នាយករដ្ឋមន្ត្រីអ៊ីស្រាអែលថាសង្គ្រាមនឹងអូសបន្លាយពេលយូរ
សង្គ្រាមអ៊ីស្រាអែលនិងក្រុមហាម៉ាស់ ៖ ក្នុងកិច្ចប្រជុំគណៈរដ្ឋមន្ត្រីមួយ នាយករដ្ឋមន្ត្រីអ៊ីស្រាអែល
សង្គ្រាមអ៊ីស្រាអែលនិងក្រុមហាម៉ាស់ ៖ ក្នុងកិច្ចប្រជុំគណៈរដ្ឋមន្ត្រីមួយ នាយករដ្ឋមន្ត្រីអ៊ីស្រាអែលលោកបេនចាមីននេតាន់យ៉ាហ៊ូ ព្យាករណ៍នាថ្ងៃទី២៤ ធ្នូថា សង្គ្រាមជាមួយក្រុមហាម៉ាសប៉ាឡេស្ទីននឹងអូសបន្លាយពេលយូរថែមទៀត ហើយលោកក៏សម្ដែងការសោកស្ដាយផងដែរ ចំពោះការបាត់បង់ទាហានអ៊ីស្រាអែលច្រើននាក់ក្នុងសង្គ្រាមនោះ។
តាំងពីថ្ងៃទី២២ ធ្នូ កន្លងមកនេះ ទាហានអ៊ីស្រាអែលដល់ទៅ១៤នាក់បានត្រូវស្លាប់ ក្នុងការប្រយុទ្ធប្រឆាំងពួកហាម៉ាស់នៅជ្រោយហ្គាហ្សា។ នោះជាតុល្យការអាក្រក់បំផុតមួយ សម្រាប់កងទ័ពអ៊ីស្រាអែលក្នុងដំណាក់កាលដ៏ខ្លីមួយ តាំងពីចាប់ផ្ដើមការវាយលុកលើជ្រោយហ្គាហ្សាពីថ្ងៃទី៧ តុលា កន្លងមក។
កងទ័ពអីុស្រាអែលប្រកាសថា ខ្លួននឹងបង្កើនការវាយប្រហារប្រឆាំងចលនាអ៊ិស្លាមនោះ។ លោកនេតាន់យ៉ាហ៊ូ បន្តថា យើងនឹងប្រយុទ្ធដល់ទីបំផុតគឺរហូតដល់រំដោះចំណាប់ខ្មាំង រហូតដល់កម្ទេចពួកហាម៉ាស់និងរហូតដល់យើងអាចស្ដារឡើងវិញសន្តិសុខឲ្យបានប្រសើរទាំងនៅភាគខាងជើងទាំងនៅភាគខាងត្បូងជ្រោយហ្គាហ្សា។
កាលពីថ្ងៃទី២២ធ្នូទាហានអីុស្រាអែលម្នាក់បានស្លាប់នៅភាគខាងជើងប្រទេស ដោយសារការវាយប្រហារមកពីលីបង់ដែលជាការវាយប្រហាររបស់ពួកហេសប៊ុលឡាហ៍សម្ព័ន្ធមិត្តហាម៉ាស់។ តាំងពីចាប់ផ្ដើមសង្គ្រាមនៅជ្រោយហ្គាហ្សាមក ទាហានអីុស្រាអែលយ៉ាងតិច១៥៣នាក់ហើយបានត្រូវស្លាប់៕
ចែករំលែកព័តមាននេះ