ខេត្តកំពត ៖ មន្ត្រីជំនាញបានលើកឡើងថា ព្រឹត្តិការណ៍ឆ្លងឆ្នាំ២០២៣ ចូលឆ្នាំ២០២៤នេះ មានភ្ញៀវទេសចរសម្រុកចេញដើរកម្សាន្តតាមបណ្តាខេត្តច្រើនជាងឆ្នាំមុនៗ ហើយសម្រាប់នៅក្នុងខេត្តកំពតវិញ នៅថ្ងៃCountDownឆ្លងឆ្នាំ គឺមានភ្ញៀវជាតិ និងអន្តរជាតិមកកម្សាន្តមានជិត៤០ម៉ឺននាក់ឯណោះ ។ ហើយក៏សង្កេតឃើញថា ទាំងភ្ញៀវទេសចរ ទាំងអាជីវករ បានបង្ហាញអារម្មណ៍សប្បាយរីករាយ និងថា រដ្ឋបាលខេត្តរៀបចំបានស្អាត ថ្មីប្លែករហូត ធ្វើឲ្យទេចរសប្បាយរីករាយ កក់ត្តៅក្នុងចិត្តយ៉ាងខ្លាំង ។
ប្រធានមន្ទីរទេសណ៍ខេត្តកំពត លោក សយ ស៊ីណុល បានប្រាប់ឲ្យដឹងថា ដោយមានការយក ចិត្តទុកដាក់ចង្អុលបង្ហាញ និងដឹកនាំដោយផ្ទាល់ពីសំណាក់ឯកឧត្តម ម៉ៅ ធនិន អភិបាលខេត្តកំពត ក្នុងការរៀបចំតុបតែងកែលំអសោភ័ណភាពក្រុង ពិសេស ការអភិវឌ្ឍន៍តំបន់ឆ្នេរ និងកម្មវិធីកម្សាន្តសប្បាយច្រើនផងនោះ បានធ្វើឲ្យព្រឹត្តិការណ៍ឆ្លងឆ្នាំសាកលនៅខេត្តកំពត មានភាពអធឹកអធមគគ្រឹកគគ្រេង ពោរពេញដោយភាពសប្បាយរីករាយក្រៃលែង ។
លោកប្រធានមន្ទីរបានប្រាប់ឲ្យដឹងថា សម្រាប់ថ្ងៃទី៣១ ខែធ្នូ (ថ្ងៃCount Downឆ្លងឆ្នាំ) ខេត្តកំពត មានអ្នកទេសចរសរុបចំនួន៣៨.៦ ៤៨៨ នាក់ ក្នុងនោះ ភ្ញៀវទេសចរកម្សាន្តតាមរមណីយដ្ឋាន សហគមន៍ទេសចរណ៏នានាសរុបចំនួន៥៦.៤៨៨នាក់ (ភ្ញៀវអន្តរជាតិចំនួន២.៤៨៨នាក់) ខណៈដែលភ្ញៀវទេសចរជាតិ អន្តរជាតិ បងប្អូនប្រជាពលរដ្ឋ ចូលរួមកំសាន្តសប្បាយក្នុងកម្មវិធីរាប់ថយក្រោយ(Count Down)ក្នុងក្រុង មានចំនួនសរុប៣៣.០០០០នាក់ (ភ្ញៀវទេសចរអន្តរជាតិចំនួន១៥០០នាក់ ) ។
ភ្ញៀវទេសចរមកពីរាជធានីភ្នំពេញបានបង្ហាញចំណាប់អារម្មណ៍សប្បាយរីករាយរបស់ខ្លួនថា ពួកគាត់សម្រេចចិត្តមកលេងខេត្តកំពត ពិតជាមិនខុសបំណងទេ កំពតមានកន្លែងដើរលេងច្រើន ហើយការរៀបចំព្រឹត្តិការណ៍ឆ្លងឆ្នាំបានស្អាត មានសណ្តាប់ធ្នាប់ សន្តិសុខ សុវត្ថិភាព អនាម័យបរិស្ថានល្អ សេវាកម្មផ្សេងៗមានតម្លៃសមរម្យ អ្នកដែលខកខានមិនបានមកឆ្លងឆ្នាំនៅខេត្តកំពតពិតជាស្តាយក្រោយ ។
តំណាងអាជីវករលក់ដូរ និងម្ចាស់ទូកទេសចរណ៍ដឹកភ្ញៀវកម្សាន្តតាមដងព្រែកកំពង់បាយ បានប្រាប់ឱ្យដឹងដែរថា រយៈពេលពីរថ្ងៃ (៣០ និង៣១ ខែធ្នូ)នេះ ភ្ញៀវទេសចរជាតិ និងអន្តរជាតិមកលេងកំពតច្រើនខ្លាំង ទូកទេសចរណ៍ក៏មានអ្នកមកជិះច្រើនដែរ។ អាជីវកររូបនេះបានថ្លែងអំណរគុណដល់រាជរដ្ឋាភិបាល ពិសេស ឯកឧត្តមអភិបាលខេត្ត ដែលលោកតែងតែគិតគូរដល់សុខទុក្ខ និងជីវភាពរស់នៅរបស់ប្រជាពលរដ្ឋ ។
មកតាមការបញ្ជាក់របស់ប្រធានមន្ទីរទេសចរណ៍ខេត្តថា ព្រឹត្តិការណ៍ឆ្លងឆ្នាំ(២០២៣ ចូល២០២៤) បានព្រឹត្តិទៅល្អប្រសើរ មិនមានបញ្ហាអ្វីកើតឡើងគួរឲ្យកត់សម្គាល់នោះឡើយ ហើយបើទោះជាមានអ្នកទេសចរមកលេងពេញក្រុងកំពត និងគ្រប់គោលដៅទេសចរណ៍ និងរមណីយដ្ឋានយ៉ាងណាក៏ដោយ រដ្ឋបាលខេត្តនៅតែរក្សាបាននូវ សន្តិសុខ សុវត្ថិភាព សណ្តាប់ធ្នាប់ល្អ គ្មានការកក់ស្ទះចរាចរណ៍ ធ្វើឲ្យភ្ញៀវទេចរមានទទួលបានភាពសប្បាយរីករាយ និងកក់ក្តៅក្នុងចិត្តយ៉ាង
ខ្លាំង ។
ចែករំលែកព័តមាននេះ