ក្រុងប៉ោយប៉ែត ៖ តាមប្រភពព័ត៌មានបានឱ្យដឹងថា ពលករខ្មែរជាង២០នាក់ មានប្រុស មានស្រីបានក្រឡាប់រថយន្តកាលពីវេលាម៉ោង៥ និង៣០នាទីល្ងាច ថ្ងៃទី២៣ ឧសភា ក្នុងស្រុកខ្លងហាត ខេត្តស្រះកែវ មានចម្ងាយពីព្រំដែនប្រហែល៨គីឡូម៉ែត្រ ក្នុងនោះស្លាប់២ របួសធ្ងន់៤នាក់ ចំណែក១៧នាក់ទៀតកំពុងត្រូវសមត្ថកិច្ចសៀមចាប់ឃុំខ្លួនដោយសារតែការចូលទៅមិនស្របច្បាប់។
បើតាមលោកឧត្តមសេនីយ៍ត្រីពេជ្រ វណ្ណា អនុប្រធានការិយាល័យទំនាក់ទំនងព្រំដែនកម្ពុជា-ថៃប្រាប់កោះសន្តិភាពតាមទូរស័ព្ទកាលពីរសៀលថ្ងៃទី២៥ ឧសភា ថា ពិតជាមានករណីនោះមែន។ យោងតាមរបាយការណ៍ដែលលោកទទួលបានគឺពលករ២នាក់ជាបុរសបានស្លាប់នៅកន្លែងកើតហេតុ ឯស្ត្រី៤នាក់ផ្សេងទៀតរងរបួសកំពុងសំរាកព្យាបាលនៅក្នុងមន្ទីរពេទ្យខេត្តស្រះកែវ ។ ចំណែក១៧នាក់ផ្សេងទៀតត្រូវសមត្ថកិច្ចសៀមចាប់ឃុំខ្លួននៅក្នុងស្រុកខ្លងហាត ។
លោកបន្តថា ពលករដែលស្លាប់ក្នុងហេតុការណ៍នោះត្រូវគេបញ្ជូនឱ្យសាច់ញាតិនៅច្រកសំពៅលូន ខេត្តបាត់ដំបងកាលពីវេលាម៉ោង៣រសៀល ថ្ងៃទី២៤ ឧសភា ។ សពទាំង២នាក់នោះមានទីលំនៅក្នុងខេត្តតាកែវ។ លោកពេជ្រ វណ្ណា ប្រាប់ថា យោងតាមរបាយការណ៍ថា ម្ចាស់រថយន្តដែលដឹកពលករពីព្រំដែនព្យាយាមបើកគេចពីការតាមចាប់របស់តម្រួតសៀម ហើយខណៈកំពុងបើកលឿនដល់ចំណុចផ្លូវកោងក៏ក្រឡាប់រថយន្តតែម្តង។ រថយន្តនោះម៉ាកតូយ៉ូតាវីហ្គោ ។ ចំពោះពលករដែលកំពុងជាប់ឃុំទាំង១៧នាក់ក្នុងស្រុកខ្លងហាតលោកពេជ្រ វណ្ណា ប្រាប់ថា ពេលនេះខាងការិយាល័យរបស់លោកកំពុងទទូចសុំឱ្យមានការដោះលែងពួកគេវិញ ៕
ចែករំលែកព័តមាននេះ