ដំណាំគម្របដី ជាច្រើនប្រភេទ ដែលបានប្រជាពលរដ្ឋ នៅក្នុងខេត្តបាត់ដំបង ដាំដុះ មិនត្រឹមតែចូលរួមលើកកម្ពស់គុណភាពដី ឲ្យមានជីវជាតិនោះទេ វាក៏បានជួយកម្ពស់ជីវភាពប្រជាពលរដ្ឋ តាមរយៈការដាំដុះដំណាំនោះផងដែរ
ខេត្តបាត់ដំបង ៖ ដំណាំគម្របដី ជាច្រើនប្រភេទ ដែលបានប្រជាពលរដ្ឋ នៅក្នុងខេត្តបាត់ដំបង ដាំដុះ មិនត្រឹមតែចូលរួមលើកកម្ពស់គុណភាពដី ឲ្យមានជីវជាតិនោះទេ វាក៏បានជួយកម្ពស់ជីវភាពប្រជាពលរដ្ឋ តាមរយៈការដាំដុះដំណាំនោះផងដែរ នេះបើតាមអ្នកជំនាញកសិកម្ម ។
ថ្លែងប្រាប់ក្រុមអ្នកសារព័ត៌មាន នៅថ្ងៃទី២៤ ខែធ្នូ ឆ្នាំ២០២៣ ខណៈចុះមើផ្ទាល់ប្រភេទដំណាំគម្របដីនៅខេត្តបាត់ដំបង លោក សរ វេង ទីប្រឹក្សាផ្នែកបច្ចេកទេស នៃមជ្ឈមណ្ឌលស្រាវជ្រាវ និងអភិវឌ្ឍន៍កសិកម្ម នៅកម្ពុជា ស្ថិតក្នុងការគ្រប់គ្រងនាយករដ្ឋានគ្រប់គ្រងធនធានដីកសិកម្ម និងនៃអគ្គនាយករដ្ឋានកសិកម្ម បានលើកឡើងថា សព្វថ្ងៃនេះ កសិករមានបញ្ហាប្រឈមខ្លាំងទាក់ទងជីវជាតិដី ពិសេសនោះ នៅតំបន់ខ្ពស់រាប នៅពេលកសិករចាប់ផ្តើមដាំដុះ គាត់ត្រូវការភ្ជួរដីជាច្រើនដង ដែលកត្តាមកពីការហូរច្រោះដោយទឹក ។
លោកលើកឡើងថា នៅពេល ដែលដីបាត់បង់ជីវភាពធ្វើឲ្យបាត់បង់ទិន្នផល ជាហេតុ ធ្វើឲ្យគាត់ជំរុញការប្រើប្រាស់ថ្នាំពុល កសិកម្ម ជីវកសិកម្ម ដែលធ្វើឲ្យការចំណាយកើនឡើងពីមួយឆ្នាំទៅមួយឆ្នាំ។ ជាងនេះធ្វើឲ្យប៉ះពាល់ដល់សុខភាព និងធ្វើឲ្យមានការប្រែប្រួល បរិស្ថានផងដែរ ។
លោកបន្តថា ដោយសារតែឃើញពីផលប៉ះពាល់ ដូច្នេះបានទើបអគ្គនាយករដ្ឋានគ្រប់គ្រងដីកសិកម្ម សហការជាមួយមជ្ឈមណ្ឌលស្រាវជ្រាវ និងអន្តរជាតិ បានចាប់ផ្តើមអនុវត្តន៍ការងារ អភិរក្ស ដែលការងារនេះ គឺធ្វើយ៉ាងណាឲ្យដីមានជីវជាតិប្រើជាងជាមុនតាមរយៈប្រភេទដំណាំគម្របដី ដែលមានច្រើនប្រភេទ ។
លោក សរ វេង បានបញ្ជាក់ថា ៖ «ដំណាំអភិរក្ស គឺយើងដាំតាមបច្ចេកទេសដោយអត់ភ្ជួររាស់ មានន័យយកតាមលំនាំធម្មជាតិដោយកាត់បន្ថយការភ្ជួររាស់ដី អ៊ីចឹងយើងថា ក្នុងដីមានសត្វជាច្រើនក្នុងដី រហូតដល់មានរាប់លានប្រភេទ ដោយខ្លះមើលឃើញនឹងភ្នែក ខ្លះទៀតមើលមិនឃើញក៏មាន» ។
បើតាមអ្នកជំនាញបច្ចេកទេសរូបនេះ បានឲ្យដឹងថា នៅពេលដាំដំណាំគម្របដី អាចជួយដល់គុណភាពដី ដូចជាធ្វើជាជីផងដែរ។ ដំណាំប្រភេទនេះ មិនត្រឹមតែអាចជួយឲ្យមានគុណភាពដីប៉ុណ្ណោះទេ វាក៏ជួយឲ្យកសិកម្មរកប្រាក់ចំណូលបានច្រើនផងដែរ។
លោកបានបញ្ជាក់ថា ៖ «បើសិនកសិកម្មដាំដំណាំដំណាំគម្របដីនេះ ដីគាត់អត់មានស្មៅចង្រៃនោះទេ អ៊ីចឹងវាមិនអាចបង្កើតគ្រាប់ ដើម្បីដុះនៅពេលក្រោយទៀតទេ» ។
ជាមួយគ្នានោះដែរ លោក សរ វេង ក៏បានឲ្យដឹងថា ដំណាំគម្របដីក៏បានចូលរួមដល់បរិ ស្ថានដោយជួយឲ្យចាប់យកឧស្ម័យផ្ទះកញ្ចប់ចូលទៅក្នុងដី លើសពីនេះ ប្រភេទដំណាំនេះ ជួយដល់ផលប្រយោជន៍សេដ្ឋកិច្ច គឺប្រជាពលរដ្ឋទទួលបានលុយភ្លាមៗផងដែរ ។
លោកគូសបញ្ជាក់យ៉ាងដូច្នេះថា ៖ «បើគាត់ចាំដំណាំដូចជាពោត សណ្តែកគាត់ទទួលបានលុយតិច ប៉ុន្តែបើគាត់ដាំពោត ហើយដាំដំណាំគម្របដីនេះ គាត់នឹងទទួលបានលុយមួយម្តងទៀត អីញ្ចឹងដំណាំនេះមួយហិតាគាត់ចំណេញលុយបានប្រហែល៥០០ដុល្លារទៅ៦០០ដុល្លារ លើនឹងទៀត។ ដូច្នេះបើគាត់ដាំពោត ចំណេញបាន៥០០ឬ៦០០ដុល្លារ ហើយគាត់ដាំដំណាំទៀតគាត់ចំណេញប្រហែល១ពាន់ដុល្លារក្នុងមួយឆ្នាំ។ ការចំណេញក៏ផ្តល់ប្រយោជន៍ដល់គាត់នៅថ្នាំក្រោយទៀតផងដែរ» ។
បើតាមការអះអាងរបស់លោក សរ វេង បានឲ្យដឹងថា ចំពោះផលិតផលដំណាំគម្រប ដីបច្ចុប្បន្នមានទីផ្សារខ្លាំង នៅក្នុងស្រុក និងនាំចេញទៅលក់នៅក្រៅប្រទេសផងដែរ ។
លោកបន្ថែមថា ដំណាំគម្របដីនេះ មិនត្រឹមតែត្រូវការនៅក្នុងប្រទេសយើងទេ គឺនៅសកលលោកក៏គេយកប្រភេទដំណាំដីនេះ ទៅកែប្រែគុណភាពដីរបស់គេដែរ ។
ទាក់ទិននឹងតម្លៃវិញ លោក សរ វេង បានឲ្យដឹងថា ចំពោះការដាំណាំប្រភេទនេះក៏មានការចរចាពីតម្លៃផងដែរ ជាមួយក្រុមហ៊ុន អ្នកបញ្ជាទិញ នៅពេលប្រជាកសិករដាំដែរ ព្រោះថា ប្រភេទដំណាំនេះ បើដាំគ្មានអ្នកបញ្ជាទិញក៏ពិបាកដែរ ។
ចំណែកលោក លាង សំរិត ជាបុគ្គលិកនៃសកលវិទ្យាល័យជាតិបាត់ដំបង និងជាអ្នកគ្រប់គ្រងគម្រោង «ការវិនិយោគលើការគ្រប់គ្រងសារធាតុសរីរាង្គក្នុងដី ដើម្បីនិរន្តរភាពនៃការធ្វើកសិកម្មនៅតំបន់ខ្ពង់រាប (ISOC project)» ដែលគម្រោងនេះ ទទួលបានមូលនិធិគាំទ្រការអនុវត្តន៍ពីកម្មវិធីសម្ព័ន្ធភាពការប្រែប្រួលអាកាសធាតុកម្ពុជាដំណាក់កាលទី៣ របស់ក្រសួងបរិស្ថាន បានលើកឡើងថា ការអនុវត្តកសិកម្មអភិរក្ស ដោយការកាត់បន្ថយការភ្ជួររាស់ដី និងការដាំណាំគម្របដី បានជួយកែលម្អគុណភាពដីដែលធ្វើឲ្យដំណាំទទួលបានទិន្នផលខ្ពស់ និងកាត់បន្ថយការលេចចេញនៃឧស្ម័នផ្ទះកញ្ចប់ពីដីទៅបរិយាកាសផងដែរ។
ជាមួយគ្នានោះដែរ លោក លឹម សុខុម ជាកសិកររស់នៅក្នុងភូមិរស្មីសង្ហារ ឃុំរស្មីសង្ហារ ស្រុករតនៈមណ្ឌល ខេត្តបាត់ដំបង បានឲ្យដឹងថា សព្វថ្ងៃគាត់បានដាំដំណាំដូចជាពោត សណ្តែក ដំឡូង ចំណែកដាំណាំគម្របដី មានដូចជាសង្ក្រងស្វាស្លឹកតូច ស្លឹកធំ ស្នោជាដើម។
លោកបញ្ជាក់ថា ៖ «ខ្ញុំដំណាំនេះ នៅពេលប្រមូលផងពោត យើងដាំវាជួយធ្វើឲ្យដីធូរ ដីមានជីវជាតិ បានចំណូលក្នុងគ្រូសារ។ យើងដាំពោតរួចហើយ បានយើងដាំដំណាំគម្របដី អ៊ីចឹង ដំដាំគម្របដីមានរយៈពេល២ខែជាង ទើបយើងប្រមូលផល ដូច្នេះមួយឆ្នាំយើងប្រមូលបាន២ដងដែរ» ។
លោកបានបន្តថា ការដាំដំណាំគម្របដី បានជួយដល់គុណភាពដី ប្រៀបដូចជាជី ពោលគឺនៅពេលដាំដំណាំគម្របដីរួច ដាំណាំផ្សេងទៀតធ្វើឲ្យដំណាំលូតលាស់បានល្អលឿន ។
បើតាមកសិកររូបនេះ បានឲ្យដឹងថា គាត់ដំណាំលើផ្ទៃដីចំនួន១០ហិកតា ដោយទទួលបានផលចំណូលក្នុងគ្រួសារ ឧទាហរណ៍ក្នុងមួយហិកតា អាចទទួលបានទិន្នផលពីចន្លោះពី៧ ទៅ៨តោន ។
លោកបញ្ជាក់ថា ៖ «ចំពោះដំណាំនេះ យើងអាចទទួលបានផលជាប្រាក់ អាចសម្រាប់ផ្គត់ផ្គង់គ្រួសារ ពោលគឺអាចប្រកបការដាំដុះបន្តទៀតបាន» ។
សូមជម្រាបថា ដំណាំគម្របដីមានដូចជា ៖ ចង្ក្រង់ស្វាស្លឹកតូច មីលែក សង់ត្រូ ស្លឹឡូ សណ្តែងអង្រែ ស្គួយ ចង្ក្រង់ស្វាស្លឹកធំជាដើម ៕
ចែករំលែកព័តមាននេះ