ភ្នំពេញ៖ លោក សេង ឌីណា អតីតប្រធានវិទ្យុបារាំង RFI ផ្នែកខេមរភាសា ដែលមានមូលដ្ឋាន​នៅទីក្រុងប៉ារីស ប្រទេសបារាំង ត្រូវបាន​តែងតាំងជារដ្ឋលេខាធិការក្រសួង​យុត្តិធម៌​។ លោក សេង ឌីណា បានកាន់តំណែង​ជាប្រធានវិទ្យុបារាំង RFI នៅពេលលោក ហ្សង់ ហ្វ្រង់ស័រ តាន់ បានលាឈប់ ចូលរួម​ក្នុងរាជរដ្ឋាភិបាលកម្ពុជា របស់សម្តេចធិបតី ហ៊ុន ម៉ាណែត កាលពីខែសីហា ឆ្នាំ២០២៣​។

ព្រះរាជក្រឹត្យ តែងតាំង​លោក សេង ឌីណា ជារដ្ឋលេខាធិការក្រសួងយុត្តិធម៌ ត្រូវបានព្រះករុណា ព្រះមហាក្សត្រ ត្រាស់បង្គាប់ កាលពីថ្ងៃទី១៥ ខែធ្នូ ឆ្នាំ២០២៣ រួមជាមួយ​នឹងការដំឡើង និងតែងតាំង​មុខតំណែង លោក អ៊ួង សុភារិទ្ធ ពីអនុរដ្ឋលេខាធិការ មកជារដ្ឋលេខាធិការក្រសួងយុត្តិធម៌ និងតែងតាំង​មុខតំណែងលោកស្រី ជា វាសនា ជារដ្ឋលេខាធិការក្រសួង​យុត្តិធម៌​។

លោក សេង ឌីណា បានប្រកាសក្នុងហ្វេសប៊ុក កាលពីថ្ងៃទី១៥ ខែធ្នូ ឆ្នាំ២០២៣ ថា «ជាទំព័រជីវិតថ្មី តែក៏ជាការត្រឡប់មករកទ្រនំចាស់ និងគោលដៅជីវិតដើមដំបូង គឺធ្វើកិច្ចការក្នុងវិស័យ​ច្បាប់ និងនយោបាយ»។

ជាការកត់សម្គាល់ លោក សេង ឌីណា ដែលបានបញ្ចប់​មហាវិទ្យាល័យ​នីតិសាស្ត្រ និងវិទ្យាសាស្ត្រសេដ្ឋកិច្ច នៅរាជធានីភ្នំពេញ បានទៅបន្តការសិក្សានៅប្រទេសបារាំង ថ្នាក់វិទ្យាសាស្ត្រនយោបាយ និងច្បាប់ ហើយ​បានរៀនជាមួយនឹងលោក កើត រិទ្ធ រដ្ឋមន្ត្រី​ក្រសួង​យុត្តិធម៌​ សព្វថ្ងៃ​។

មកដល់ពេលនេះ អតីតអ្នកធ្វើការនៅវិទ្យុបារាំង RFI ជាខេមរភាសា យ៉ាងហោចណាស់ ៨នាក់​ហើយ បានចូលបម្រើការងារ ក្នុងជួររាជរដ្ឋាភិបាល របស់សម្តេចធិបតី ហ៊ុន ម៉ាណែត។ ក្នុងនោះ រួមមាន៖

១-លោក ហ្សង់ ហ្វ្រង់ស័រ តាន់ អតីតប្រធានវិទ្យុបារាំង RFI សព្វថ្ងៃជារដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេស​

២-លោក ប៉ែន បូណា អតីតនិពន្ធនាយក​វិទ្យុបារាំង RFI សព្វថ្ងៃជារដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុក​ប្រធានអង្គភាពអ្នកនាំពាក្យរាជរដ្ឋាភិបាល

៣-កញ្ញា អ៊ុង ច័ន្ទ​សោភា អតីតអ្នកឆ្លងឆ្លើយ​ព័ត៌មាន RFI សព្វថ្ងៃ ជាអនុរដ្ឋលេខាធិការទីស្តីគណៈរដ្ឋមន្ត្រី​

៤-កញ្ញា អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ​

៥-លោក ស៊ុន មេសា អតីតអ្នកយកព័ត៌មានវិទ្យុបារាំង RFI សព្វថ្ងៃ ជាទីប្រឹក្សា ជាអនុព័ន្ធសារព័ត៌មាន និងជាអ្នកនាំពាក្យរង ក្រសួងការងារ និងបណ្តុះបណ្តាលវិជ្ជាជីវៈ

៦-លោក សេង ថៃ ( វ៉ា សំណព្វ ) អតីតអ្នកយកព័ត៌មានវិទ្យុបារាំង RFI សព្វថ្ងៃ​បម្រើការងារជាមួ​យលោក ប៉ែន បូណា

៧-លោក សឿង ភារៈ អតីត​អ្នកយកព័ត៌មានវិទ្យុបារាំង RFI សព្វថ្ងៃ​បម្រើការងារ​ជាមួយ​លោក ហ្សង់ហ្វ្រង់ស័រ តាន់

៨-លោក សេង ឌីណា អតីតអ្នកព័ត៌មាន និងជាប្រធានវិទ្យុបារាំង RFI ប្រចាំនៅប៉ារីស សព្វថ្ងៃ ជារដ្ឋលេខាធិការក្រសួងយុត្តិធម៌៕