ស្តារវិស័យទេសចរណ៍! ចិនបន្ធូរបន្ថយការស្នើសុំទិដ្ឋាការសម្រាប់អ្នកទេសចរអាមេរិក
ទីក្រុងប៉េកាំង ៖ ប្រទេសចិននឹងសម្រួលដល់ការស្នើសុំទិដ្ឋាការសម្រាប់ភ្ញៀវទេសចរមកពីសហរដ្ឋអា
ទីក្រុងប៉េកាំង ៖ ប្រទេសចិននឹងសម្រួលដល់ការស្នើសុំទិដ្ឋាការសម្រាប់ភ្ញៀវទេសចរមកពីសហរដ្ឋអាមេរិក ចាប់ពីថ្ងៃទី១ ខែមករា ឆ្នាំ២០២៤ ដោយកាត់ឯកសារដែលត្រូវការមួយចំនួនចោល។ នេះបើយោងតាមការជូនដំណឹងមួយ កាលពីថ្ងៃទី២៩ ខែធ្នូ ឆ្នាំ២០២៣ កន្លងទៅ នៅលើគេហទំព័រស្ថានទូតចិនប្រចាំនៅទីក្រុងវ៉ាស៊ីនតោន។
ចំណាត់ការនេះ គឺជាវិធានការចុងក្រោយបំផុតរបស់ប្រទេសចិន ក្នុងការធ្វើឱ្យវិស័យទេសចរណ៍រស់ឡើងវិញ និងជំរុញសេដ្ឋកិច្ចរបស់ខ្លួន នៅក្នុងនាមជាប្រទេសសេដ្ឋកិច្ចធំទីពីរពិភពលោក បន្ទាប់ពីការធ្លាក់ចុះខ្លាំង អំឡុងពេលជំងឺកូវីដ-១៩។ សេចក្តីជូនដំណឹងពីស្ថានទូតចិនបានបញ្ជាក់ថា អ្នកដាក់ពាក្យសុំទិដ្ឋាការទេសចរណ៍នៅសហរដ្ឋអាមេរិកនឹងលែងត្រូវការដាក់ការកក់សំបុត្រយន្តហោះ ការកក់សណ្ឋាគារ ឬលិខិតអញ្ជើញតទៅទៀតហើយ។
កន្លងមក រដ្ឋាភិបាលក្រុងប៉េកាំងបានបើកផ្លូវសម្រាប់អ្នកកាន់លិខិតឆ្លងដែនពីប្រទេសបារាំង អាល្លឺម៉ង់ អ៊ីតាលី ហូឡង់ អេស្ប៉ាញ និងម៉ាឡេស៊ី ចូលទឹកដីរបស់ខ្លួន ដោយគ្មានទិដ្ឋាការចាប់ពីថ្ងៃទី១ ខែធ្នូ ឆ្នាំ២០២៣។ ការចូលទឹកដីចិនដោយគ្មានទិដ្ឋាការនឹងដំណើរការរយៈពេល១២ខែ អំឡុងពេលអ្នកទេសចរមកពីប្រទេសទាំង ៦ ខាងដើមអាចទៅលេងប្រទេសចិនបានរហូតដល់១៥ថ្ងៃ។ លើសពីនេះទៀត ប្រទេសចិន ក៏បានពង្រីកគោលនយោបាយឆ្លងកាត់ដោយគ្មានទិដ្ឋាការរបស់ខ្លួនទៅកាន់ប្រទេសចំនួន ៥៤ ផងដែរ កាលពីខែវិច្ឆិកាកន្លងទៅ។
ចំនួនអ្នកទេសចរចូលប្រទេសចិនបានធ្លាក់ចុះអំឡុងពេលជំងឺកូវីដ-១៩ ដោយសារតែគោលនយោបាយ «សូន្យ-កូវីដ» ដ៏តឹងរ៉ឹងរបស់ប្រទេសនេះ។ ជើងហោះហើរអន្តរជាតិទៅកាន់ប្រទេសចិនបានកើនឡើងមកវិញ ចាប់តាំងពីទីក្រុងប៉េកាំងបានទម្លាក់ការរឹតបន្តឹងកូវីដ-១៩ កាលពីមួយឆ្នាំមុន។ ប៉ុន្តែទោះបីជាយ៉ាងណាក៏ដោយ នៅតែមានត្រឹមតែ ៦០% នៃកម្រិតកាលពីឆ្នាំ ២០១៩ តែប៉ុណ្ណោះ៕ (ប្រភព ៖ Reuters)
ចែករំលែកព័តមាននេះ