«ស្លឹកល្ហុងព្យាបាលមហារីក» កំពុងល្បីនៅថៃ សូម្បីរដ្ឋមន្ត្រីសុខាភិបាលក៏ចាប់អារម្មណ៍
ទីក្រុងបាងកក៖ នៅប្រទេសថៃឥឡូវនេះកំពុងល្បីតគ្នាថាស្លឹកល្ហុងអាចព្យាបាលជំងឺមហារីករហូត
ទីក្រុងបាងកក៖ នៅប្រទេសថៃឥឡូវនេះកំពុងល្បីតគ្នាថាស្លឹកល្ហុងអាចព្យាបាលជំងឺមហារីករហូតដល់ធ្វើឱ្យរដ្ឋមន្ត្រីក្រសួងសុខាភិបាលចាប់អារម្មណ៍ខ្លាំង។ ទោះបីវិទ្យាស្ថានជាតិប្រយុទ្ធប្រឆាំងនឹងជំងឺមហារីកចេញមកទាត់ចោលព័ត៌មាននេះ ប៉ុន្តែលោករដ្ឋមន្ត្រីយល់ថាគួរកុំទាន់ប្រញាប់បដិសេធល្អជាង។ លោកចង់យកពេលវេលាដើម្បីសិក្សាស្រាវជ្រាវបន្ថែមទៀត។
លោករដ្ឋមន្ត្រីសោមស័ក្ដិ (Somsak) ថ្លែងថាលោកនឹងចាត់មន្ត្រីក្រោមឱវាទក្រសួងសុខាភិបាលសិក្សាស្រាវជ្រាវអំពីបញ្ហានេះដើម្បីចង់ដឹងថាតើស្លឹកល្ហុងពិតជាមានប្រសិទ្ធភាពព្យាបាលមហារីកដូចគេថាមែន ឬក៏យ៉ាងណា។ លោកថ្លែងបន្តទៀតថាក្រសួងសុខាភិបាលអាចសហការជាមួយវិទ្យាស្ថានរបស់ប្រទេសជប៉ុនដែលកំពុងស្រាវជ្រាវអំពីប្រសិទ្ធភាពនៃស្លឹកល្ហុង។ វិទ្យាស្ថានបានដាក់ពាក្យស្នើសុំប្រកាសនីយប័ត្រ (ប៉ាតង់ – patent) ដើម្បីប្រើប្រាស់ស្លឹកល្ហុងធ្វើជាឱសថព្យាបាលមហារីក។
កាលពីដើមសប្ដាហ៍នេះ លោកសោមស័ក្តិបានឡើងប៉ុស្តិ៍ទូរទស្សន៍ដើម្បីធ្វើបទបង្ហាញអំពីករណីអ្នកជំងឺមហារីកខ្លះជាសះស្បើយបន្ទាប់ពីយកស្លឹកល្ហុងដាំទឹកផឹក។ លោកថ្លែងថាគេបានប្រមូលទិន្នន័យពីអ្នកជំងឺដែលត្រូវគ្រូពេទ្យពិនិត្យឃើញថាមានជំងឺមហារីក។ ប៉ុន្តែលទ្ធផលនៃការផឹកទឹកស្លឹកល្ហុងស្ងោរនេះវាមានភាពល្អៀងគ្នាពីអ្នកជំងឺម្នាក់ទៅអ្នកជំងឺម្នាក់ទៀត។
ក្រោយការធ្វើបទបង្ហាញនោះ អ្នកខ្លះដាក់ការសង្ស័យថាពិតឬមិនពិត។ អ្នកខ្លះដាក់ជាសំណួរថាតើយកស្លឹកល្ហុងដាំទឹកផឹកនេះអាចជឿទុកចិត្តកម្រិតណាថាអាចព្យាបាលមហារីកឱ្យជាសះស្បើយ។ មជ្ឈមណ្ឌលឌីជីថលរបស់ថៃចាត់ទុកថានេះជាព័ត៌មានក្លែងក្លាយព្រោះកាលពីពេលកន្លងមក មជ្ឈមណ្ឌលជាតិប្រយុទ្ធនឹងជំងឺមហារីកធ្លាប់បានសិក្សាស្រាវជ្រាវអំពីប្រសិទ្ធភាពរបស់ស្លឹកល្ហុង។ ប៉ុន្តែបានធ្វើតែនៅក្នុងមន្ទីរពិសោធ និងពុំដែលបានប្រើសាកជាមួយអ្នកជំងឺមហារីកនៅឡើយទេ។
ចំពោះការអះអាងថា «ផឹកទឹកចម្រាញ់ចេញពីស្លឹកល្ហុងអាចព្យាបាលជំងឺមហារីកឱ្យជាសះស្បើយ» ត្រូវវិទ្យាស្ថានខាងលើច្រានចោលព្រោះគ្មានទិន្នន័យបញ្ជាក់ថាពិត។ ជាការឆ្លើយតបនឹងភាពស្រពេចស្រពិលនេះ លោករដ្ឋមន្ត្រីសុខាភិបាលថ្លែងនៅថ្ងៃសុក្រថា «បើយើងអាល័យតែប្រកែកគ្នាពីរឿងហ្នឹងតើបានប្រយោជន៍អ្វីសម្រាប់សាធារណជន និងសង្គមរបស់យើង! អ្វីដែលយើងត្រូវធ្វើគឺខិតខំសិក្សាស្រាវជ្រាវបន្ថែមទៀតដើម្បីឱ្យដឹងលទ្ធផលច្បាស់ទាំងអស់គ្នា»។ លោកថ្លែងបន្ថែមទៀតថាលោកឡើងទូរទស្សន៍ធ្វើបទបង្ហាញនោះគោលបំណងដើម្បីផ្សព្វផ្សាយចំណេះដឹង។ លោកមិនដែលអះអាងថាស្លឹកល្ហុងពិតជាអាចប្រើជំនួសវិធីព្យាបាលជំងឺមហារីកដែលកំពុងតែអនុវត្តសព្វថ្ងៃនេះទេ។
លោកសោមស័ក្ដិចង់បង្កើតជម្រើសឱ្យបានច្រើនសម្បូរបែបសម្រាប់អ្នកជំងឺដែលធ្លាប់ប្រើថ្នាំ ឬវិធីជាច្រើនហើយនៅតែមិនមានប្រសិទ្ធភាព។ ពួកគេអាចងាកមកសាកល្បងវិធីនេះម្ដងមើល (យកស្លឹកល្ហុងដាំទឹកផឹក) ក្រែងលោបានគ្រាន់បើជាង។ លោកបានលើកយកករណីមួយដែលចាត់ទុកជាបានការ។ លោកថាលទ្ធផលធ្វើពិសោធបង្ហាញថាអ្នកជំងឺមហារីកម្នាក់កម្រិត៤ (ដែលជាដំណាក់កាលចុងក្រោយនៅតែថ្ងៃស្លាប់) បែរជាបានធូរស្បើយឡើងវិញបន្ទាប់ពីទទួលទានទឹកស្លឹកល្ហុង។ លោកថ្លែងថានេះមិនមែនជាការនិយាយកុហកទេ។ ក្រោយពេលផឹកទឹកស្លឹកល្ហុងរួច អ្នកជំងឺខ្លះបានជាសះស្បើយពិតមែន៕ (ប្រភព៖ The Nation)
ចែករំលែកព័តមាននេះ