន់ធំឱ្យកោះសន្តិភាពដឹងថា កងទ័ពកម្ពុជា និងកងទ័ពសៀមដែលផ្ទុះអាវុធ និងបើកការប្រយុទ្ធ គ្នាអស់រយៈពេលជាច្រើនថ្ងៃនោះត្រូវបានបញ្ចប់ទៅវិញដោយថ្នាក់ដឹកនាំយោធារបស់សៀមបានស្វែងរកផ្លូវចរចាគ្នាបញ្ឈប់ការផ្ទុះអាវុធនៅតាមខ្សែបន្ទាត់ព្រំដែនកម្ពុជា-សៀម។ លោកបញ្ជាក់ថា ទោះជាមានការចរចាគ្នាថ្នាក់ភូមិភាគរួចមកក្តីកងទ័ពសៀមនៅតែបន្តផ្ទុះអាវុធ រហូតមកដល់ថ្ងៃទី៣ និងទី ៤ ឧសភា ទើបមានសភាពស្ងប់ស្ងាត់រហូតមកទល់ពេលនេះ គឺសភាពការណ៍នៅខ្សែត្រៀមជួរមុខពុំមានអ្វីឱ្យប្រែប្រួលទេ គឺកងទ័ពទាំងសងខាងស្ថិតនៅតាមគោលដៅរៀងៗខ្លួន។
លោកវ៉ាត ប៉ារ៉ានីន នាយកសាលាខេត្តបានឱ្យកោះសន្តិភាពដឹងថា ការផ្ទុះអាវុធនៅតាមខ្សែបន្ទាត់ព្រំដែនរវាងកងទ័ពកម្ពុជា និងកងទ័ពសៀមនោះ គឺប្រជាពលរដ្ឋកម្ពុជាដែលរស់នៅតាមខ្សែបន្ទាត់ព្រំដែនបានភៀសខ្លួនចាកចេញពីលំនៅឋានរាប់ម៉ឺននាក់រកកន្លែងសុវត្ថិភាព ដែលមានទីតាំងចំនួន៩ជំរំ ស្ថិតនៅក្នុងក្រុងសំរោង ដោយបានទទួលអំណោយពីសប្បុរសជនអំណោយកាកបាទក្រហមកម្ពុជា និងមានការជួយឧបត្ថម្ភពីអាជ្ញាធរខេត្តអស់រយៈពេលជាច្រើនថ្ងៃ។
លោកនាយកសាលាខេត្តបញ្ជាក់ថា បន្ទាប់ពីមានសភាព ស្ងប់ស្ងាត់ អាជ្ញាធរខេត្តបានសុំឱ្យស៊ីម៉ាក់ទៅតាមចំណុចភូមិនីមួយៗជួយប្រមូលគ្រាប់ដែលពុំទាន់ផ្ទុះដោយសារតែការបាញ់ផ្លោងរបស់សៀមយកទៅកំទេចចោល។ លើសពីនោះអាជ្ញាធរបានផ្សព្វផ្សាយដល់ប្រជាពលរដ្ឋ និងសិស្សសាលាបើប្រទះឃើញគ្រាប់ពុំទាន់ផ្ទុះកុំយកដៃទៅប៉ះពាល់ និងត្រូវរាយការណ៍ដល់អាជ្ញាធរមូលដ្ឋានជាបន្ទាន់នៅពេលដែលប្រជាពលរដ្ឋទាំងអស់ចូលទៅរស់នៅក្នុងភូមិវិញ ព្រោះថា ដល់រដូវបង្កបង្កើនផលស្រូវវស្សាហើយ។ អាជ្ញាធរខេត្តបានផ្សព្វផ្សាយដល់ប្រជាពលរដ្ឋត្រូវតែយកចិត្តទុកដាក់ជីកលេណដ្ឋានឱ្យបានគ្រប់គ្រសារ គឺជាគោលការណ៍សំខាន់បំផុត។
លោកនេត្យ ដារ៉ា ប្រធានមាត់ច្រកទ្វារអន្តរជាតិឱ្យកោះសន្តិភាពដឹងថា ខេត្តឧត្តរមានជ័យមានច្រកទ្វារអន្តរជាតិចំនួន២កន្លែង គឺច្រកទ្វារអន្តរជាតិអូរស្មាច់ ស្ថិតនៅសង្កាត់អូរស្មាច់ក្រុងសំរោង និងច្រកទ្វារអន្តរជាតិជាំ ស្ថិតនៅក្នុងឃុំត្រពាំងប្រីយ៍ ស្រុកអន្លង់វែង។ មាត់ច្រកទ្វារអន្តរជាតិទាំងពីរនេះការបិទ និងបើកចេញតែពីខាងភាគីសៀមប៉ុណ្ណោះ។ កាលពីថ្ងៃទី២២ មេសា មានការផ្ទុះអាវុធនៅប្រាសាទតាមាន់ និងប្រាសាទតាក្របីភាគីសៀមបានបិទច្រកទ្វារអន្តរជាតិទាំង២រហូតមកទល់ថ្ងៃទី៤ ឧសភា ទើបបើកវិញ តែសំរាប់ការដោះដូរទៅលើមុខទំនិញរវាងប្រជាពលរដ្ឋទាំងពីរប្រទេស គឺប្រជាពលរដ្ឋកម្ពុជាបាននាំចូលទៅលើមុខទំនិញដូចជាកង់ជជុះ ខោអាវគីប ផ្សិត ចុងផ្តៅ និងបន្លែឈើព្រៃ ចំណែកច្រកទ្វារអន្តរជាតិអូរស្មាច់ ប្រជាពលរដ្ឋចូលទៅលក់ដូរនៅផ្សារសៀមជាធម្មតា ។ ដោយឡែកមាត់ច្រកទ្វារអន្តរជាតិជាំ ប្រជាពលរដ្ឋកម្ពុជានាំចេញម្ទេស ដូង ចុងផ្តៅ និងបន្លែស្លឹកឈើព្រៃ។
លោកបន្តទៀតថា បើប្រជាពលរដ្ឋសៀមវិញ នាំចូលតែគ្រឿងទេសប៉ុណ្ណោះ ព្រោះក្រុមឈ្មួញខ្មែរ និងក្រុមឈ្មួញធំៗ របស់សៀមពុំមានការទុកចិត្ត សភាពការណ៍ព្រំដែនដែលមិនទៀងទាត់ ។ បញ្ហាធំបំផុតគឺប្រេងឥន្ធនៈ និងគ្រឿងសំណង់ ខាងសៀមហាមឃាត់មិនឱ្យនាំចូលដោយខ្លាចកម្ពុជាយកធ្វើជាលេណដ្ឋាន និងធ្វើកាស៊ីណូ។ ខាងសៀមនិយាយថា បើកម្ពុជាដឹកជញ្ជូនពីភ្នំពេញក៏ប្រើពេល និងចំណាយថវិកាច្រើនទើបកសាងបាន។ ទោះបីជាបែបណាក្តី មន្ត្រី កម្ពុជានិយាយថា ថ្វីបើខាងសៀមហាមក៏ដោយ ក៏មិនមានការប៉ះពាល់ធ្ងន់ធ្ងរទេ ព្រោះយើងមានហេដ្ឋារចនាសម្ព័ន្ធក្នុងការដឹកជញ្ជូន កាន់តែប្រសើរពិតជាមិនចោទឡើយ ៕
ចែករំលែកព័តមាននេះ