- ភ្នំពេញ
ឆ្នាំ២០២៣ នឹងចាកចេញពីជើងនៅរយៈពេលមិនដល់១០ថ្ងៃទៀតនោះទេ ហើយវាជាឆ្នាំដែលប្រជាជនកម្ពុជាជាច្រើនឈឺចាប់ ដោយសារបំណុល បាត់បង់ការងារ រកស៊ីខាតជាដើម ក្រោមសម្ពាធ
ឆ្នាំ២០២៣ នឹងចាកចេញពីជើងនៅរយៈពេលមិនដល់១០ថ្ងៃទៀតនោះទេ ហើយវាជាឆ្នាំដែលប្រជាជនកម្ពុជាជាច្រើនឈឺចាប់ ដោយសារបំណុល បាត់បង់ការងារ រកស៊ីខាតជាដើម ក្រោមសម្ពាធវិបត្តិសេដ្ឋកិច្ចពិភពលោក។ យើងរំពឹងឆ្នាំ២០២៤ គឺជាឆ្នាំដ៏ល្អ ដ៏ជោគជ័យ និងដ៏រីករាយសម្រាប់ប្រជាជនកម្ពុជាទាំងអស់។
ប៉ុន្តែយើងក៏ត្រូវទទួលស្គាល់ថា យើងប្រហែលជាមិនបានត្រៀមខ្លួនមុនសម្រាប់ប្រឈមនឹងវិបត្តិសេដ្ឋកិច្ចឆ្នាំ២០២៣។ ដូច្នេះឆ្នាំ២០២៤ យើងត្រូវតែចេះគិតជាងមុន និងចេះមានផែនការជីវិតដ៏គ្រប់ជ្រុងជ្រោយមួយ ដើម្បីកុំអោយការឈឺចាប់ឆ្នាំ២០២៣ តាមលងយើងទាំងអស់គ្នា។
ស្ថាប័នរដ្ឋ ឯកជន ក្រុមហ៊ុន និងអង្គការក្រៅរដ្ឋាភិបាល កំពុងតែប្រញាប់បូកសរុបការងារប្រចាំឆ្នាំហើយនៅពេលនេះ។ ប៉ុន្តែសម្រាប់បុគ្គលយើងក៏គួរតែបូកសរុប និងពិនិត្យរកសមិទ្ធផល ក៏ដូចជាសមិទ្ធកម្មផ្ទាល់ខ្លួនផងដែរ ។
ការងារប្រចាំថ្ងៃ វាគឺជាកាតព្វកិច្ច និងភារៈកិច្ចដែលយើងត្រូវបំពេញ ប៉ុន្តែយើងក៏ត្រូវតែរិះគិត និងបូកសរុបការងារប្រចាំឆ្នាំរបស់យើងផងដែរ ។ ការរិះគិតអំពីសមិទ្ធកម្ម និងលទ្ធផលការងារដែលយើងបានធ្វើកន្លងមក នៅក្នុងរយៈពេលជិតមួយឆ្នាំមកនេះ គឺជារឿងចាំបាច់ណាស់ ដើម្បីយើងដឹងថា យើងបានធ្វើអ្វីខ្លះ សម្រេចអ្វីខ្លះ ហើយរៀបចំផែនការការងារផ្ទាល់ខ្លួន សម្រាប់ដាក់ផែនការថ្មីនៅឆ្នាំក្រោយបន្ថែមទៀតយ៉ាងណា ។
នៅក្នុងមួយឆ្នាំ មាន១២ខែ ៥២សប្តាហ៍ ៣៦៥ថ្ងៃ ៨.៧៦០ម៉ោង ឬ៥២៥ ៦០០នាទី គឺមិនតិចនោះទេ។ ប៉ុន្តែតើយើងបានធ្វើអ្វីខ្លះជាផលល្អសម្រាប់ខ្លួនយើង ក្នុងរយៈពេលដ៏វែងនេះ?
ប្រសិនបើយើងមិនរិះគិតឡើងវិញថា យើងបានធ្វើអ្វីខ្លះ យើងពិតជាមិនអាចរកឃើញនូវសមិទ្ធកម្ម និងសមិទ្ធផលការងារ ដែលយើងបានធ្វើនៅក្នុងរយៈពេលនេះបានឡើយ ។ ដូច្នេះ យើងក៏ពិបាកនឹងសិក្សា ក៏ដូចជាដាក់ផែនការដែលយើងត្រូវធ្វើនៅឆ្នាំក្រោយទៀតដែរ ។
សូមទម្លាប់រិះគិត និងចងក្រងកិច្ចការទាំងនេះ ហើយកុំសើចនៅពេលដែលយើងឃើញគេសិក្សាតាមរបៀបនេះ ។ ការដែលគេម្នាក់ៗមានទម្លាប់បែបនេះ បុគ្គលម្នាក់នោះច្រើនតែជោគជ័យ ពីព្រោះគេអាចគ្រប់គ្រង និងមានផែនការនៅក្នុងជីវិតរបស់គេ ។
នៅក្នុងមួយថ្ងៃៗ គេនឹងដឹងថា គេមានភារៈកិច្ចត្រូវធ្វើអ្វីខ្លះ តាំងពីការងារនៅក្នុងគ្រួសារ កន្លែងការងារ ភារៈកិច្ចប្រចាំថ្ងៃ ដូច្នេះគេអាចនឹងនៅសេសសល់ពេលវេលាដើម្បីគេរិះគិតថា គេអាចនឹងមានពេលដែលត្រូវធ្វើអ្វីដែលជាប្រយោជន៍បន្ថែម សម្រាប់ខ្លួនគេ គ្រួសារគេ និងអនាគតទៅមុខរបស់គេ ។
មនុស្សម្នាក់ៗមានផែនការ និងមានគោលដៅមិនដូចគ្នាឡើយ ហើយរាល់ការបូកសរុបការងារ និងសមិទ្ធកម្មដែលគេបានបំពេញប្រចាំឆ្នាំនឹងអាចអោយគេដឹងថា តើគោលដៅដែលគេបានកំណត់នេះដើរដល់កម្រិតណា? ហើយនៅពេលដែលដឹងនូវគោលដៅទាំងនោះហើយ គេអាចនឹងដាក់ចេញនូវផែនការនៅក្នុងឆ្នាំក្រោយថា ត្រូវបន្តខំប្រឹងប្រែង ឬក៏បន្ធូដៃ ឬមួយក៏កំណត់គោលដៅថ្មីសម្រាប់ជីវិត ។
តាមការរៀបរាប់បែបនេះ ប្រសិនបើយើងស្តាប់មើលទៅពិតជាចម្លែក ហើយគួបផ្សំនឹងពលរដ្ឋយើងមិនសូវជាយកចិត្តទុកដាក់ចំណុចនេះថែមទៀត បុគ្គលដែលកំណត់ និងរិះគិតបែបនេះ ច្រើនតែត្រូវគេសើចចំអក ហើយរហូតដល់អ្នកខ្លះអាចរិះគន់ និងវា.យប្រ.ហា.រថា ជាមនុស្សរិះល្អិតល្អន់ ស្វិតកំណាញ់ ហើយពេបជ្រាយដាក់ថែមទៀត។ ប៉ុន្តែទោះបីជាយ៉ាងណាក៏ដោយ បុគ្គលបែបនេះ គឺច្រើនតែជាអ្នកដែលទទួលជោគជ័យ ហើយតែងតែសម្រេចនូវគោលដៅជីវិតដែលគេបានកំណត់។
ផ្ទុយទៅវិញ នៅក្នុងករណីដែលយើងគ្មានគោលដៅ គ្មានការកត់ត្រា គ្មានការរិះគិតនោះ យើងគឺបានត្រឹមតែធ្វើការមួយថ្ងៃរួចមួយថ្ងៃ ហើយនៅពេលដែលដល់វ័យមួយ ដែលលទ្ធភាពការងាររបស់យើងចុះខ្សោយនោះ យើងនឹងមានស្ថានភាពហេងហាង ពិបាកនឹងពិពណ៌នា ។
សូមទម្លាប់រិះគិតតាំងពីស្ថានភាពនៃការងារ ការចំណាយ និងត្រួតពិនិត្យប្រាក់សន្សំ នៅក្នុងករណីប្រាក់សន្សំដល់ការកំណត់ ក៏គួរដាក់ចេញយកចំណែកនៃប្រាក់សន្សំមួយភាគណាមួយ ដាក់ចេញកម្មវិធីសប្បាយរីករាយជួបជុំគ្រួសារ ដើម្បីបង្កើនសុភមង្គល។ នៅក្នុងករណីថា ប្រាក់សន្សំមិនដល់គោលដៅ ក៏ត្រូវតែទទួលយកហើយច្នៃចេញជាសកម្មភាពដែលចំណាយតិចតែរីករាយនៅក្នុងគ្រួសារ ។ ចំណែកឯការងារវិញ ក៏ត្រូវពិនិត្យមើល តើលទ្ធផលដែលយើងខំនេះ សម្រេចបានប៉ុន្មាន? ហើយបើសម្រេចបានឆ្នាំក្រោយត្រូវកំណត់យ៉ាងណាទៀត? ហើយប្រសិនបើមិនពេញចិត្តទេ គឺត្រូវតែដាក់ផែនការកែលម្អ និងបង្កើនប្រសិទ្ធភាពយ៉ាងណា ដើម្បីជោគជ័យនៅឆ្នាំក្រោយ ។
សរុបមកវិញ ការត្រួតពិនិត្យផ្ទាល់ខ្លួនគួរតែធ្វើ ហើយនៅពេលដែលដឹងលទ្ធផល គឺដើម្បីយើងងាយស្រួលកំណត់គោលដៅត្រូវធ្វើនៅឆ្នាំបន្ទាប់ ។ ប្រសិនបើយើងមិនធ្វើ គឺការងារយើងនៅតែប៉ុណ្ណឹង។ តែបើយើងធ្វើវិញ យើងនឹងដឹងខ្លួនឯងថា យើងខ្លាំង ឫខ្សោយ ហើយក៏យើងអាចនឹងដឹងអំពីសមត្ថភាពរបស់យើងផងដែរ។ ដូច្នេះគួរតែសិក្សា និងរៀបចំរិះគិតបែបនេះ ដើម្បីជាប្រយោជន៍សម្រាប់ខ្លួនឯង គ្រួសារ និងការងារដែលយើងម្នាក់ៗកំពុងតែធ្វើ ។
សូមអោយឆ្នាំ២០២៤ ក្លាយជាឆ្នាំដ៏រីករាយ និងជោគជ័យសម្រាប់ប្រជាជនកម្ពុជាគ្រប់រូប៕
អត្ថបទដោយ ៖ ហេង ចេស្តារ
ចែករំលែកព័តមាននេះ