ចិនបង្កើនការទប់ស្កាត់លើឧស្សាហកម្មវីដេអូហ្គេ.ម ដើម្បីបញ្ជៀសឥរិយាបទឈ្លក់វង្វេង
ចិន ៖ ប្រទេសចិន នឹងនាំយកច្បាប់ថ្មីមួយ ដែលនឹងកំណត់ចំនួនទឹកប្រាក់ និងពេលវេលាដែល
ចិន ៖ ប្រទេសចិន នឹងនាំយកច្បាប់ថ្មីមួយ ដែលនឹងកំណត់ចំនួនទឹកប្រាក់ និងពេលវេលាដែលបុគ្គលម្នាក់អាចចំណាយលើការលេងវីដេអូហ្គេម ដោយការដាក់កម្រិតនេះមានគោលបំណងកំណត់លើការទិញវីដេអូហ្គេម និងបញ្ជៀសឥរិយាបទឈ្លក់វង្វេងខ្លាំងលើការលេងហ្គេម។ នេះបើយោងតាមប្រភពពី BBC ដែលបានចេញផ្សាយកាលពីពេលថ្មីៗនេះ។
សេចក្តីព្រាងច្បាប់នេះ គឺជាការវាយលុកទីផ្សារហ្គេមអនឡាញដ៏ធំបំផុតរបស់ពិភពលោក ស្របពេលដំណឹងនេះបានធ្វើឱ្យភាគហ៊ុនក្នុងបណ្តាក្រុមហ៊ុនបច្ចេកវិទ្យាយក្សធ្លាក់ចុះយ៉ាងខ្លាំង។ ការទប់ស្កាត់ដែលបានគ្រោងទុកក៏បានរំលឹកឡើងវិញនូវការហាមប្រាមលើមាតិកាហ្គេមអនឡាញ ដែលបង្កគ្រោះថ្នាក់ដល់ការរួបរួមជាតិ និងសន្តិសុខជាតិ ឬប៉ះពាល់ដល់កេរ្តិ៍ឈ្មោះ និងផលប្រយោជន៍ជាតិទាំងមូល។
ទីក្រុងប៉េកាំងបានផ្លាស់ប្តូរជាលើកដំបូងប្រឆាំងនឹងវិស័យហ្គេមនៅឆ្នាំ ២០២១ ដោយសម្រេចថា អ្នកលេងហ្គេមអនឡាញដែលមានអាយុក្រោម១៨ឆ្នាំ នឹងត្រូវអនុញ្ញាតឱ្យលេងត្រឹមតែ១ម៉ោងប៉ុណ្ណោះនៅថ្ងៃសុក្រ ថ្ងៃចុងសប្តាហ៍ និងថ្ងៃឈប់សម្រាក។ ប៉ុន្តែទោះយ៉ាងណាក៏ដោយ ការរឹតបន្តឹងចុងក្រោយនៅតែបន្តទៅមុខបន្ថែមទៀត។
និយតករឧស្សាហកម្ម រដ្ឋបាលសារព័ត៌មាន និងបោះពុម្ពជាតិរបស់ចិន (NPPA) បានលើកឡើងថា ហ្គេមអនឡាញមិនត្រូវផ្តល់រង្វាន់ដែលទាក់ទាញមនុស្សឱ្យលេង និងចំណាយច្រើនពេកទេ រួមទាំងការចូលលេងប្រចាំថ្ងៃ និងការបញ្ចូលទឹកប្រាក់បន្ថែមទៅក្នុងគណនីអ្នកលេង។
ប្រទេសចិន គឺជាទីផ្សារហ្គេមដ៏ធំបំផុតរបស់ពិភពលោក ហើយក្រុមហ៊ុន Tencent គឺជាអ្នកនាំមុខគេនៅក្នុងវិស័យនេះទាក់ទងនឹងប្រាក់ចំណូល ដោយគ្រប់គ្រងលើទីផ្សារអាស៊ី ហើយបានវិនិយោគលើស្ទូឌីយូហ្គេមនៅទូទាំងពិភពលោកផងដែរ ទោះយ៉ាងណាក៏ដោយបន្ទាប់ពីការប្រកាសរបស់និយតករឧស្សាហកម្ម រដ្ឋបាលសារព័ត៌មាន និងបោះពុម្ពជាតិរបស់ចិន តម្លៃភាគហ៊ុនរបស់ក្រុមហ៊ុនដែលមូលដ្ឋាននៅក្នុងទីក្រុង Shenzhen មួយនេះបានធ្លាក់ចុះ ១២.៤% ឯណោះ។
អនុប្រធានក្រុមហ៊ុន Tencent Games លោក Vigo Zhang បានថ្លែងថា Tencent នឹងអនុវត្តយ៉ាងតឹងរឹងនូវតម្រូវការបទប្បញ្ញត្តិថ្មីណាមួយ ហើយសេចក្តីព្រាងច្បាប់ថ្មីនេះ មិនបានផ្លាស់ប្តូរពីការផ្តោតជាបន្តរបស់និយតករលើការធានាថា ក្រុមហ៊ុនមានគំរូអាជីវកម្មសមហេតុផល និងដំណើរការប្រតិបត្តិការត្រឹមត្រូវ។ លោកបន្ថែមថា អនីតិជនបានចំណាយប្រាក់ និងពេលវេលាតិចជាប្រវត្តិសាស្ត្រលើការលេងហ្គេមរបស់ Tencent ចាប់តាំងពីឆ្នាំ ២០២១ នៅពេលដែលការការពារអ្នកលេងវ័យក្មេងបានក្លាយជាការយកចិត្តទុកដាក់សម្រាប់ទីក្រុងប៉េកាំង៕
ចែករំលែកព័តមាននេះ