សល់តែប៉ុន្មានថ្ងៃទៀត ឆ្នាំ២០២៤នឹងចូលមកដល់។ ឆ្នាំ២០២៤ កម្មករកាត់ដេរ និងមន្ត្រីរាជការ ត្រូវឡើងប្រាក់ខែ ប៉ុន្តែស្របពេលនេះ ទំនិញនៅលើទីផ្សារបានឡើងថ្លៃផងដែរ។ ទាំងកម្មករ និងមន្ត្រីរាជការ បានសាទរការឡើងប្រាក់ខែ ប៉ុន្តែពួកគាត់ថា
សល់តែប៉ុន្មានថ្ងៃទៀត ឆ្នាំ២០២៤នឹងចូលមកដល់។ ឆ្នាំ២០២៤ កម្មករកាត់ដេរ និងមន្ត្រីរាជការ ត្រូវឡើងប្រាក់ខែ ប៉ុន្តែស្របពេលនេះ ទំនិញនៅលើទីផ្សារបានឡើងថ្លៃផងដែរ។ ទាំងកម្មករ និងមន្ត្រីរាជការ បានសាទរការឡើងប្រាក់ខែ ប៉ុន្តែពួកគាត់ថា ការឡើងប្រាក់ខែតិចតូចមិនអាចទប់ទល់ជាមួយការឡើងថ្លៃទំនិញបាននោះទេ។ មន្ត្រីរាជការ និងកម្មករ បានទទួចសុំឱ្យរដ្ឋជួយទប់ស្កាត់ការឡើងថ្លៃទំនិញផងដែរ។
អ្នកស្រី សុផល ដែលជាកម្មការិនីម្នាក់រស់នៅម្តុំសង្កាត់ទួលសង្កែ ខណ្ឌឬស្សីកែវ បានត្អូញត្អែរប្រាប់ឱ្យដឹងថា «ទំនិញនៅតែបន្តឡើងថ្លៃ ខណៈប្រាក់ខែគោលរបស់គាត់ ដែលនឹងឡើងចំនួន៤ដុល្លារ ចាប់ពីខែមករា ឆ្នាំ២០២៤នេះ ទៅមិនអាចធ្វើឱ្យជីវភាពគាត់ប្រសើរនោះទេ»។
«ជីវិ.តកម្មករកាត់ដេរ កាន់តែលំបាក នាពេលបច្ចុប្បន្ននេះ។ ផលលំបាកទី១- មិនសូវមានការធ្វើ ធ្វើឱ្យចំណូលបានតិច តែចំណាយមានការកើនឡើង។ ក្នុងមួយថ្ងៃៗសម្រាប់កម្មករម្នាក់ ត្រូវចំណាយជិត៥ដុល្លារទៅលើអាហារ និងចំណីនានា។ ប្រាក់ខែ២០០ដុល្លារ ពិបាកទប់ណាស់។ បន្ថែមពីលើអាហារ យើងត្រូវចំណាយលើថ្លៃទឹក ថ្លៃភ្លើង និងថ្លៃបន្ទប់ទៀត»។ នេះបើអ្នកស្រី សុផល បានរៀបរាប់ប្រាប់ឱ្យដឹង។
អ្នកស្រីនិយាយបន្តថា «កម្មករ អាចចំណាយគ្រប់គ្រាន់ ប្រសិនជាចំណូលចាប់ពី៣០០ដុល្លារ ឡើងទៅ»។
កំពុងអង្គុយបរិភោគបាយថ្ងៃត្រង់ នៅមុខរោងចក្រកាត់ដេរ នៅម្តុំចោមចៅ លោក សំណាង បានស្នើឱ្យរដ្ឋាភិបាលទប់ស្កាត់ការឡើងថ្លៃទំនិញនៅលើទីផ្សារ ក្រៅពីការដំឡើងប្រាក់ខែនោះ។ លោកថា ការទប់ស្កាត់មិនឱ្យទំនិញឡើងថ្លៃប្រសើរជាងការដំឡើងប្រាក់ខែតិចតូច។
លោកសំណាង បានពោលដូច្នេះថា «ខ្ញុំចង់ឱ្យមានការគិតគូរពីបញ្ហាតម្លៃទំនិញ និងតម្លៃផ្ទះជួល ដែលតែងតែកើនឡើងជារៀងរាល់ឆ្នាំ នៅពេលប្រាក់ខែកម្មករឡើងនោះ។ ស្ថានការណ៍បច្ចុប្បន្ននេះ ទោះបីជាខំត្បិតត្បៀតយ៉ាងណាក៏ចាយមិនគ្រាន់ដែរ ដោយសារប្រាក់ខែកម្មករមិនសមាមាត្រនឹងតម្លៃទំនិញ និងសេវាកម្មដែលកំពុងកើនឡើងលើទីផ្សារ។ បច្ចុប្បន្ននេះ គ្រប់គ្នាកំពុងលំបាក ចំណូលតិចវាប៉ះពាល់ការហូបចុកមិនគ្រប់គ្រាន់ និងការផ្ញើទៅផ្ទះ ដើម្បីបង់ធនាគារ»។
លោក ស៊ីផាត ដែលជាមន្ត្រីរាជការ ក៏បាននិយាយដែរថា «លោកបានដឹងថា នៅឆ្នាំ២០២៤នេះ រដ្ឋនឹងដំឡើងប្រាក់ខែដល់មន្ត្រីរាជការ ដូចកាលពីឆ្នាំ២០២៣ដែរ»។
«យើងពិតជាមានការត្រេកអរចំពោះការដំឡើង។ តែយើងគិតមើល ការឡើងពី១០ទៅ១៥ម៉ឺន ដែលស្មើប្រមាណ៣០ដុល្លារនោះ គឺរត់មិនទាន់ថ្លៃទំនិញលើទីផ្សារបានឡើយ»។
កម្មករកាត់ដេរ នឹងត្រូវដំឡើងប្រាក់ខែពី២០០ដុល្លារទៅ២០៤ដុល្លារក្នុងមួយខែ។ មន្ត្រីអះអាងថា ការឡើងប្រាក់ឈ្នួលនេះ គឺជាចំណុចវិជ្ជមានដែលកម្ពុជាបានគិតគូរដល់ជីវភាពកម្មករ។ ប្រទេសជាច្រើនពុំបានដំឡើងប្រាក់ខែកម្មករនោះទេ នៅក្នុងគ្រាជួបវិបត្តិសេដ្ឋកិច្ច ដោយសារកូវីដ១៩នោះ។
ចំណែកមន្ត្រីរាជការវិញ ត្រូវបានប្រកាសថា នឹងមានការដំឡើងប្រាក់ខែពីរដងនៅឆ្នាំ២០២៤ ដូចទម្លាប់ដែលបានអនុវត្តជាច្រើនឆ្នាំមកហើយ។ ការដំឡើងប្រាក់បៀវត្សលើកទី១ នៅខែមករា គឺជាការដំឡើងមូលដ្ឋានប្រាក់បៀវត្ស និងការដំឡើងលើកទី២ នៅខែមេសា មុនចូលឆ្នាំខ្មែរ ដែលជាការដំឡើងប្រាក់បំណាច់មុខងារ។
រដ្ឋបានគ្រោងថវិកាប្រមាណ ១០ ២៥៤ ៩៦៧ លានរៀល (ប្រមាណជាង ២៥០០លានដុល្លារ) សម្រាប់ចំណាយទៅលើបន្ទុកបុគ្គលិករដ្ឋនៅឆ្នាំ២០២៤ ដើម្បីជ្រើសមន្ត្រីថ្មី ជំនួសអ្នកចូល និវត្តន៍ក្នុងឆ្នាំ២០២៣, ដំឡើងបៀវត្សជូនមន្ត្រីរាជការ និងការដំឡើងប្រាក់បំណាច់មុខងារ។ នេះបើយោងតាមខ្លឹមសារសង្ខេបនៃសេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៤ ។
សេចក្តីព្រាងច្បាប់ បានបញ្ជាក់ថា ក្នុងគោលបំណងបន្តអនុវត្តគោលនយោបាយដំឡើងបៀវត្សអប្បបរមាជូនមន្ត្រីរាជការ, បៀវត្សមូលដ្ឋានរបស់មន្ត្រីរាជការស៊ីវិល និងកងកម្លាំងប្រដាប់អាវុធ នៅឆ្នាំ២០២៤ នឹងត្រូវបានដំឡើងចំនួន ៥%, ហើយប្រាក់បំណាច់មុខងារ នឹងត្រូវបានដំឡើងតាមកម្រិត ដូចជា ៖ ផ្តល់បន្ថែម២២ ៥០០ រៀល សម្រាប់មន្ត្រីរាជការ ស៊ីវិលដែលមានប្រាក់បំណាច់មុខងារក្នុងកម្រិតចាប់ពី ១ ១៣០ ០០០រៀល ចុះក្រោម និងផ្តល់ចំនួន ២០ ០០០ រៀល សម្រាប់មន្ត្រីរាជការដែលមានប្រាក់បំណាច់ មុខងារក្នុងកម្រិត ចាប់ពី ១ ១៣០ ១០០រៀល ឡើងទៅជាដើម។
ប្រឈមការចំណាយខ្ពស់ ក្នុងវិបត្តិសេដ្ឋកិច្ចកំពុងវា.យលុ.ក ដែលពលរដ្ឋជាច្រើនរកចំណូលមិនបាននោះ ប្រជាពលរដ្ឋគ្រប់មជ្ឈដ្ឋានបានទទួចឱ្យរដ្ឋជួយដោះស្រាយបញ្ហាទំនិញឡើងថ្លៃ និងបញ្ចុះអត្រាការប្រាក់ធនាគារផងដែរ។ ជាញឹកញាប់ មន្ត្រីអះអាងថា កម្ពុជាប្រកាន់នយោបាយ ទីផ្សារសេរី ដែលការកំណត់ថ្លៃទំនិញ និងសេវាកម្ម រដ្ឋពិបាកក្នុងការលូកដៃ។ នោះជាសិទ្ធិវិស័យឯកជន។
តែអ្នកសេដ្ឋកិច្ចខ្លះថា រដ្ឋអាចជួយពលរដ្ឋបានតាមរយៈការកាត់បន្ថយពន្ធអាករ ដែលជាបន្ទុក អ្នកប្រើប្រាស់បាន៕
អត្ថបទដោយ ៖ សា រ៉ាន់
ចែករំលែកព័តមាននេះ