ខេត្តបន្ទាយមានជ័យ ៖ អ្នកនាំពាក្យ នៃស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២២ ខែធ្នូ ឆ្នាំ២០២៣នេះ បានចេញបដិសេធចំពោះសារព័ត៌មានថៃ ដែលផ្សាយថា មានករណីប្រើអំពើហិង្សា…
ខេត្តបន្ទាយមានជ័យ ៖ អ្នកនាំពាក្យ នៃស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២២ ខែធ្នូ ឆ្នាំ២០២៣នេះ បានចេញបដិសេធចំពោះសារព័ត៌មានថៃ ដែលផ្សាយថា មានករណីប្រើអំពើហិង្សា និងបង្ខាំងទៅលើជនជាតិថៃ០៩នាក់ក្នុងក្រុងប៉ោយប៉ែតនោះ គឺសមត្ថកិច្ចរកពុំទាន់ឃើញមានភស្តុតាងពាក់ព័ន្ធដូចការចោទប្រកាន់របស់សារព័ត៌មានថៃ បានចុះផ្សាយនោះទេ ។
អ្នកនាំពាក្យ បានអោយដឹងថា កាលពីថ្ងៃទី១៩ ខែធ្នូ ឆ្នាំ២០២៣ មានសារព័ត៌មានថៃ បានចុះផ្សាយថា «ជនជាតិថៃ ចំនួន០៩នាក់ បានរត់ឆ្លងដែនចូលទឹកដីថៃ ដើម្បីអោយសមត្ថកិច្ចជួយសង្គ្រោះ ដោយពួកគេអះអាងថា ត្រូវចាញ់បោកក្រុមបងធំ នាំទៅធ្វើការ នៅក្នុងកាស៊ីណូខុសច្បាប់នៅក្រុងប៉ោយប៉ែត» និងសារព័ត៌មានមួយចំនួនទៀត ចុះផ្សាយពាក់ព័ន្ធនឹងករណីជនជាតិថៃទាំង០៩នាក់នេះ ផងដែរ ។
អ្នកនាំពាក្យ បានបន្តថា ក្រោយពីទទួលព័ត៌មានផ្សព្វផ្សាយនេះ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ និងមានការសម្របសម្រួលនីតិវិធីពីលោក សំរិទ្ធ សុខុន ព្រះរាជអាជ្ញារង នៃអយ្យការអមសាលាដំបូងខេត្តបន្ទាយជ័យ ដឹកនាំសមត្ថកិច្ចចំរុះមានសមត្ថកិច្ចនគរបាល កងរាជអាវុធហត្ថក្រុង និងអាជ្ញាធរក្រុងប៉ោយប៉ែត ចុះដល់អាគារមួយកន្លែង ចំណុចអាគារថ្មី ភូមិអូរជ្រៅ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ បានរកឃើញជនជាតិថៃ១៧នាក់ (ស្រី១០នាក់) រួមជាមួយអ្នកពាក់ព័ន្ធផ្សេងទៀត នឹងចុះត្រួតពិនិត្យកន្លែងកើតហេតុ ករណីឆេះបន្ទប់ដេកស្នាក់នៅរបស់បុគ្គលិកលេខ A7 ស្ថិតក្នុងអគារស្នាក់នៅក្នុងកាស៊ីណូពូលី មានទីតាំង ស្ថិតក្នុងភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ដែលសង្ស័យពាក់ព័ន្ធនឹងជនជាតិថៃ ចំនួន០៩នាក់ ដែលលួចឆ្លងដែនដោយខុសច្បាប់ចូលប្រទេសថៃ កាលពីថ្ងៃទី១៨ ខែធ្នូ ឆ្នាំ២០២៣ ។
អ្នកនាំពាក្យ បន្តទៀតថា យោងតាមលទ្ធផលស្រាវជ្រាវយ៉ាងយកចិត្តទុកដាក់របស់សមត្ថកិច្ចជំនាញ និងស្ដាប់ការបំភ្លឺរបស់អ្នកពាក់ព័ទ្ធជុំវិញរឿងហេតុខាងលើឃើញថា ជនជាតិថៃ០៩នាក់ បានឈ្លោះប្រកែកគ្នា ដុតឆេះបន្ទប់ដេក និងបានបើអំពើហិង្សាលើសន្តិសុខ ពេលចូលឃាត់ ដោយខ្លាចសមត្ថកិច្ចចាប់ខ្លួនមកអនុវត្តច្បាប់ ទើបនាំគ្នារត់គេចខ្លួនលោតផ្លោះរបង បន្លាលួសបណ្ដាលអោយមានរបួស ហើយបានលួចឆ្លងដែនដោយខុសច្បាប់ ចូលប្រទេសថៃ កាលពីថ្ងៃទី១៨ ខែធ្នូ ឆ្នាំ ២០២៣។
អ្នកនាំពាក្យ ក៏បានបញ្ជាក់ដែរថា ចំពោះការប្រើអំពើហិង្សា និងបង្ខាំងទៅលើជនជាតិថៃ០៩នាក់នោះ គឺសមត្ថកិច្ចយើងរកពុំទាន់ឃើញ មានភស្តុតាងពាក់ព័ន្ធដូចការចោទប្រកាន់របស់សារព័ត៌មានថៃ បានចុះផ្សាយនោះទេ ៕
ចែករំលែកព័តមាននេះ