ខេត្តស្វាយរៀង ៖ យុវជនចិត្តភ្លើងម្នាក់មិនជួយធ្វើការងារ លុះពេលឪពុកម្តាយស្តីបន្ទោសក៏ផឹកថ្នាំកណ្តុរបញ្ចប់ជីវិត តែសំណាងល្អគ្រូពេទ្យជួយសង្គ្រោះទាន់ពេល។ ករណីនេះបានកើតឡើងកាលពីថ្ងៃទី២១ ឧសភាវេលាម៉ោង៨ និង៣០នាទីព្រឹក នៅភូមិព្រៃទទឹង ឃុំសំបួរ ស្រុកស្វាយទាប
ខេត្តស្វាយរៀង ៖ យុវជនចិត្តភ្លើងម្នាក់មិនជួយធ្វើការងារ លុះពេលឪពុកម្តាយស្តីបន្ទោសក៏ផឹកថ្នាំកណ្តុរបញ្ចប់ជីវិត តែសំណាងល្អគ្រូពេទ្យជួយសង្គ្រោះទាន់ពេល។ ករណីនេះបានកើតឡើងកាលពីថ្ងៃទី២១ ឧសភាវេលាម៉ោង៨ និង៣០នាទីព្រឹក នៅភូមិព្រៃទទឹង ឃុំសំបួរ ស្រុកស្វាយទាប។
បើតាមស្ត្រីឈ្មោះសៅ សាវួច អាយុ៤០ឆ្នាំ ត្រូវជាម្តាយបានប្រាប់កោះសន្តិភាពថា យុវជនជាកូននេះឈ្មោះសៅ រ៉ូ អាយុ១៨ឆ្នាំ នៅភូមិ-ឃុំកើតហេតុខាងលើបានខឹងនឹងរូបគាត់ជាម្តាយស្តីបន្ទោស ព្រឹកឡើងក៏ទៅទិញថ្នាំកណ្តុរមួយកញ្ចប់យកមកផឹកប៉ងធ្វើអត្តឃាត បន្ទាប់ពីផឹករួចកូនគាត់ក៏ស្រែកហៅឱ្យគេជួយដោយសំឡេងថា ជួយផងខ្ញុំផឹកថ្នាំកណ្តុរ ពេលនោះម្តាយឡើងទៅមើលលើផ្ទះក៏ឃើញកូនប្រុសរបស់គាត់ពុលបែកពពុះមាត់ដេកលើរនាបក៏ស្រែកហៅអ្នកស្រុកឱ្យជួយ ប្រញាប់ប្រញាល់ឌុបតាមម៉ូតូមកកាន់មន្ទីរពេទ្យដើម្បីសង្គ្រោះ។
អ្នកស្រីបន្តថា កូនប្រុសគាត់នេះមិនដែលជួយធ្វើការរកស៊ីឪពុកម្តាយទេ ដើរលេងជាមួយមិត្តភក្តិផឹកស៊ីស្រវឹងធ្លាក់ភ្នែកស្ទើររាល់ថ្ងៃទើបនៅល្ងាចថ្ងៃទី២០ ឧសភា វេលាម៉ោងប្រមាណជា៥ល្ងាចកូនប្រុសគាត់មកពីណាទេស្រវឹងស្រាដាប រួចដើរឡើងផ្ទះចូលដេក ពេលនោះរូបគាត់ជាម្តាយបានស្តីបន្ទោសពីការដើរលេងផឹកស៊ីមិនជួយធ្វើការងារឪពុកដែលមានវ័យកាន់តែចាស់ ខំធ្វើការរកស៊ីយ៉ាងត្រដាបត្រដួសទំរាំបានប្រាក់មកចិញ្ចឹមគ្រួសារ មិនមើលគំរូឪពុកបែរជាដើរលេងស៊ីផឹកបំផ្លាញប្រាក់ក្នុងគ្រួសារ និងធ្វើឱ្យឪពុកម្តាយខ្មាសអស់អ្នកស្រុក ល្មមឈប់ដើរលេងផឹកស៊ីទៀតទៅអាសូរទ្រូងឪពុក ម្តាយផង។
ពេលឮម្តាយពោលពាក្យបែបស្តីបន្ទោសឱ្យខ្លួនបែបនេះ យុវជនចិត្តភ្លើងមិនបានតបតដោយសំដីធ្ងន់ធ្ងរនោះទេ ហើយក៏សំងំដេកទៅ លុះព្រឹកឡើងស្រាប់តែទៅទិញថ្នាំកណ្តុរមកផឹកធ្វើឱ្យគ្រួសារកាន់តែលំបាកមួយកម្រិតទៀត។ ចំណែកអ្នកស្រុកហួសចិត្តពេលពុលបែកពពុះមាត់ប្រកាច់នោះស្រាប់តែចង់រស់វិញស្រែកហៅឱ្យគេជួយសំណាងល្អម្តាយនៅផ្ទះបានឮកុំអីក្លាយជាសាកសពបាត់ទៅហើយ គ្រូពេទ្យនិយាយថា បើយឺតតែបន្តិចក៏ហួសពេលដែរ បច្ចុប្បន្នយុវជនចិត្តភ្លើងកំពុងព្យាបាលនៅមន្ទីរពេទ្យខេត្ត ៕
ចែករំលែកព័តមាននេះ