ខេត្តកំពង់ចាម ៖ គម្រោងដេញថ្លៃជួសជុលទំនប់ប្រវែង១.០១៥ម៉ែត្រ មានខ្នងលើ៤ម៉ែត្រ ដាក់លូ៤កន្លែង ស្ថិតនៅភូមិល្ពាក ឃុំស្រក ស្រុកកំពង់សៀម តម្លៃដាក់ឲ្យដេញថ្លៃជាង២០៣លានរៀល និងមានក្រុមហ៊ុនចំនួន៨ ចូលរួមប្រកួតប្រជែងដេញថ្លៃ និងបានទៅលើលោក និល ចាន់នៅ ក្នុងតម្លៃជាង៨៣លានរៀល ។
អ្វីដែលចាប់អារម្មណ៍នោះ គឺការជួសជុលផ្លូវមិនទាន់រួចរាល់ផង ក្រុមហ៊ុនបានបើកលុយពី
រតនាគារខេត្តអស់ទៅហើយ ។ ឯចំពោះការស្ថាបនានេះ ត្រូវបានគេសង្ស័យថាមានភាពមិនប្រក្រតីទៀតផង ។ ប្រភពព័ត៌មានពីអាជ្ញាធរមូលដ្ឋាន១រូប ដែលសូមមិនបញ្ចេញឈ្មោះ បានឲ្យដឹងកាលពីព្រឹកថ្ងៃទី២៥ ខែធ្នូ ឆ្នាំ២០២៣ថា កន្លងមកនៅសាលាឃុំស្រក មានរៀបចំការដាក់ឲ្យដេញថ្លៃជួសជុលទំនប់ប្រវែងជាង១.០០០ម៉ែត្រ ក្នុងនោះមានការចូលរួមពីក្រុមប្រឹក្សាឃុំ ព្រមទាំងមន្ត្រីជំនាញពាក់ព័ន្ធ ។ ការប្រកួតប្រជែងមានលក្ខណៈចាញ់-ឈ្នះហួសកម្រិត ដោយអ្នកដេញបានចុះមកនៅជាង៨៣លានរៀល ដែលកត្តានេះធ្វើឲ្យមានការព្រួយបារម្ភពីគុណភាពទំនប់ផងដែរ ។
ប្រភពពីមន្ត្រីអាជ្ញាធរមូលដ្ឋាន ដែលសូមមិនបញ្ចេញឈ្មោះដែរ និយាយថា តាមលក្ខណៈបច្ចេក ទេស ការជួសជុលទំនប់មួយខ្សែនេះត្រូវរៀបចំដាក់ប្រព័ន្ធលូចំនួន៤កន្លែង ។ ក្នុងនោះមានប្រព័ន្ធលូចំមុខទឹកធំតែម្ដង តែនេះគេដាក់នៅចុងទំនប់ទៅវិញ ។ ឯចំពោះផ្លូវប្រវែងជិត៤០០ម៉ែត្រទៀត ពេលគេស្ថាបនាទើបដាក់លូតាមក្រោយ ។ ក្រុមហ៊ុនដែលដេញថ្លៃបានមិនដឹងជាយ៉ាងណាទេ សូម្បីតែក្រុមហ៊ុនដែលដេញបាននេះឱ្យបន្តស្ថាបនាផ្លូវដែលនៅសេសសល់ លោកមេឃុំមិនបានប្រជុំពិគ្រោះយោបល់ឱ្យក្រុមប្រឹក្សាឃុំបានដឹងឡើយ គឺគេរៀបចំដោយស្ងាត់ៗតែម្ដង ។
ឯថវិកាដែលនៅសល់ប្រមាណ១១៩លានរៀល ត្រូវបានបន្តឲ្យក្រុមហ៊ុនដដែលធ្វើការស្ថាបនាផ្លូវដោយគេមិនដឹងថា លោកយកថវិកាពីខាងណាមកបន្ថែមដើម្បីធ្វើផ្លូវឡើយ ដូច្នេះមានតែក្រុម បច្ចេកទេសទេដែលដឹង ។ ប៉ុន្តែ ខណៈក្រុមហ៊ុនជួសជុលទំនប់ប្រវែងជាង១.០០០ម៉ែត្រ និងការស្ថាបនាផ្លូវបន្តមិនទាន់រួចរាល់ផង គឺក្រុមហ៊ុនបានបើកលុយពីរតនាគារខេត្តរួចបាត់ទៅហើយ ។
តាមគោលការណ៍ ទាល់តែស្ថាបនាទំនប់និងផ្លូវរួចរាល់ ទើបមានសិទ្ធិអនុញ្ញាតឱ្យក្រុមហ៊ុនបើកលុយពីរតនាគារ តែនេះមិនដូច្នោះឡើយ ។លុះពេលផ្ទុះរឿងនេះ ក៏ឃើញក្រុមហ៊ុនលេចមុខមកស្ថាបនាផ្លូវបន្ត ដែលគេសន្យាថាចុងឆ្នាំ២០២៣នេះទើបរួចរាល់ ។
លោក ស៊ន់ ជំទប់ទី១ឃុំស្រក មានប្រសាសន៍ថា ការដេញថ្លៃគម្រោងជួសជុលទំនប់ប្រវែងជាង១ពាន់ម៉ែត្រនេះ គឺពុំទាន់រួចរាល់ពិតមែន ។ ក្រុមហ៊ុនបានបើកលុយពីរតនាគារចំនួន២លើករួចហើយ ចំណែកលើកទី៣ គឺជាប្រាក់ចំនួន១០% សម្រាប់ថែទាំផ្លូវក្នុងរយៈពេល៦ខែ ។ ចំពោះគុណភាពផ្លូវ ឥឡូវនេះមិនទាន់អាចធ្វើការវាយតម្លៃបានទេ ទាល់តែក្រុមហ៊ុនស្ថាបនារួចរាល់ ទើបក្រុមគណៈកម្មការចម្រុះចុះវាយតម្លៃកើត ដោយមានការពិភាក្សាជាមួយក្រុមប្រឹក្សាឃុំ ដែលមានគ្នា៦ទៅ៧នាក់ ។
សូមបញ្ជាក់ថា ថ្មីៗនេះ ប្រជាពលរដ្ឋនៅឃុំស្រក បានប្រតិកម្មទៅនឹងក្រុមហ៊ុនរបស់លោក ចាន់នៅ ដែលដេញថ្លៃស្ថាបនា ជួសជុលទំនប់និងផ្លូវបាន បែរជាយកដីស្អុយមកចាក់ធ្វើផ្លូវទៅវិញ ។ ទង្វើបែបនេះ ប្រជាពលរដ្ឋមិនអាចទទួលយកបានឡើយ ។លោក ឌុច ឡេង មេឃុំស្រក មានប្រសាសន៍ថា ចំពោះគម្រោងស្ថាបនាទំនប់ប្រវែងជាង១.០០០ម៉ែត្រ នៅភូមិល្ពាក ឃុំស្រក គឺក្រុម
ប្រឹក្សាឃុំខ្លះដឹង និងខ្លះមិនដឹង ដោយសារមិនមានការជួបជុំគ្នា ។
រូបលោកទទួលស្គាល់ថា ស្មៀនឃុំបានយកលិខិតមកឲ្យរូបលោកចុះហត្ថលេខា តែលោកមិនបានចាប់អារម្មណ៍ពីក្រុមហ៊ុនដែលដេញថ្លៃបាននោះទេ រួមទាំងការចុះហត្ថលេខាដើម្បីបើកលុយឲ្យក្រុមប្រឹក្សាឃុំ ។ស្មៀនឃុំក៏មិនបាននិយាយប្រាប់ពិស្ដារ ដោយក្នុងគ្រានោះរូបលោកឈឺភ្នែក ព្រោះក្រោយពីការដេញថ្លៃរួច រូបលោកក៏មានជំងឺតែម្ដង ។
ឥឡូវនេះ ក្រុមហ៊ុនកំពុងយកគ្រឿងចក្រមកដើម្បីជួសជុលផ្លូវបន្ត ធ្វើយ៉ាងណាឲ្យរួចរាល់ ។រីឯលោក និល ចាន់នៅ ដែលដេញថ្លៃគម្រោងស្ថាបនាទំនប់ប្រវែង ជាង១.០០០ម៉ែត្រ បានឱ្យដឹងតាមទូរស័ព្ទថា ក្រុមហ៊ុនរបស់គាត់ ក្រោយពីដេញថ្លៃបាន ក៏ចុះស្ថាបនានិងជួសជុលទំនប់ក្នុងនោះមានទាំងលូចំនួន៤កន្លែង តែដោយសារភ្លៀងធ្លាក់ ក៏បានអាក់ខានមួយរយៈ ។ បន្ទាប់ពីដាច់ទឹកភ្លៀង ក្រុមហ៊ុនបានចុះស្ថាបនាឡើងវិញ ។ ដោយមានការស្នើសុំពីប្រជាពលរដ្ឋក៏ដូចជាអាជ្ញាធរឃុំ ក្រុមហ៊ុនបានបន្ថែមលូចំនួន៥កន្លែងទៀត ដើម្បីងាយស្រួលបើកទឹកចេញចូលសម្រាប់បង្កបង្កើនផលស្រូវ ។
លោក ប្រាក់ ទិត នាយកទីចាត់ការនិងផែនការវិនិយោគខេត្ត មានប្រសាសន៍ថា ក្រោយពីមានរឿងនេះកើតឡើង ឯកឧត្តម អ៊ុន ចាន់ដា អភិបាលខេត្ត បានកោះហៅក្រុមប្រឹក្សាឃុំស្រកទាំងអស់មកប្រជុំនិងធ្វើកិច្ចសន្យា ដោយតម្រូវធ្វើយ៉ាងណាឲ្យក្រុមហ៊ុនដែលដេញថ្លៃបាននោះ ស្ថាបនាទំនប់និងជួសជុលផ្លូវ ទៅតាមកិច្ចសន្យានិងមានគុណភាព ៕
ចែករំលែកព័តមាននេះ