ជម្លោះតំបន់ហ្គាហ្សា ៖ ម៉ាឡេស៊ីហាមកប៉ាល់អ៊ីស្រាអែលទាំងអស់ចូលកំពង់ផែខ្លួន
ម៉ាឡេស៊ី ៖ រដ្ឋាភិបាលប្រទេសម៉ាឡេស៊ីបានសម្រេចហាមឃាត់បណ្តាកប៉ាល់ ដែលមានទង់ជាតិប្រទេស
ម៉ាឡេស៊ី ៖ រដ្ឋាភិបាលប្រទេសម៉ាឡេស៊ីបានសម្រេចហាមឃាត់បណ្តាកប៉ាល់ ដែលមានទង់ជាតិប្រទេសអ៊ីស្រាអែលចូលចតនៅកំពង់ផែរបស់ខ្លួន ដើម្បីជាការឆ្លើយតបទៅនឹងការវាយលុករបស់ប្រទេសមួយនេះ នៅតំបន់ហ្គាហ្សាស្ទ្រីប។ នេះបើយោងតាមប្រភពទូរទស្សន៍ជប៉ុន NHK ចេញផ្សាយកាលពីថ្ងៃទី២១ ខែធ្នូ ឆ្នាំ២០២៣។
រដ្ឋាភិបាលបណ្តាប្រទេសកាន់សាសនាឥស្លាមភាគច្រើនបានអះអាងថា សកម្មភាពរបស់អ៊ីស្រាអែលមិនអើពើនឹងគោលការណ៍មនុស្សធម៌ជាមូលដ្ឋាន និងបំពានច្បាប់អន្តរជាតិតាមរយៈការសម្លាប់រង្គាលដែលកំពុងបន្ត និងអំពើឃោរឃៅប្រឆាំងនឹងប៉ាឡេស្ទីន។
រដ្ឋាភិបាលម៉ាឡេស៊ីបានប្រកាសអំពីការដាក់ទណ្ឌកម្មនៅក្នុងសេចក្តីថ្លែងការណ៍មួយ កាលពីថ្ងៃទី២០ ខែធ្នូ កន្លងទៅ ដោយបានលើកឡើងពីក្រុមហ៊ុនដឹកជញ្ជូនដ៏ធំបំផុតមួយរបស់អ៊ីស្រាអែល ដែលមានឈ្មោះថា ZIM ក្នុងចំណោមក្រុមហ៊ុនផ្សេងទៀត។ បន្ថែមលើសពីនេះទៀត រដ្ឋាភិបាលប្រទេសសមាជិកអាស៊ានមួយនេះ ក៏បានហាមឃាត់បណ្តាកប៉ាល់ណាមួយ ដែលមានបំណងធ្វើដំណើរទៅកាន់ប្រទេសអ៊ីស្រាអែលពីការដឹកទំនិញនៅកំពង់ផែម៉ាឡេស៊ីផងដែរ។
ការប្រមូលផ្តុំគ្នាគាំទ្រប៉ាឡេស្ទីនជាច្រើនបានកើតឡើងនៅទូទាំងប្រទេសម៉ាឡេស៊ី។ ជាក់ស្តែង កាលពីខែតុលាកន្លងទៅ មនុស្សរាប់ពាន់នាក់បានប្រមូលផ្តុំគ្នានៅឯការប្រមូលផ្តុំមួយដែលនាយករដ្ឋមន្ត្រីម៉ាឡេស៊ី លោក Anwar Ibrahim បានអំពាវនាវឱ្យប្រទេសអ៊ីស្រាអែលបញ្ឈប់ការវាយប្រហារលើតំបន់ហ្គាហ្សាស្ទ្រីបជាបន្ទាន់។
នៅក្នុងប្រទេសម៉ាឡេស៊ី ប្រជាជនម៉ូស្លីមត្រូវបានគេដឹងថា មានចំនួនច្រើនជាង ៦០% នៃចំនួនប្រជាជនសរុបជាង៣៤លាននាក់របស់ខ្លួន។ រដ្ឋាភិបាលម៉ាឡេស៊ីបានរក្សាជំហរគាំទ្រប៉ាឡេស្ទីនជាយូរមកហើយ ហើយគ្មានទំនាក់ទំនងការទូតជាមួយនឹងប្រទេសអ៊ីស្រាអែលនោះទេ៕
ចែករំលែកព័តមាននេះ